Ondiek ma nigi wiye abiriyo ma Fweny 13:1 wuoye ochung’ ne weche siasa e piny mangima.

• En gi teko, gi kom-loch, kod loch maduong’, to mano nyiso gimomiyo ochung’ ne siasa e piny.​​—Fweny 13:2.

• Kendo olocho “e wi dhoudi duto, gi ji mopogore opogore duto, gi dhok duto, kod ogendni duto,” omiyo en teko gi moloyo sirkal achiel.​​—Fweny 13:7.

• En gi kido mag ondiegi ang’wen ma iwuoyo kuomgi e Daniel 7:​2-8, moriwo kido mar kwach, tiende chal gi tiend dubu, dhoge chal gi dho simba, kendo en gi tunge apar. Ondiegi miwuoyo kuomgi e bug Daniel iwuoyo kuomgi kaka ruodhi, kata pinje ruodhi. Moro ka moro kuom pinje ruodhigo locho bang’ nyawadgi. (Daniel 7:​17, 23) Omiyo, ondiek ma iwuoyo kuome e Fweny sula 13 ochung’ne riwruok mar siasa e piny mangima.

• Oidho ‘ka owuok ei nam,’ mano tiende ni, oganda mar dhano ema loso sirkande ma dhano lochoe.​​—Fweny 13:1; Isaiah 17:​12, 13.

• Muma wacho ni namba, kata nying ondiek mar 666 en “namba mar dhano.” (Fweny 13:​17, 18) Nyingno nyiso ni ondiek ma iwuoyo kuome e Fweny 13 en dhano to ok roho moro kata jachien.

Kata obedo ni piny nyalo winjore e weche moko, gitimo kamano mondo girit lojegi to ok ni mondo gibolre e bwo loch mar Pinyruodh Nyasaye. (Zaburi 2:2) Bende gibiro riwore mondo giked gi Yesu kod jolweny mage e lweny mar ­Har–​Magedon, to mano e lweny ma ibiro tiekgie.​​—Fweny 16:​14, 16; 19:​19, 20.

“Tunge apar gi wiye abiriyo”

E Muma, nembni moko otigo e yor ranyisi. Kuom ranyisi, namba apar kod namba abiriyo ochung’ ne gima oromo chuth. Mondo wawinj tiend “tunge apar gi wiye abiriyo” mar ondiek moler e Fweny sula 13, dwarore ni mondo wang’e ‘kido mar ondiek’ miwuoyoe e Fweny ma en ondiek ma kwar ma rieny ma nigi wiye abiriyo gi tunge apar. (Fweny 13:​1, 14, 15; 17:3) Muma wacho ni wiye abiriyo mag ondiek ma kwar ochung’ne “ruodhi abiriyo,” kata sirkande mag dhano.​​—Fweny 17:​9, 10.

E yo machalo kamano, ondiek ma nigi wiye abiriyo ma iwuoyo kuome e Fweny 13:1 ochung’ne sirkande abiriyo: Magi gin sirkande ma nigi teko e piny mangima kendo ma osebedo ka sando jotich Nyasaye. Sirkandegi gin Misri, Assiria, Babilon, Medo-Persia, Grik, Rumi, kod Anglo-America. Ka tunge apar ochung’ ne loje duto mag dhano bed ni gin matindo kata madongo, mano nyiso ni osimbo manie tungego gin loje mag siasa malocho e pinjegi giwegi.