1. En siem mane ma jaote Paulo nomiyo Jokristo mowal?

JAOTE PAULO nosiemo Jokristo mokwongo kama: “Weuru luwo kit ngima mar joma odak e ndaloni.” (Rumi 12:2) Ang’o momiyo nochiwo siem mager kamano ne chwo gi mon ma nosechiwore ne Nyasaye kendo ma nosewal gi roho maler?​—Rumi 1:7.

2-3. Satan nyalo tiyo gi yore mage mondo otem golowa kuom Jehova, to ere kaka wanyalo muko “gik mogurore motegno” e pachwa?

² Gima ne chando Paulo en ni Jokristo moko nosechako bedo gi paro maricho kendo luwo puonj mag dhano ma Satan e ma ne chwalo. (Efe. 4:17-19) Gima kamano nyalo timore ne ng’ato ang’ata kuomwa. Satan ma e nyasach pinyni tiyo gi yore mopogore opogore mondo otem golowago kuom Jehova Nyasaye. Kuom ranyisi, ka po ni wagomboga bedo gi huma kata bedo joma idewo e wang’ pinyni, obiro tiyo gi thuolono mondo ogolwa kuom Jehova. Onyalo kata tiyo gi yo ma ne wapon-go, kit ogandawa, kata sombwa e chochowa mondo warwak pache.

³ Be nyalore mondo wamuk “gik mogurore motegno” e pachwa? (2 Kor. 10:4) Weche ma Paulo nondiko miyowa dwoko mar penjono. Nondiko niya: “Wamuko paro ma ji nigo kod gik moko duto ma kedo gi ng’eyo mar Nyasaye; kendo waketo paro duto e tuech ka wamiyo giluwo kaka Kristo chiko.” (2 Kor. 10:5) Ee, Jehova nyalo konyowa muko paro maricho ma wanyalo bedogo. Mana kaka yath nyalo tieko sum e dendwa, e kaka Wach Nyasaye bende  nyalo tieko paro maricho ma piny Satan nyaloga rwako kuomwa.

4. Gin lokruoge mage ma thothwa notimo ka ne wayie puonjore adiera?

⁴ Par ane lokruoge ma nitimo e ngimani ka ne iyie puonjori adiera ma ni e Wach Nyasaye mi iyiero tiyo ne Jehova. Thothwa ne nyaka we timbe moko maricho. (1 Kor. 6:9-11) Wamor ahinya ni Jehova nokonyowa mondo wawere gi timbe marichogo.

5. Ka luwore gi Jo-Rumi 12:2, gin gik mage ariyo monego watim?

⁵ Ok onego wapar kata matin ni wan maber ma onge lokruok moro amora ma pod onego watim. Kata obedo ni ne waseweyo timo richo madongo ma ne watimoga ka ne pok obatiswa, pod dwarore ni wadhi nyime tang’ gi gimoro amora ma nyalo dwokowa e richogo. Ere kaka wanyalo timo mano? Jaote Paulo miyowa dwoko kowacho kama: “Weuru luwo kit ngima mar joma odak e ndaloni, to lokreuru kuom miyo pachu obed manyien.” (Rumi 12:2) Mano nyiso ni nitie gik moko ariyo monego watim. Mokwongo, dwarore ni ‘wawe luwo kit ngima mar joma odak e ndaloni.’ Mar ariyo, dwarore ni ‘walok pachwa obed manyien.’

6. Weche Yesu ma ni e Mathayo 12:43-45 oting’o puonj mane maduong’?

⁶ Lokruok ma Paulo ne wuoye ok en mana loko kaka wanenore gi oko. En lokruok ma mulo kit ngimawa te. (Ne sanduk ma wiye wacho ni, “Lokruok Koso Wuondruok?”) En lokruok ma dwaro ni walok kitwa, pachwa, gombowa, kod timbewa chuth. Omiyo, waduto wanyalo penjore kama: ‘Lokruok ma adhi nyime timo kaka Jakristo gin lokruok ma nenore mana gi oko, koso gin lokruok ma mulo nyaka kita, pacha, gomboga, kod  timbena?’ Weche Yesu ma ni e Mathayo 12:43-45 oting’o puonj moro maduong’. (Som.) Puonjno en ma: Rucho gik maricho e pachwa kende ok oromo; dwarore ni wapong’ bugo modong’ gi gik ma Nyasaye oyiego.

7. Ere kaka wanyalo loko pachwa kod chunywa ma iye?

⁷ Be nyalore mondo walok pachwa kod chunywa ma iye? Wach Nyasaye dwoko kama: “Onego udhi nyime ka udoko manyien e paro ma chikou, kendo onego urwak kit dhano manyien ma ne ochue kuom dwaro mar Nyasaye ka luwore gi tim makare madier kod makruok motegno.” (Efe. 4:23, 24) Mano nyiso ni en gima nyalore, kata kamano, ok oyot. Thiro gombo maricho kata weyo timbe maricho kende ok oromo. Dwarore ni walok ‘paro ma chikowa.’ Mano oriwo loko gombowa, timbewa, kod paro ma chwalowa mondo watim gigo. Mano en lweny ma dhi nyime.

