Sel vre Bondie lor ki Labib koze se Zeova, Limem ki’nn kree tou kitsoz. (Revelasion 4:11) Bann profet Abraam ek Moiz ti ador Li, Zezi osi ti ador Li. (Zenez 24:27; Exod 15:1, 2; Zan 20:17) Li pa Bondie zis pou enn pep, me Bondie pou “later antie.”​—Psom 47:2, PKM.

 Labib dir nou ki sel nom ki Bondie ena se Zeova. (Exod 3:15; Psom 83:18) So nom sorti dan enn verb Ebre ki vedir “vini,” ek ena boukou biblis ki panse ki sa nom-la vedir “Li Fer Vinn.” Sa sinifikasion-la al bien avek rol ki Zeova ena antan ki Kreater ek sa Kikenn ki realiz so proze la. (Izai 55:10, 11) Labib ed nou osi pou kone kisannla Zeova vremem ete, ek osi pou konn kalite pli inportan ki Li ena, lamour.​—Exod 34:5-7; Lik 6:35; 1 Zan 4:8.

 Nom Zeova se fason ki nou tradir nom Bondie an Kreol, an Ebre li reprezante par kat let יהוה (YHWH), se seki nou apel Tetragram. Nou pa kone kouma exakteman ti pronons nom Zeova dan lang Ebre lepok lontan. Me selman, sa fer bien lontan ki servi nom “Zeova” an Angle, premie fwa ki li ti aparet se dan tradiksion Labib ki William Tyndale ti fer an 1530. a

Kifer nou pa kone kouma ti pronons nom Bondie dan lang Ebre lepok lontan?

 Lontan kan ti pe ekrir Ebre ti servi zis bann konsonn, pa ti servi bann vwayel. Enn dimounn ki ti lir Ebre ti kone ki bann vwayel li ti bizin azoute. Me selman, apre ki ti terminn bann Lekritir Ebraik (“Ansien Testaman”) sertin Zwif ti adopte enn siperstision, zot ti panse ki li pa bon ki pronons nom Bondie for. Kan zot ti pe lir for enn verse kot ti ena nom Bondie, zot ti ranplas li par bann lexpresion kouma “Segner” ouswa “Bondie.” Amezir ki bann santenn lane finn pase, sa siperstision-la finn fane, ek ti nepli kone kouma ti pronons nom Bondie. b

 Sertin panse ki nom Bondie se “Yahweh,” alor ki lezot panse ki bizin pronons li dan enn lot fason. Dan enn porsion liv Levitik ki’nn tradir an Grek dan enn Roulo Lamer Mor, nou trouv nom Iao. Bann premie ekrivin Grek finn propoz osi prononsiasion Iaê, Iabé ek Iaoué, me nou pa kapav san poursan sir ki se koumsa ki ti pronons nom Bondie dan lang Ebre lepok lontan. c

Seki sertin dimounn panse lor nom Bondie dan Labib

 Seki bann dimounn panse: Fode pa ki servi nom Bondie dan Labib parski nou pa kone kouma ti pronons li exakteman an Ebre.

 Laverite: Si sa fason panse-la li vre, savedir Bondie atann ki bann dimounn ki koz diferan lang pronons so nom dan mem fason. Me selman, Labib montre nou ki dan lepase bann adorater Bondie ki ti koz diferan lang ti pronons so nom dan diferan fason.

 Anou pran lexanp Zozwe, ki ti enn ziz dan Izrael. Kitfwa bann premie Kretien ki ti koz Ebre ti pronons so nom Yehôshoua, alor ki bann ki ti koz Grek ti pou dir Iêsous. Dan Labib finn gard tradiksion Grek nom Ebre Zozwe, sa montre ki bann Kretien ti trouv sa lozik pou servi bann nom dan fason ki ti pronons li dan zot lang.​—Zistwar Bann Apot 7:45; Ebre 4:8.

 Samem prinsip-la aplike ar nom Bondie. Seki pli inportan se pa fason ki pronons li, me plito se donn li plas ki li merite dan Labib.