Intazi Ino Asambi Yamwi Yakakwata
Peter wafuma pa cilimba ala watasakamikwa. Mwalimu wakwe umwanaci wino wacindika, wafuma akulondolola vino icisambilizyo ca kusanguka cakwe Charles Darwin cazwa sana ya sayansi nu kukulula antu ku vizumilo vya maleele. Lyene wanena ya kasukulu kuti yalandepo vino yakwelenganya pa cisambilizyo cico.
Peter wakwata intazi pakuti apingulepo. Avyazi yakwe yamusambilizya ukuti Leza waumvile insi ni vya umi vyonsi ivyayamo. Yamusambilizya ukuti vino Baibo ikalanda pa uumbo i vya cumi nu kuti icisambilizyo ca kusanguka ica kwelenganya sile nupya citakwata usininkizyo. Avyazi yakwe Peter na mwalimu wakwe yonsi yakalonda ukuti vintu vikamuzipile. Nomba uzye a weni wino Peter alinzile ukutaila?
Cila mwaka ivya musango uu vikacitika umu masukulu aingi sana umu nsi yonsi. I vyani vino Peter na ya kasukulu yauze ali wakwe aliwe yalinzile ukucita? Uzye mutakuzumila ukuti yalinzile ukumanya ningo api lyasi lii pakuti yapingulepo ningo? Yafwile ukulondelezya usininkizyo pa kusanguka na pa uumbo alino yapingule aineco cino yamataila.
Nupya Baibo ikacelula ukuti citaya ningo ukuzumila icizumilezumile vino yauze yakasambilizya. Kalemba wakwe Baibo umwi watiile: “Umuntu iciwelewele wene akataila muli vyonsi kwene, lelo uwa mano wene akawaka imipitile yakwe.” (Mapinda 14:15) Baibo ikakomelezya Aina Klistu ukuomvya ‘maka yao aakwelenganya’ nu kuzana usininkizyo wa vintu vino yakusambiliziwa.—Loma 12:1, 2.
Kabuku kaa katayelileko ukutungilila maumba ya mipepele aakalonda ukuti yasambilizya pa uumbo umu masukulu. Umulandu uno kabuku kaa kayelileko u kulanda pali vino yamwi yakasambilizya ukuti umi wizile iuyako sile ukwaula ukwenekela, nupya akalanda nu kuti amalyasi aya muli Baibo aakalanda pa uumbo asi ya cumi.
Tumalanda pa lusandesande pano ali luno lwacindama sana uku umi. Mumasambilila na pali vino nsandensande zikapangwa umu cizungusyo. Nupya mumazananga na mauzyo akumwazwa ukwelenganya pa vintu ivikatungilila icisambilizyo cakuti ivintu vyasangwike sile.
Ukwaula nu kutwisika swensi kwene cila muntu tulinzile ukwasuka iuzyo lyakuti, uzye umi waumvilwe nanti wasangwike sile? Mufwile mwelenganyapo sana pi lyasi kwene lii. Kabuku kaa kamalanda sile pa usininkizyo umwi, uwalenga ukuti aingi yazumile ukuti umi waumvilwe.
