1-2. Dahaka dainai laḡani ta ta iboudiai Memorial ta laomu?

 KAHIRAKAHIRA laḡani 2,000 vada e ore, Iesu ese ena mauri e heni ita daidai, unu amo dala e kehoa ita ese mauri hanaihanai baita abia. Iesu do se mase hanuaboina ai, ena hahediba e haḡanidia anibou ta bae karaia bona parao bona wain bae ḡaukaralai, unu amo iena lalokau karana bae laloatao.​—1 Kor. 11:23-26.

² Ita ese Iesu ena haheḡani na ta badinaiamu, badina ia ta lalokau henia badamu. (Ioa. 14:15) Laḡani ta ta ena Memorial negana lalonai, ita na nega ta atomu Iesu ena mase anina ta laloa dobumu bona ta ḡuriḡurimu, unu amo eda tenkiu karana ta hahedinaraiamu. Danu, mai moaleda ida eda hesiai ḡaukara ta habadaiamu, bona momo ta vavediamu una mai anina bada hebouna baema. Oibe, laloda baita hadai Memorial baitala bona ḡau ta ese basine kouda na namo.

3. Ina atikol ai dahaka baita herevalaimu?

³ Ina atikol ai, Iehova ena taunimanima na Iesu ena mase bae laloatao totona e badinamu daladia toi baita herevalaimu:  (1) Iesu ese Memorial e karaia dalana e badinaiamu, (2) ma haida e vavediamu Memorial baema, bona (3) Memorial e karaiamu ena be hekwakwanai e varamu.

4. Laḡani ta ta Memorial ai, ededia henanadai e haerelaimu, bona dahaka dainai baita lalodia bada? (Luka 22:19, 20)

⁴ Laḡani ta ta iboudiai Memorial ai, tok ta amo henanadai haida na Baibul amo e haerelaimu. Heḡereḡere, dahaka dainai taunimanima ediai Iesu ena mauri idavalaina boubouna na mai anina bada? Edena dala ai tau tamona ena mase ese hutuma edia dika davana e karaia? Parao bona wain anidia be dahaka? Bona daidia ese parao bae ania bona wain bae inua? (Luka 22:19, 20 ba duahidia.) Danu tanobada helarona bae abia taudia ese bae abi hahenamodia ta lalodia dobumu. (Isa. 35:5, 6; 65:17, 21-23) Unu hereva momokanidia na baita lalodia bada. Taunimanima momo ese na asie lalopararalaimu, bona Iesu ena boubou ḡauna na asie laloa badamu. Danu, idia ese Iesu ena Memorial na ia ese e karaia dalana heḡereḡerena ai asie karaiamu. Dahaka dainai?

5. Aposetolo taudia momo e mase murinai, taunimanima ese Iesu ena mase be ede e laloatao toma?

⁵ Iesu ena aposetolo taudia momo e mase murinai, Kristen koikoidia na kongrigeisin lalonai e vareai. (Mat. 13:24-27, 37-39) Idia na ‘hereva gageva-gagevadia e gwaurai, kamonai taudia e hakaudia kerere.’ (Apos. 20:29, 30) Idia ese Baibul ena hereva, Iesu na “nega tamona boubou ḡauna” e heni, na e hagagevaia, eto Iesu tauanina na e bouboulaia loulou. (Heb. 9:27, 28) Hari ina negai, taunimanima momo ese una hahediba koikoina na e abia daemu. Idia na wiki ta ta eiava nega haida dina ta ta ai dubu e laomu Iesu ena boubou bae laloatao totona, una na e gwauraiamu “Mass Boubouna.” b Dubu oreadia ma haida be nega ta ta ai mo Iesu ena mase e laloataomu, to edia memba taudia momo ese Iesu ena boubou ḡauna anina na asie lalopararalaia namonamomu. Reana haida na e henanadaimu, ‘Iesu ena mase ese egu dika baine gwautao diba, a?’ Dahaka dainai unu e henanadai tomamu? Badina nega haida, taunimanima edia hereva ese e hadaradaradiamu, e gwaumu Iesu ena boubou ḡauna ese dika na basine gwautao diba. Edena dalai Iesu e badinaia momokani taudia ese una na e hamaoromaoroa?

6. Laḡani 1872 ai, Bible student oreana be dahaka e lalopararalaia?

⁶ Laḡani 1870 ai, Charles Taze Russell bona ia ese e gunalaia Bible student oreana ese Baibul e stadilaia namonamo. Idia na e urava Iesu ena boubou ḡauna anina korikorina bona ena mase ilalotaona dalana bae diba. Laḡani 1872 ai, e laloparara Iesu na taunimanima iboudiai daidiai ena mauri e heni. E lalopararalai ḡaudia na se hunidia, to buka, niuspepa, bona magasin amo e halasidia. Se daudau, idia na Kristen ginigunadia heḡereḡeredia, Memorial na laḡani ta lalonai nega tamona mo e karaiava.

