Ki Ete Watch Tower Bible and Tract Society?

ZWE

Watch Tower Bible and Tract Society of Pennsylvania, li enn lasosiasion ki pa fer komers ek ki ti forme an 1884 dapre bann lalwa Commonwealth Pennsylvania, Letazini. Bann Temwin Zeova servi sa asosiasion-la pou soutenir travay ki fer dan lemond antie ek ki inplik pibliye bann Labib ek bann piblikasion ki baze lor Labib.

Dapre bann kondision ki’nn etabli, sa lasosiasion-la ena bann lobzektif relizie, sosial, ek osi an rapor avek lansegnman, sirtou pou “prese ek ansegn levanzil lor Rwayom Bondie anba direksion Zezi Kris.” Pou vinn enn manb sa lasosiasion-la, enn dimounn bizin zis enn invitasion ek li pa depann lor komie donasion li fer. Bann manb sa lasosiasion-la ek bann direkter ed Komite Santral bann Temwin Zeova.

Bann Lasosiasion Legal ki Travay Ansam

Apar Watch Tower Bible and Tract Society of Pennsylvania, bann Temwin Zeova servi bann douzenn lasosiasion legal dan diferan pei. Parmi sa bann lasosiasion-la ena ki dan zot nom ena “Watch Tower,” “Watchtower,” ouswa tradiksion enn sa bann nom-la.

Sa bann diferan lasosiasion legal la finn permet nou pou fer boukou kitsoz depi ki zot finn etabli, kouma:

Redaksion ek edision. Nou finn pibliye apepre 220 milyon Labib ek anviron 40 milyar piblikasion baze lor Labib. Nou bann piblikasion disponib dan plis ki 900 lang. Nou sit jw.org permet ki bann dimounn kapav lir Labib lor Internet san peye dan plis ki 160 lang ek gagn bann repons ki baze lor Labib kouma: “Ki ete Rwayom Bondie?”
Lansegnman. Nou ena plizir diferan lekol pou lansegnman Labib. Par exanp depi 1943, anviron 9,000 Temwin Zeova finn gagn bann bienfe ar Lekol Galaad ek sa finn permet zot servi antan ki misioner ouswa pou stabiliz ek ranforsi nou travay dan lemond antie. Ek sak semenn, bann milyon dimounn, parmi bann ki pa Temwin, resevwar bann lansegnman ki done dan sak lasanble. Ena osi bann kour ki montre bann dimounn lir ek ekrir dan enn brosir ki finn pibliye dan 120 lang.
Led sosial. Nou finn aport led materyel ar bann ki’nn viktim bann katastrof, kouma par exanp zenosid dan Rwanda an 1994, ouswa kan ena bann katastrof natirel kouma tranbleman-de-ter dan Ayiti.

Mem si nou’nn fer boukou atraver nou lasosiasion ek bann lezot lasosiasion legal ki nou servi, nou travay pa depann ditou lor zot. Sak Kretien ena enn responsabilite personel pou akonpli so mision ki Bondie finn done pou prese ek ansegn bon nouvel. (Matie 24:14; 28:19, 20) Nou krwar ki Bondie pe soutenir nou travay ek ki Li pou kontign vinn sa kikenn ki “fer pouse” la.—1 Korintien 3:6, 7.