KA LUWORE gi Injili mar Mathayo, “Yesu nodonjo e hekalu mi noriembo ji duto ma ne uso kod ma ne ng’iepo ei hekalu ma ogologi oko, mi noloko mese mag jowil pesa ataro kod kombe joma ne uso akuche. Mi nowachonegi kama: ‘Ondik ni, “Oda ibiro luong ni od lamo,” to un uloke rogo mar jomecho.’”—Mat. 21:12, 13.

Weche ma nondik chon mag Jo-Yahudi nyiso ni joma ne timo ohala e hekalu ne uso jamni e nengo ma malo ahinya. Kuom ranyisi, Mishnah (Keritot 1:7) wacho ni e kinde Jokristo mokwongo, nengo akuche ariyo ma ne igologo misango ne oidho mochopo dinari achiel mar dhahabu. Mano ne romre gi osara ma nichulo ng’at ma ok olony e tich bang’ tiyo kuom ndalo 25. Kata obedo ni joma odhier ne nyalo golo akuche kaka misango, bechgi ne oidho ma koro ne ok ginyal nyiewogi. (Lawi 1:14; 5:7; 12:6-8) Japuonj chik mar Jo-Yahudi moro ma niluongo ni Simeon ben Gamaliel iye nowang’ ahinya gi timno mi nogolo chik mondo odwok chien kwan mar misengini ma ne igolo e hekalu. Mano nomiyo nengo mar akuche ariyo odok chien nyadi mia achiel kopim gi nengo ma ne iusogigo motelo.

Kaluwore gi weche ma wanenogo, Yesu ne ni kare luongo jolok ohalago ni “jomecho” nikech ich lach margi ne miyo giuso gik moko e nengo ma malo.