8-9. Gik ma notimore ne owadwa moro nyiso nade gimomiyo dwarore ni walok pachwa kod chunywa ma iye?

⁸ Wane ane ranyisi mar owadwa moro ma noheroga goyo ji ahinya ka ne pok orwako adiera. Ka nosetimo kinda moweyo metho kod goyo ji, nobatise, kendo mano nochiwo neno ahinya e gweng’ ma nodakie. Kata kamano, kinde machuok bang’ batisone, nitie chieng’ ma noromo gi tem moro godhiambo. Ng’at moro momer nodhi e ode mi okwinye mondo gigore. Owadwano nokwongo otemo matek ahinya mondo kik oyaw lweny gi jakong’ono. To ka nochopo kama koro ng’atno nochako wuoyo marach kuom nying Jehova, i owadwano nowang’ nyaka tung’. Nomwomore kuom ng’atno mi ogoye. Ang’o momiyo owadwano notimo gima kamano? Kata obedo ni puonjruok Muma nosekonye mi othiro timne mar goyo ji, paro ma chike to ne pok olokore, tiende ni, pok noloko kite ma iye.

⁹ Kata kamano, owadwano chunye ne ok ool gi dhi nyime timo lokruok. (Nge. 24:16) Jodongo nokonye mi odhi nyime timo dongruok e nyawoneno. Nodhi maber ma higni moko bang’e obedo jaduong’-kanyakla. E odhiambo moro machielo ka ne en e Od Romo, noyudo tem ma dwa chal achala gi mokwongocha. Noneno ka jakong’o moro ne dwaro goyo achiel kuom jodong-kanyakla. Owadwano nokawo okang’ mane? Nowuoyo gi jakong’ono e yo ma muol mi okueyo weche, kae to okowo jakong’ono nyaka ot. Ang’o momiyo owadwano ne ok ogoyo jakong’ono? Noseloko paro ma chike. E chunye ma iye, noselokore mi obedo ng’at mohero kue kendo mobolore, to mano nokelo ne Jehova pak.

10. Timo lokruok dwaro ang’o?

¹⁰ Timo lokruok en gima dwaro kinde kod kinda. Nyalo dwarore ni ‘watim kinda’ kuom higni mang’eny. (2 Pet. 1:5) Bedo e adiera kuom higni mang’eny kende ok oromo. Dwarore ni watim duto ma wanyalo mondo walok pachwa kod chunywa ma iye. Nitie gik ma ka watimo to nyalo konyowa. We wanon ane moko kuomgi.

11. Ere kaka lamo nyalo konyowa loko paro ma chikowa?

¹¹ Mokwongo, onego walem. Dwarore ni walem kaka jandik-zaburi moro ma  nolamo niya: ‘Chue chuny maler e iya, yaye Nyasaye, kendo los chuny motegno mosiko koluori [mondo] iket e iya.’ (Zab. 51:10, Luo New Testament, 2003) Nyaka wakwong wayie ni dwarore ni walok paro ma chikowa, kae to wakwa Jehova mondo okonywa timo kamano. Ere kaka wanyalo bedo gadier ni Jehova biro konyowa timo lokruok? Gima Jehova nosingo ni nodhi timo ne Jo-Israel ma ne wigi tek e ndalo Ezekiel nyalo jiwowa. Nowacho niya: “Anamigi chuny achiel, anaket chuny manyien e chunyu; kendo . . . anamigi chuny mayom mar dhano maber [tiende ni chuny moikore luwo kaka Nyasaye taye].” (Eze. 11:19) Jehova noikore konyo Jo-Israelgo mondo gitim lokruok, kendo wan be oikore timonwa kamano.

12-13. (a) Ka luwore gi Zaburi 119:59, onego wapar matut kuom ang’o? (b) Gin penjo mage monego ipenjri?

¹² Mar ariyo, dwarore ni wapar matut. Sama wasomo Wach Nyasaye pile ka pile, dwarore ni wakaw thuolo mar paro matut mondo wafweny kuonde ma wanyalo timoe lokruok e chunywa kod pachwa. (Som Zaburi 119:59; Hib. 4:12; Jak. 1:25) Nyaka wafweny paro moko mag jopiny ma nyalo bedo ni osedonjo kuomwa kata wasechako gombo. Dwarore ni wayie ni wan gi nyawo moko, kendo watem matek mondo waked gi nyawogo.

