KATHERINE uvua mukolele mu États-Unis ne wakatambula ne kuluaye Ntemu wa Yehowa pavuaye ne bidimu 16. Uvua uyisha bikole kadi bantu bakese ke bavua bitaba mukenji wa Bukalenge muaba uvuaye uyisha. Udi wamba ne: “Ngakabala miyuki ya bantu bavua basambila Nzambi bua abatumine muntu uvua mua kubambuluisha bua kumumanya. Mvua mutekemene misangu yonso ne: mvua mua kupeta muntu wa nunku, kadi tshivua mumupete to.”

Panyima pa Katherine mumane kuyisha munkatshi mua bidimu bia bungi mu teritware umue au, wakatuadija kuela meji bua kuya muaba uvua bantu ba bungi mua kuitaba mukenji wa Bukalenge. Kadi wakadikonka bikalaye mua kukumbaja bualu ebu. Katshia bamulela, uvua mushiyangane ne dîku diabu anu musangu umue, bua mbingu ibidi patupu, kadi kuabu kuvua kumusamina muoyo dituku dionso. Kadi dijinga dikole divuaye nadi dia kuambuluisha bantu bavua bakeba kumanya Yehowa diakatshimuna. Panyima pa yeye mumane kukonkonona miaba mishilashilangana ivuaye mua kuya, wakafundila Betele wa mu Guam ne kupetaye malu avua akengela kumanya. Mu ngondo wa 7 wa 2007 pavua Katherine ne bidimu 26, wakaya mu Saipan, tshidiila dia mu Mbuu wa Pacifike tshidi mu ntanta wa kilometre mitue ku 10 000. Luendu luende luakapita mushindu kayi?

Matuku makese panyima pa difika dia Katherine mu tshisumbu tshipiatshipia, wakapetangana ne Doris, mamu wa bidimu 40 ne pa mutu uvua muitabe bua kulonga Bible. Bobu bamane kulonga nshapita isatu ya mu mukanda wa Bible ulongesha, Katherine wakatuadija kuelakana. Udi wamba ne: “Doris uvua mulongi muimpe, ne tshivua musue kujimija mpunga eu to. Katshia tshivua muanji kulombola dilonga dia Bible didi diya kumpala to, ne ngakamona ne: Doris uvua dijinga ne muanetu wa bakaji uvua mupiluke bua kulonga nende, pamuapa wa mulongo wende.” Katherine wakasambila Yehowa bua amuambuluishe bua apete muanetu wa bakaji mukumbane uvuaye mua kupesha mulongi wende wa Bible. Pashishe wakangata dipangadika bua kuambila Doris bua muvuaye mua kushintulula mulongeshi wende.

Katherine udi wamba ne: “Kumpala kua meme kuambila Doris bualu ebu, yeye wakangambila ne: uvua ne bualu bua kungambila. Yeye mumane kubungambila, ngakamuambila muvua Yehowa mungambuluishe bua kupita ne nsombelu wa buena au uvua muntulukile. Wakangela tuasakidila.” Pashishe Doris wakambila Katherine ne: “Yehowa mmuenze nebe mudimu bua kungambuluisha. Dituku dia kumpala diuvua mulue kuanyi, mvua mbala Bible kukavua mêba a bungi.  Mvua ndila, ndomba Nzambi bua antumine muntu bua angambuluishe bua kumvua Bible. Pashishe wakakokola ku tshiibi tshianyi. Yehowa uvua muandamune disambila dianyi.” Binsonji biakuwula mu mêsu a Katherine pavuaye umuambila mêyi avua alenga au. Udi wamba ne: “Mêyi a Doris au avua diandamuna ku disambila dianyi. Yehowa uvua mundeje ne: mvua mukumbane bua kutungunuka ne kulonga nende Bible.”

Doris wakatambula mu 2010, ne lelu udi ulombola malonga a Bible a bungi. Katherine udi uleja ne: “Ndi ne dianyisha dia bungi bua mudi dijinga dimvua nadi mu matuku a bungi dia kuambuluisha muntu bua alue mutendeledi wa Yehowa dikumbane.” Lelu, Katherine udi wenza mudimu ne disanka bu mpanda-njila wa pa buende mu tshidiila tshia Kosrae tshia mu Mbuu wa Pacifike.

