Premie Let pou Bann Korintien 10:1-33
10 Mo bann frer, mo anvi ki zot kone ki nou bann anset, zot tou ti anba niaz ek ki zot tou ti travers lamer.
2 Zot tou ti pran batem dan Moiz par mwayin sa niaz-la ek sa lamer-la,
3 ek zot tou ti manz mem manze spiritiel*
4 ek zot tou ti bwar mem delo spiritiel.* Parski zot ti bwar delo ki sorti dan ros spiritiel* ki ti swiv zot, ek sa ros-la ti reprezant* Lekris.
5 Selman, Bondie pa ti aksepte laplipar parmi zot, akoz sa li ti touy zot dan dezer.
6 Seki’nn ariv zot li enn lavertisman pou nou,* pou ki nou pa dezir bann move kitsoz, parey kouma zot inn fer.
7 Pa ador bann zidol, parey kouma sertin parmi zot ti fer; parey kouma finn ekrir: “Lepep ti asize pou manze ek bwar. Apre sa zot ti leve pou amize.”
8 Pa pratik limoralite sexiel,* parey kouma sertin parmi zot ti komet limoralite sexiel,* ek 23,000 parmi zot inn mor dan enn sel zour.
9 Pa teste Zeova,* parey kouma sertin parmi zot ti teste li, ek ti mor par bann serpan.
10 Pa plengne, parey kouma sertin parmi zot ti plengne, ek ti mor par sa kikenn ki detrir la.
11 Seki’nn ariv zot li enn lavertisman,* ek finn ekrir sa pou averti nou ki pe viv dan lafin sa lepok-la.*
12 Alor ki sa kikenn ki panse ki li pe debout la fer atansion ki li pa tonbe.
13 Pena okenn tantasion ki zot inn gagne ki lezot pa’nn gagne. Me Bondie li fidel, ek li pa pou les zot gagn enn tantasion ki zot pa kapav siporte, me avek sa tantasion-la, li pou osi donn zot enn mwayin pou sorti ladan, pou ki zot kapav andir sa.
14 Alor, mo bann kamarad ki mo bien kontan, sove devan lidolatri.
15 Mo pe koz ar zot kouma bann zom ki ena bon zizman; zize par zotmem seki mo pe dir.
16 Sa koup benediksion ki nou beni la, eski li pa enn partisipasion dan disan Lekris? Sa dipin ki nou kase la, eski li pa enn partisipasion dan lekor Lekris?
17 Parski ena enn sel dipin, nou, mem si nou boukou, nou enn sel lekor, parski nou tou nou ena enn par dan sa sel dipin-la.
18 Get seki pep Izrael fer: Bann ki manz bann sakrifis, eski zot pa asosie zot ar lotel?
19 Ki mo pe rod dir alor? Eski bann kitsoz ki’nn sakrifie ar enn idol zot inportan, ouswa eski enn idol li inportan?
20 Non; me mo pe dir ki seki bann nasion sakrifie, zot sakrifie sa ar bann demon, pa ar Bondie; ek mo pa anvi ki zot asosie zot ar bann demon.
21 Zot pa kapav bwar dan koup Zeova* ek dan koup bann demon; zot pa kapav manz lor “latab Zeova”* ek lor latab bann demon.
22 Ouswa ‘eski nou pe esey fer Zeova* zalou’? Nou pa pli for ki li, pa vre?
23 Nou gagn drwa fer tou kitsoz,* me pa tou kitsoz ki profitab. Nou gagn drwa fer tou kitsoz, me pa tou kitsoz ki fortifie.
24 Ki sakenn kontign rod lintere lezot, me pa so prop lintere.
25 Manz tou seki vande dan bazar laviann, san poz kestion akoz zot konsians,
26 parski “later ek tou seki lor la pou Zeova.”*
27 Si enn kikenn ki pa krwayan invit zot ek zot anvi ale, manz tou seki bann-la met devan zot, san poz kestion akoz zot konsians.
28 Me si kikenn dir zot, “Se enn kitsoz ki finn ofer an sakrifis,” pa manze akoz sa kikenn ki’nn dir zot sa la ek pou ki sa pa fatig konsians personn.
29 Mo pa pe koz lor to konsians, me lor konsians sa lot dimounn-la. Parski kifer konsians enn lot dimounn bizin ziz mo liberte?
30 Si mo pe remersie Bondie kan mo pe manze, kifer lezot bizin kritik mwa pou enn kitsoz ki mo pe remersie Bondie?
31 Alor, kan zot pe manze, kan zot pe bwar ouswa ninport ki kitsoz ki zot pe fer, fer tou pou laglwar Bondie.
32 Pa fer nanye pou ofans lezot,* ki li Zwif ouswa Grek ouswa bann ki form parti dan lasanble* Bondie,
33 parey kouma mo pe esey fer plezir tou dimounn dan tou seki mo fer. Mo pa pe rod mo prop lintere, me lintere mazorite dimounn, pou ki zot kapav sape.
Not
^ Ouswa “mem manze ki sorti kot Bondie.”
^ Ouswa “mem delo ki sorti kot Bondie.”
^ Ouswa “dan ros ki Bondie ti done.”
^ Ouswa “sa ros-la ti.”
^ Ouswa “servi nou kouma lexanp.”
^ Get Lexplikasion Bann Mo.
^ Get Lexplikasion Bann Mo.
^ Get Lexplikasion Bann Mo.
^ Ouswa “servi nou kouma lexanp.”
^ Ouswa “sa lemond-la.” Get Lexplikasion Bann Mo.
^ Get Lexplikasion Bann Mo.
^ Get Lexplikasion Bann Mo.
^ Get Lexplikasion Bann Mo.
^ Ouswa “Tou kitsoz permi pou nou.”
^ Get Lexplikasion Bann Mo.
^ Ouswa “fer lezot tonbe.”
^ Ouswa “kongregasion.”
