Deziem Let pou Bann Korintien 6:1-18
6 Nou ki pe travay ansam avek li, nou osi sipliy zot pou pa aksepte bonte extraordiner Bondie,* pou apre rat so lobzektif.
2 Parski li dir: “Dan enn moman ki favorab, mo’nn tann twa, ek dan enn zour delivrans, mo’nn ed twa.” Gete! Aster-la se moman ki vremem favorab. Gete! Aster-la se zour delivrans.
3 Dan okenn fason nou pa donn personn okenn rezon pou tonbe, pou ki personn pa kritik nou servis sakre;
4 me dan tou domenn nou rekomann noumem kouma bann serviter Bondie, par nou landirans dan boukou sitiasion, dan bann leprev, dan bann moman difisil, dan bann problem,
5 kan nou gagn bate, dan prizon, dan bann lafoul violan, kan travay dir, kan pas bann lanwit san dormi, dan bann moman kot pena manze.
6 Nou osi montre ki nou bann serviter Bondie par nou pirte, par konesans, par pasians, par zantiyes, par lespri sin, par enn lamour ki pa ipokrit,
7 par bann parol ki vre, par pwisans Bondie; gras-a bann zarm lazistis ki dan lame drwat* ek dan lame gos,*
8 ki li dan laglwar ek dezoner, ki nou ena enn move repitasion ouswa enn bon repitasion. Pe konsider nou kouma bann dimounn ki anbet lezot ek pourtan nou dir laverite,
9 kouma bann etranze ek pourtan pe rekonet nou, kouma bann ki pe mor* ek pourtan gete! nou pe viv, kouma bann ki’nn gagn pinision* ek pourtan pa’nn livre nou pou al mor,
10 kouma bann ki dan tristes me nou touletan dan lazwa, kouma bann ki pov me nou fer boukou dimounn vinn ris, kouma bann ki pena nanye ek pourtan nou ena tou kitsoz.
11 Bann Korintien, nou finn koz fran* ar zot ek nou finn ouver nou leker an gran ar zot.
12 Nou pa’nn fixe enn limit dan nou lafeksion* pou zot, me zot, zot inn fixe enn limit dan zot lafeksion ek zot tandres pou nou.
13 Alor, mo pe koz ar zot parey kouma mo pe koz ar mo bann zanfan—silvouple fer parey avek nou—zot osi ouver zot leker an gran.
14 Pa al asosie zot* avek bann ki pa krwayan. Parski ki lien ena ant lazistis ek seki kont lalwa? Ouswa ki rapor lalimier ena avek nwarte?
15 Anplis, ki lakor ena ant Kris ek Belial?* Ouswa ki relasion ena ant enn krwayan* ek* enn kikenn ki pa krwayan?
16 Ki lakor ena ant tanp Bondie ek bann idol? Parski nou tanp enn Bondie vivan; parey kouma Bondie ti dir: “Mo pou res parmi mo pep ek mo pou mars parmi zot, ek mo pou zot Bondie, ek zot pou mo pep.”
17 “‘Alor, sorti parmi zot, ek separe avek zot,’ Zeova* dir, ‘ek aret tous sa kitsoz ki inpir la’”; “‘ek mo pou akeyir zot.’”
18 “‘Ek mo pou vinn enn papa pou zot, ek zot pou vinn bann garson ek bann tifi pou mwa,’ Zeova,* Bondie Tou-Pwisan dir.”
Not
^ Ouswa “Bondie so faver ki pa merite.” Get Lexplikasion Bann Mo.
^ Kitfwa pou atake.
^ Kitfwa pou defann.
^ Ouswa “konsider nou kouma bann ki merit lamor.”
^ Ouswa “disiplinn.”
^ Lit., “ouver nou labous pou koz.”
^ Ouswa “Ena boukou plas dan nou leker.”
^ Lit., “Pa al anba enn zoug ki bankal.”
^ Sorti dan enn mo ebre ki vedir “Pa Vo Nanye.” Sa fer referans ar Satan.
^ Ouswa “enn dimounn fidel.”
^ Ouswa “rapor enn krwayan ena avek.”
^ Get Lexplikasion Bann Mo.
^ Get Lexplikasion Bann Mo.
