Jehova atwĩraga menya tũgĩta “mantu ja kwairania kinya ri.” (Malaki 2:16) Kaingĩ, bũbũ nĩ ũntũ bwa gĩtũmi mũranũne, nĩũntũ gũkethĩrwa kũrĩ na waayia, gũtĩthĩrwa na gwĩtĩkania. Na kenda wendo bũkũra, gwĩtĩkania nĩ kwa bata.

Naarua, gwĩtĩkania mũranũne kũrĩ ũgwatine. Kenda ũkaria mũranũ jwaku, no mwanka wiritanĩrie kũthithia mantũ jaĩrĩ.

ŨRĨA BIBIRIA YUUGAGA: ‘Thuura jaria meega ukithuurania mantu.’ (Afilipi 1:10) Mũranũ jwaku nĩ ũntũ bũmwe bwa mantũ ja gĩtũmi nkũrũki ũtũũrone. Nĩjũkũbatara kweewa kaanya ka mbere.

Jehova endaga ũthũgaanĩrie ũrĩa bũgũreene nawe na ‘bugwirirue’ ũtũũro bũrĩ amwe. (Mutumiiria 9:9) Naugaga atĩkwitha atĩ, ũtĩbuĩri gũtiga mũkũrũ kana mwekũrũ waaku, ĩndĩ, ũbuĩri gũcwaa njĩra cia gũtũma o ũmwe weenu agwĩrua. (1 Akorintho 10:24) Tũma ũrĩa bũgũreene nawe aigue atĩ nũkũmũbatara na nũmwendeete.

ŨRĨA ŨŨMBA KŨTHITHIA:

• Geria kwona atĩ kaingĩ nũgũtumĩra ĩgiita amwe na ũrĩa bũgũreene nawe, ũtĩkũrekeeria mantũ jangĩ jakwaangaratania

• Tumagĩra biugo ta, “batwĩ” antũ a “ũũni”

ŨRĨA BIBIRIA YUUGAGA: “O muntu uria ukaraithiiria muka na kumwiririiria, o riu nakuthithia uthungiiri nawe nkorone yawe.” (Mathayo 5:28) Kethĩra muntũ agakara akĩthũgaanagĩria mantũ jamathũũku, na njĩra ĩu, akeethĩrwa atĩ mwĩtĩkĩkua kĩrĩ ũrĩa bagũreene nawe.

Jehova augaga nũkũbatara ‘kumenyeera nkoro yaku.’ (Njuno 4:23; Jeremia 17:9) Kũthithia ũu, no mwanka ũmenyeere meetho jaaku. (Mathayo 5:29, 30) Thingata ngerekano ya Ayubu, ũrĩa wekĩre wĩrane na meetho jaawe atĩ, atĩkororaithĩĩria mũka ũngĩ amwirirĩĩria. (Ayubu 31:1) Tua buru ũtĩkorotega ponografia. Na ũciebanie buru gũkucĩĩrua kĩwendo nĩ ũngĩ ũtĩ mũkũrũ kana mwekũrũ waaku.

ŨRĨA ŨŨMBA KŨTHITHIA:

• Onia bangĩ ũtĩkwitha atĩ gwe nwiritanĩrĩtie buru kĩrĩ ũrĩa bũgũreene nawe

• Thũgaanĩria ũrĩa ũngĩ akwigua, na ũtige o rĩo ngwatanĩro ĩrĩa yũũmba gũtũma ũrĩa bũgũreene nawe aigua atĩng’anĩri