Bann siantis dir ki bann lisien servi kapasite ki zot ena pou santi pou konn laz, sex ek mood lezot lisien. Bann dimounn kapav mem form bann lisien pou rod bann bom ek ladrog. Bann dimounn servi plis zot lizie pou kone seki pe pase otour zot, alor ki bann lisien servi kapasite ki zot ena pou santi. Se koumadir zot “lir” avek zot nene.

 Reflesi lor la: Kapasite ki enn lisien ena pou santi, li boukou pli bon ki pou nou. Dapre National Institute of Standards and Technology dan Letazini, enn lisien “kapav santi bann tipti kitsoz ki ena par exanp, dan later, dan ler ouswa dan delo. Se inpe koumadir inn melanz enn kar enn ti kouyer disik dan enn gran pisinn ek apre, inn demann nou pou gout li pou retrouv sa gou disik-la.”

 Kifer kapasite ki enn lisien ena pou santi li boukou pli bon ki pou nou?

•   Enn lisien so nene touletan mouye ek sa permet li santi bann ti eleman ki ena dan bann parfin.

•   Enn lisien ena de trou dan so nene​—enn pou li respire, ek enn lot pou li santi. Kan enn lisien santi, ler rant dan parti ki kapte bann loder.

•   Sa parti ki permet li pou santi la fer 130 santimet kare ouswa plis, alor ki pou enn dimounn, li zis 5 santimet kare.

•   Enn lisien kapav ena 50 fwa plis selil ki kapte bann loder.

 Tousala permet enn lisien pou santi bann diferan parfin dan enn kitsoz. Par exanp, dapre bann exper, kan nou trouv enn lasoup, nou kapav santi so parfin, me enn lisien, li kapav santi sak ingredian ki ena ladan.

 Bann siantis dan Pine Street Foundation, enn sant resers lor kanser, dir ki kan enn lisien so servo ek so nene travay ansam, li vinn “enn bann laparey ki pli sofistike ki ena lor later pou rekonet bann loder.” Bann siantis pe devlop bann laparey elektronik kouma bann “nene” ki pou kapav detekte bann bom, bann trafik ilegal, ek bann maladi kouma kanser.

 Ki ou panse? Kan ou get kapasite ki enn lisien ena pou santi, ki ou pou dir? Li’nn aparet par limem ouswa eski inn kree sa?