Muma en buk makende ahinya. Oting’o puonj moa kuom Jachuechwa. (2 Timotheo 3:16) Weche manie iye nyalo konyowa e okang’ malach. Muma owuon wacho niya: “Wach Nyasaye ngima kendo en gi teko ma tiyo.” (Jo-Hibrania 4:12) Muma nyalo konyowa e yore moko ariyo. Onyalo tayowa e ngimawa mapile kendo onyalo konyowa ng’eyo Nyasaye e yo maber kaachiel gi gik mosingonwa.—1 Timotheo 4:8; Jakobo 4:8.

Muma nyalo tayowa e ngimawa ma pile. Muma chiwonwa puonj mabeyo ma wanyalo tiyogo e yore mopogore opogore. Puonjgo oriwo kaka:

•   Wanyalo tudore gi jomamoko.—Jo-Efeso 4:31, 32; 5:22, 25, 28, 33.

• Wanyalo bedo gi ngima ma onge gi tuoche mang’eny.—Zaburi 37:8; Ngeche 17:22.

• Wanyalo bedo gi timbe mabeyo.—1 Jo-Korintho 6:9, 10.

• Wanyalo nyagore gi pek mag yuto.—Ngeche 10:4; 28:19; Jo-Efeso 4:28. *

Dichwo moro gi jaode e piny Asia ne mor ahinya gi puonj mabeyo manie Muma. Mana kaka joma pod nyien e kend, gin bende nyaka ne gitem matek mondo ging’ere maber kendo ng’eyo kaka ne ginyalo wuoyo maber e kindgi. Ne gichako tiyo gi weche ma ne gisomo e Muma. Ne giyudo ber mane? Vicent wacho kama: “Gik ma nasomo e Muma nokonya ng’eyo kaka anyalo nyagora maber gi chandruoge mantie e kend marwa. Tiyo gi puonj manie Muma osemiyo wadak maber.” Chiege ma Annalou, wacho kama: “Somo ranyisi mag jotich Nyasaye manie Muma osekonyowa ahinya. Sani wadak gi kuwe kendo nitie gik ma wachano timo e ngimawa.”

Ng’eyo Nyasaye. Mopogore gi weche ma Vicent owacho e wi kend margi, omedo wacho kama: “Somo Muma osemiyo awinjo ni an machiegni gi Jehova moloyo kinde moro amora.” Weche ma Vicent nowacho nyiso maler ni Muma nyalo konyowa ng’eyo Nyasaye. Ka isomo Muma ibiro yudo puonj mabeyo kendo ibiro bedo osiep Nyasaye. Ibiro fwenyo ni nitie kinde ma ngima biro bedo maber kendo wabiro dak nyaka chieng’. (1 Timotheo 6:19) Onge buk moro amora ma nyalo miyowa singo machal gi mano.

Ka isomo Muma kendo itiyo gi weche manie iye, in bende ibiro yudo ber. Ibiro ng’eyo Nyasaye kendo ngimani biro bedo maber. Kata kamano, sama isomo Muma inyalo bedo gi penjo mang’eny. Kapo ni ibedo gi penjo moro amora, nyalo bedo maber kiparo ranyisi mar Ja-Ethiopia ma ne odak higni 2,000 mosekalo. Ne en gi penjo mang’eny e wi Muma. Ka ne openje kabe ne owinjo tiend weche ma ne osomo e Muma, ne odwoko kama: “Kuom adier, ere kaka dawinj tiendgi ka ok ng’ato olerona?” * Ne oyie mondo Filipo okonye nimar Filipo nolony gi puonj mag Muma kendo ne en achiel kuom jopuonjre Yesu. (Tich Joote 8:30, 31, 34) Ka diher puonjori weche mang’eny e wi Muma, tem ahinya mondo ior kwayo mari e websait marwa mar www.mt711.com/luo kata inyalo oro kwayo kitiyo gi achiel kuom adrese ma yudore e gasedni. Bende, inyalo tudori gi Joneno mag Jehova manie alworau kata inyalo dhi e Od Romo man machiegni kodi. Donge inyalo chako somo Muma kawuono mondo otayi e ngimani?