7. Edena dala ai Bible student ese e hetahulai ḡaudia amo namo ta davarimu?

⁷ Unu Kristen tataudia ese laḡani momo lalodiai e hetahulai ḡaudia amo ita na namo ta davarimu. Edena dala ai? Iehova ena heduru dainai, Iesu ena boubou ḡauna anina bona baine haḡuḡuru ḡaudia ta lalopararalaimu. (1 Ioa. 2:1, 2) Danu ta dibamu, Baibul ese Dirava e hamoalemu taudia edia  helaro rua e herevalai: Ginigunana be haida na guba ai basie mase diba maurina bae abia, bona iharuana be milion momo na tanobada ai mauri hanaihanai bae abia. Iehova ese e lalokau henidamu bona Iesu ena boubou ḡauna ese ita ta ta e durudamu dalana ta laloamu neganai, Iehova turana ai ta laomu. (1 Pet. 3:18; 1 Ioa. 4:9) Una dainai idaunegai abidadama tadikakadia heḡereḡeredia, ita ese ma haida baita vavedia ita ida Memorial na Iesu ese e karaia dalana heḡereḡerena baita karaia.

8. Iehova ena taunimanima be dahaka e kara haida e vavedia Memorial baela totona? (Laulau ba itaia.)

⁸ Laḡani momo lalodiai, Iehova ena taunimanima na ma haida e vavediamu Memorial baema totona. Laḡani 1881 ai, United States ai tadikaka taihu na e hagoadadia tadikaka ta ena ruma ai Memorial hebouna bae abia, una na Allegheny, Pennsylvania ai. Gabeai, kongrigeisin ta ta na Memorial hebouna e karaiava. March 1940 ai, pablisa na e hagoadadia edia teritori ai kamonai taudia bae vavedia diba. Laḡani 1960 ai, nega ginigunana Betele ese e invateisin pepadia na kongrigeisin e siai henidia. Una nega amo, Memorial invateisin bilion momo e hariharilaidia. Dahaka dainai eda nega bona goada ta henimu ma haida ta vavediamu?

9-10. Memorial ai haida ivavedia ḡaukarana amo daidia be namo be davarimu? (Ioane 3:16)

⁹ Memorial totona haida ta vavediamu badina ta na, ta uramu nega ginigunana baema taudia na Iehova bona Iesu ese taunimanima daidiai e kara ḡaudia bae dibadia. (Ioane 3:16 ba duahia.) Ta uramu Memorial ai bae ita bona bae kamonai ḡaudia ese bae durudia,  diba ma haida bae abi bona Iehova ena hesiai taudia ai baela. To ma haida danu baita vavedia namo bae davari totona.

¹⁰ Laḡani momo lalodiai e manoka Witnes taudia danu baita vavedia. Baita hadibadia idia na doini Dirava ese e lalokau henidiamu. Momo na eda invateisin e abia daemu bona ta itadiamu dainai ta moale badamu. Memorial e maimu neganai guna Iehova e hesiai heniava karana amo e abia moalena e laloa loumu. Mani Monica ena haheitalai aita laloa. c COVID-19 pandemic lalonai, ia na haroro ḡaukara e goadalaia lou. Laḡani 2021 ena Memorial ema murinai, ia na e gwa: “Lau egu ai ina Memorial na mai anina bada. Laḡani 20 muridiai, nega ginigunana ma na haroro bona taunimanima na vavedia Memorial baema. Una na mai kudougu ibounai ida na karaia, badina Iehova bona Iesu ese lau daigu ai e kara ḡaudia daidiai na moale bada hereamu.” (Sal. 103:1-4) Herevana taunimanima ese eda invateisin bae abi dae eiava lasi, to una ḡaukara na baita karaia goadagoada, badina ta dibamu Iehova ese eda hekwarahi na e laloa badamu.

11. Edena dala ai taunimanima ta vavediamu ḡaukarana na Iehova ese e hanamoamu? (Hagai 2:7)

¹¹ Memorial ai taunimanima ta vavediamu ḡaukarana na Iehova ese e hanamoamu. Laḡani 2021 ai, ena be COVID-19 pandemic dainai taravatu haida e ato, to iseda Memorial ai taunimanima 21,367,603 e hebou. Una namba ese tanobada heḡeḡemadai Iehova ena Witnes edia namba na kahirakahira nega rua e hanaia. Iehova ese namba mo se laloamu. To una hebou e laomu taudia ta ta e lalodia badamu. (Luka 15:7; 1 Tim. 2:3, 4) Ta dibamu taunimanima ivavedia ḡaukarana amo Iehova ese e durudamu kudou-maoro taudia ta davaridiamu.​—Hagai 2:7 ba duahia.