Bana betu bapite pa lukama ba mu matunga makuabu (ba bidimu kumbukila ku 19 too ne ku 79) mbayishe muaba udiku dijinga dinene mu Micronésie. Malu adi Erica, muanetu wa bakaji uvua muye mu Guam mu 2006 patshivuaye ne bidimu 19 wamba adi aleja mudi bana betu badi benza mudimu ne tshisumi aba badiumvua. Udi wamba ne: “Kuenza mudimu wa bumpanda-njila mu teritware mudi bantu ne nyota ya bulelela kudi kusankisha bikole. Ndi ne dianyisha dia bungi mudi Yehowa mungambuluishe bua kuenza mudimu wa bumpanda-njila eu. Eu ke njila mutambe buimpe mu nsombelu.” Lelu, Erica udi ne disanka bua kuikala mpanda-njila wa pa buende mu Ebeye tshimue tshia ku bidiila bia mu Marshall. Bushuwa, kuenza mudimu mu ditunga dienyi kudi ne yaku ntatu. Tukonkononayi isatu ya kudiyi ne tumone mudi aba bavua baye mu Micronésie bayitantamene.

Nsombelu. Panyima pa Simon mumane kufika mu tshidiila tshia Palau mu 2007 pavuaye ne bidimu 22, wakamona diakamue ne: makuta avuaye upeta avua mashadile bikole ku avuaye upeta mu ditunga diabu (dia Angleterre). Udi wamba ne: “Biakandomba bua kubenga kusumba tshionso tshimvua natshi dijinga. Mpindieu, ndi nsungula bimpe biakudia bia kusumba ne ntu nganji nyunguluka bua kumanya mishinga mimpe. Patu tshintu kampanda tshinyanguka, ntu nsumba tshitupa tshidi tshinyanguke ne nkeba muntu udi mua kungambuluisha bua kutshilongolola.” Mmunyi mudi kuikala ne nsombelu mupepele kumuambuluishe? Simon udi wamba ne: “Nkungambuluishe bua kumanya tshidi ne mushinga menemene mu nsombelu ne mundi mua kutshipeta ne makuta makese. Ndi mumone mudi tshianza tshia Yehowa tshingambuluishe misangu ya bungi. Mu bidimu 7 bindi muenze muaba eu, tshitu muanji kupangila tshiakudia ne muaba wa kulala to.” Bushuwa, Yehowa udi wambuluisha bonso badi ne nsombelu mupepele bualu mbasue kukeba tshia kumpala Bukalenge.​—Mat. 6:32, 33.

Disamina kuetu muoyo. Erica udi wamba ne: “Ndi mulamatangane bikole ne dîku dietu, ne mvua ndiebeja bikala disamina kuetu muoyo mua kunyanga mudimu wanyi.” Wakenza tshinyi bua kudilongolola? Udi wamba ne: “Kumpala kua kuya, ngakabala biena-bualu bia mu Tshibumba tshia Nsentedi bivua biakula bua disamina kuetu muoyo. Ebi biakalongolola muoyo wanyi bua kutantamena lutatu elu. Mu tshiena-bualu kampanda, mamu mukuabu wakajadikila muanende wa bakaji  bua mudi Yehowa ututabalela wamba ne: ‘Yehowa udi mua kukukumbajila majinga ebe bimpe kupita mundi meme mua kuenza.’ Bualu ebu buakankolesha bikole.” Hannah ne bayende Patrick badi benza mudimu mu Majuro, tshimue tshia ku bidiila bia Marshall. Hannah wakatantamena disamina kuabu muoyo pavuaye mutume lungenyi luende kudi bena Kristo nende ba mu tshisumbu tshiabu. Udi wamba ne: “Ntu ngela Yehowa tuasakidila misangu yonso bua tshisumbu tshia bana betu ba pa buloba bujima bualu badi pabu bena mu dîku dianyi. Bu bobu kabayi bangambuluishe, tshivua mua kuenza mudimu muaba uvuabu dijinga dikole ne bamanyishi to.”

