Dan Labib, pena enn lalwa presi konsernan enn dimounn ki aret so groses volonterman. Parkont, ena boukou verse Labib ki montre seki Bondie panse lor lavi enn dimounn, mem konsernan enn zanfan ki pankor ne.

 Lavi se enn kado ki sorti kot Bondie. (Zenez 9:6; Psom 36:9, Psom an Kreol Morisien, PKM) Tou bann lavi ena boukou valer pou Li, mem lavi enn zanfan ki dan vant so mama. Alor, si enn dimounn volonterman touy enn zanfan ki pankor ne, li mem zafer ki touy enn dimounn.

 Dan Lalwa ki Bondie ti donn bann Izraelit, Li ti dir: “Si bann misie pe lager, ek zot tap avek enn madam ansint ek ki li akouse avan ler, me ki personn pa mor, pou bizin fer koupab-la pey seki mari sa madam-la pou demann li; ek li pou bizin pey sa dapre desizion bann ziz. Me si enn kikenn mor, lerla to bizin donn enn lavi pou enn lavi.”​—Exod 21:22, 23. a

•  Kan eski lavi enn dimounn koumanse?

•  Eski Bondie pou pardonn enn dimounn ki’nn fer enn lavortman?

•  Eski li pa bon fer enn lavortman mem si lavi mama-la ouswa zanfan-la an-danze?

 Pou Bondie, lavi enn dimounn koumanse deswit kouma li koumans forme dan vant so mama. Dan so Parol, Labib, Bondie montre nou ki Li konsider enn ti-baba ki pankor ne kouma enn dimounn. Anou get de-trwa lexanp ki montre ki pou Bondie lavi enn zanfan ki dan vant so mama, li ena mem valer ki lavi enn zanfan ki’nn ne.

•   Bondie ti inspir Lerwa David pou ekrir sa: “To lizie ti trouv mo lekor ki pa ti ankor ena form.” (Psom 139:16, PKM) Mem avan ki David ne, Bondie ti konsider li kouma enn dimounn.

•   Avan mem ki profet Zeremi ne, Bondie ti fini kone ki Li ti pou donn Zeremi enn responsabilite spesial. Bondie ti dir Zeremi: “Avan mem ki mo ti form twa dan vant to mama, mo ti konn twa, ek avan ki to ne mo ti swazir twa pou enn travay spesial. Mo’nn swazir twa pou vinn enn profet pou bann nasion.”​—Zeremi 1:5.

•   Lik, enn ekrivin Labib, ki ti osi enn dokter, ti servi mem mo Grek pou dekrir enn ti-baba ki pankor ne ek enn ti-baba ki fek ne.​—Lik 1:41, Nouvo Testaman Dan Kreol Morisien, NTKM; 2:12, 16, NTKM.

 Bondie kapav pardonn bann ki’nn deza fer enn lavortman. Si aster-la zot aksepte fason ki Bondie konsider lavi, ek ki kitfwa zot santi zot koupab, fode pa ki zot les sa santiman-la fatig zot. Zeova “ranpli ar konpasion ek pitie; . . . Li separ nou ar nou pese parey kouma distans ki ant soley leve ek soley kouse.” b (Psom 103:8-12, PKM) Zeova pou pardonn tou bann ki repanti sinserman pou bann pese ki zot inn fer, parmi ena lavortman.​—Psom 86:5, PKM.

 Lavi enn zanfan ki pankor ne ena boukou valer, alor li pa bon ki fer enn lavortman zis parski enn dokter dir ki ena enn posibilite ki mama-la ouswa zanfan-la gagn enn problem lasante.

 Me ki pou fer si pandan lakousman, ena enn irzans ek bizin swazir ant sov lavi mama-la ouswa zanfan-la? Si sa arive, se koup-la ki bizin deside ki pou fer.