12. Dahaka ese Memorial ilao henina karana baine koua diba? (Laulau ba itaia.)

¹² Iesu na e peroveta dina gabediai hekwakwanai idauidau baita davari. Heḡereḡere, ruma bese edia hekou karadia, daḡedaḡe, tuari, daihanai goreredia, bona ma ḡau haida. (Mat. 10:36; Mar. 13:9; Luka 21:10, 11) Nega haida, unu hekwakwanai daidiai edai na be aukamu Iesu ena mase ilalotaona hebouna baita karaia. Tadikaka taihu be dahaka e kara unu hekwakwanai e hanaidia, bona Iehova ese ede e durudia toma?

13. Artem na e lalo goada bona lalona e hadaia dibura ai Memorial baine karaia neganai, Iehova ese ede e hanamoa toma?

¹³ Dibura ruma ai. Edia abidadama dainai e hadiburadia tadikakadia na e hekwarahimu Iesu ena mase bae laloatao totona. Mani Artem ena haheitalai aita laloa. Laḡani 2020 ena Memorial negana ai, ia na dibura ruma daiutuna ta ai; ena bada na 17-square-meter (183-sq-ft) bona dibura taudia faiv heḡereḡerena bae noho diba. Ena be dibura ai, to ia ese Memorial parao bona wain totona baine ḡaukaralai ḡaudia haida e abi, bona dala e kara sibona ese Memorial tok baine heni. To ia ida dibura daiutuna tamona ai e nohova taudia na siga e aniva bona hereva dikadia momo e gwauraiva. Artem be dahaka e kara? Idia e noidia hora tamona lalonai siga do basie ani bona hereva dikadia basie gwaurai. Artem na e hoa, badina idia ese ena noinoi e abia dae bona Memorial lalonai siga asie ani bona hereva dikadia asie gwaurai. Artem na e gwa, “Na noidia Memorial baina herevalaia.” Ena be asie ura bae kamonai, to Artem ese Memorial e karaia dalana e itaia bona e kamonaia murinai, henanadai momo e heni.

14. COVID-19 pandemic ai Dirava ena taunimanima ese Memorial be ede e karaia toma?

 ¹⁴ COVID-19 pandemic. Una gorere e vara neganai, Iehova ena taunimanima ediai na e auka gabu tamona ai Memorial hebouna bae karaia. To una ese idia na se koudia. d Kongrigeisin haida na mai edia Intanet dainai Memorial na videoconference o zoom ai e karaia. To asi edia Intanet taudia be ede bamona? Tano haida ai, dala e kara Memorial tok na televisen o reidio amo e halasia. Danu, brens ese Memorial tok na gado 500 mai kahana ai e rekodi, unu amo gunika gabudiai e nohomu taudia danu Memorial bae abia diba. Bona tadikaka ese dala e kara unu rekodi ḡaudia na unu gabu tadikakadia dekedia e laohai.

15. Baibul stiuden ta ladana Sue ena haheitalai amo dahaka o dibamu?

¹⁵ Ruma bese edia hekou karadia. Haida na edia ruma bese ese e koudia dainai ediai na e auka Memorial hebouna baela. Mani Baibul stiuden ta ladana Sue ena haheitalai aita laloa. Laḡani 2021 ai, Memorial vairana dinana  ai, Sue na ena stadi e karaia taihuna e hamaoroa ena ruma bese taudia haida edia hekou karana dainai, Memorial na basinela diba. Stadi taihuna ese Luka 22:44 e duahia. Bena e hamaoroa hekwakwanai ta davarimu neganai, Iesu ena haheitalai baita tohotohoa na namo, Iehova baita ḡuriḡuri henia bona ia enai baita tabekau momokani. Murina dinanai, Sue ese Memorial parao bona wain e heḡaeḡaelai bona jw.org amo Morning Worship program e itaia. Una adorahi ai, ia na ena daiutu ai bona fon amo Memorial tok e hakalaia. Gabeai, Sue na ena stadi taihuna e tore henia, e gwa: “Varani na o hagoadagu bada herea. Na hekwarahi Memorial baina abia totona bona Iehova ese e durugu. Una dainai na moalemu bona na tenkiu bada hereamu!” Bema emu ai hekwakwanai unu bamona ta baine vara, o laloamu Iehova ese baine durumu diba, a?

16. Dahaka dainai ta dibamu Memorial baita laomu neganai Iehova ese be hanamoamu? (Roma 8:31, 32)

¹⁶ Iesu ena mase ilalotaona totona ta hekwarahimu neganai, Iehova ese una na e laloa badamu. Namona na baita diba ia ese ita daidai e kara ḡaudia baita lalodia badamu neganai, be hanamodamu. (Roma 8:31, 32 ba duahidia.) Oibe, laloda baita hadai ina laḡani ena Memorial hebouna baitala bona Memorial negana lalonai eda hesiai ḡaukara baita habadaia.