Kuibidilangana ne bantu. Simon udi wamba ne: “Paudi ufika mu ditunga dienyi, malu onso adi anu mashilangane ne a muenu. Imue misangu ntu mpanga mua kuela bilele, ne bantu kabatu bangumvua bimpe to.” Erica udi wamba ne: “Ku ntuadijilu, mvua ndimona bu mulengulula, kadi ebi biakangambuluisha bua kukonkonona tshivua tshinsake bua kuya muaba eu. Mvua muye bua kuenzela Yehowa mudimu bikole kadi ki mbua kudikebela nsombelu muimpe to.” Udi usakidila ne: “Mu bungi bua matuku, ngakapeta balunda bimpe bandi munange.” Simon wakadienzeja bikole bua kulonga tshiena Palau tshivua tshimuambuluishe bua ‘kukangula muoyo wende bikole’ kudi bena Kristo nende ba muaba au. (2 Kol. 6:13) Mushindu wakadienzejaye bua kulonga muakulu au wakenza bua bena Kristo abu bamunange. Eyowa, padi benyi ne bena Kristo ba muaba au benza mudimu pamue, badi badia bulunda bukole mu tshisumbu. Mmasanka kayi makuabu adi aba badi badifile ne muoyo mujima bua kuya muaba udiku dijinga dinene bapete?

Mupostolo Paulo wakamba ne: “Muntu udi ukuna bia bungi, neapole bintu bia bungi.” (2 Kol. 9:6) Lungenyi ludi mu mvese eu ludi bushuwa lutangila aba badi bavudija mudimu wabu wa diyisha. Mmamuma kayi adibu ‘bapola a bungi’ mu Micronésie?

Mu Micronésie, kutshidi mpunga ya bungi ya kutuadija malonga a Bible ne kumona mudi aba badi balonga ne batumikila bulelela bua mu Dîyi dia Nzambi baya kumpala mu nyuma. Patrick ne Hannah bavua kabidi bayishe mu Angaur, katshidiila kakese kadi ne bantu 320. Panyima pa bobu bamane kuyishamu ngondo ibidi, bakapetangana ne mamu kampanda uvua udikoleshila bana. Wakitaba bua kulonga Bible diakamue, kuitaba bulelela ne muoyo mujima ne kushintululaye malu a bungi mu nsombelu wende. Hannah udi wamba ne: “Panyima pa dilonga dionso, patukavua tumbuka kuende ku makalu etu, tuvua tutangilangana ne tuamba ne: ‘Yehowa tuasakidila.’” Hannah udi usakidila ne: “Ndi mumanye ne: Yehowa uvua mua kukoka mamu eu kudiye mu mushindu kampanda peshi kansanga, kadi bu mutudi balue kuenza mudimu muaba udiku dijinga dinene, mbituambuluishe bua kupeta mukoko eu ne kuwambuluisha bua kumanya Yehowa. Edi ndimue dia ku masanka manene atudi bapete mu nsombelu wetu mujima.” Erica udi wamba ne: “Paudi wambuluisha muntu bua kumanya Yehowa, udi upeta disanka kadiyi kuamba.”

Mu matunga a bungi, kudi dijinga dinene dia bamanyishi ba Bukalenge. Anu bu bantu bakuabu, udiku pebe mua kuya muaba udiku dijinga dinene anyi? Sambila Yehowa bua ukoleshe dijinga diebe dia kuvudija mudimu webe wa diyisha. Yukila ne bakulu ba mu tshisumbu, ne mutangidi wa tshijengu peshi ne aba bavua bapete diakalenge dia kuya mu ditunga divuabu dijinga ne bamanyishi. Paudi utuadija kulongolola malu, fundila Betele udi utangila muaba uudi ukeba kuya kuenza mudimu ne keba bua kumanya malu a bungi bua muaba au. * Pamuapa wewe pebe udi mua kudisangisha ne bena Kristo binunu bia bungi bakulumpe ne bansonga, bajike ne basele badi badifile ne muoyo mujima ne balabule disanka dia ‘kupola bintu bia bungi.’