¹³ Kuom ranyisi, inyalo penjori kama: ‘Be dibed ni pod an gi ich-lit moko modong’ e chunya kata mana matin?’ (1 Pet. 2:1) ‘Be dibed ni an gi sunga e chunya kendo aneno ni aloyo jowetena nikech kuma naponie, somba, kata pesa ma an-go?’ (Nge. 16:5) ‘Be dibed ni achayo joma nigi gik manok kopim gi meka kata joma pien dendgi opogore gi mara?’ (Jak. 2:2-4) ‘Be awinjo ka chunya gombo gik mijiwo ahinya e piny Satanni?’ (1 Joh. 2:15-17) ‘Be dibed ni yorega mag manyo mor, kaka sinembe ma aneno, thumbe ma awinjo, kod tuke ma atugo opong’ gi weche nindruok kod timbe gero?’ (Zab. 97:10; 101:3; Amos 5:15) Dwoko ma ichiwo e wi penjogo nyalo konyi ng’eyo kuonde monego itimie lokruok. Ka watemo matek mondo wamuk gik mogurore motegno e pachwa, wabiro moro Wuonwa ma ni e polo.​—Zab. 19:14.

14. Ang’o momiyo onego wayier osiepe mabeyo?

¹⁴ Mar adek, onego wayier osiepe mabeyo. Osiepewa chiko ahinya gik ma watimo, bed ni wang’eyo kata wakia. (Nge. 13:20) Thoth joma wasomogo kata ma watiyogo gin joma ok nyal konyowa bedo gi paro kaka mar Jehova. Chokruogewa mag Jokristo to opong’ gi osiepe mabeyo. Kanyo e kama inyalo jiwwae mondo wabed gi “hera kod timbe mabeyo.”​—Hib. 10:24, 25.

15-16. Ere kaka Satan temo chocho pachwa?

¹⁵ Par ni Satan dwaro ahinya ni olok pachwa. Otiyo gi puonj maricho mopogore opogore mondo otem chochogo adiera ma wasepuonjore e Wach Nyasaye.

¹⁶ Satan osebedo ka dhi nyime penjo mana penjo achiel achiel ma nopenjo Hawa e puodho mar Eden niya: “Be en adier ni Nyasaye nowacho . . . ?” (Cha. 3:1, NW) E piny ma Satan tayoni, yot ahinya winjo ka ji penjo penjo kaka: ‘Be en adier ni Nyasaye ok oyie gi kend e kind chwo gi chwo kata mon gi mon? Be en adier ni Nyasaye ok dwar ni icham Krismas kendo kik itim nyasi mag paro odiechieng’ nyuol? Be en adier ni Nyasaye dwaro ni kik medi remo? Be en adier ni Nyasaye ma  jahera dwaro ni kik itudri gi wedeni mogol e kanyakla?’

17. Ang’o ma wanyalo timo ka po ni wan gi penjo moko e chunywa e wi gik ma wayiego, to timo mano nyalo kelonwa ber mane kaka onyis e Jo-Kolosai 2:6, 7?

¹⁷ Dwarore ni wabed gadier chuth ni puonj ma wayiego e ma nyalo konyowa. Ka wasiko wapenjore penjo moko e chunywa to ok wamany dwokogi, penjogo nyalo miyo wachak bedo gi kiawa ka be gik ma wayiego gin adier. Mosmos, kiawa ma wan-gogo nyalo chocho yo ma wanenogo gik moko kendo ketho yiewa. Kare ang’o monego watim? Wach Nyasaye nyisowa ni walok pachwa mondo wang’e gadier “dwaro maber mar Nyasaye, dwaro mowinjore, kendo malong’o chuth e wang’e.” (Rumi 12:2) Ka wapuonjore Wach Nyasaye e yo matut kendo nyading’eny, wabiro bedo gadier gi weche ma wapuonjore. Wabiro bedo gadier chuth ni yore Jehova e ma ni kare. Gikone, wabiro bedo kaka yath ma tiendene ogurore motegno kendo wabiro “chung’ motegno e yie.”​—Som Jo-Kolosai 2:6, 7.

18. En ang’o ma biro konyowa golo sum marach ma piny Satan temo keto kuomwa?

¹⁸ Onge ng’ato ang’ata ma nyalo losonwa yiewa ma bed motegno; wan wawegi e ma nyaka watim kamano. Omiyo, dhi nyime timo kinda mondo paro ma chiki obed manyien. Lem kinde duto, kendo ikwa Jehova mondo omiyi rohone maler. Par matut kuom gik mipuonjori, kendo imed nono kuonde minyalo timoe lokruok e pachi kod chunyi. Yier osiepe mabeyo, kendo ibed machiegni gi joma nyalo konyi timo lokruok mondo ibed gi paro kaka mar Jehova. Kitimo kamano, ibiro golo sum marach ma piny Satanni temo mondo oket kuomi, kendo ibiro muko “paro ma ji nigo kod gik moko duto ma kedo gi ng’eyo mar Nyasaye.”​—2 Kor. 10:5.