Ee, umu nsi yonsi mwaya ya Nte Yakwe Yeova anaci aingi sana aakaomba umulimo wa kusambilizya. Anaci yayo aingi sana, aakasimikila ilyasi lisuma ilya Wene Wakwe Leza. Pali Masamu 68:11 paya usesemo ukalanda pa yanaci yaa uwakuti: “Yeova wavwanga wati, anaci aakasimikila ilandwe lisuma, iumba ilikalamba,” NWT.

Nomba mulinzile ukumanya upusano uwaya pa mulimo uno anaci ya Nte Yakwe Yeova yakaomba na uno ya na mapepo aa mu mipepele yuze yakaomba. Kwaya vimwi ivikalangilila ukuti imilimo iyo yapusana. I vyani vivyo kwene?

Antu yano anaci yaa yakasambilizya yapusana. Anaci aa mu mipepele yuze yakaelenganya ukuti nayo yakwata amaka ya kuya intunguluzi umu mipepele yao, nupya antu yano yakasambilizya aa mu maceici yao kwene. Nomba anaci ya Nte Yakwe Yeova yene, yano yakasambilizya asi ya mu cilongano, lelo yakasambilizya antu yano yakazana lino yakusimikila uku ng’anda ni ng’anda nanti kuze sile.

Inzila yuze ino anaci ya Nte Yakwe Yeova yapusanilamo na anaci ya mu mipepele yuze, i milimo ino yakaomba umu vilongano. Anaci aa mu mipepele yuze yene yakaimilila pa nkoleelo nu kusambilizya alino nu kunena aa mu mipepele yao ukuti yalinzile ukulalondela ivizumilo vyao. Lelo anaci ya Nte Yakwe Yeova yene yasisambilizya umu vilongano lino pali na onsi abatiziwe. Aonsi sile aasontwa ukuya ya kasambilizya aakaomba umulimo uwo.—1 Timoti 3:2; Yakobo 3:1.

Baibo ikalanda ukuti aonsi sile aalinzile ukulatungulula umu cilongano . Lolini vino Paulo walembiile umwangalizi muze, Tito, watiile: ‘Nakusiile umu Kilete pakuti usonte ya eluda umu misumba yonsi.’ Paulo walanzile nu kuti: “Eluda alinzile ukuya uwaula umulandu, umonsi uwakwata sile umuci wenga.” (Tito 1:5, 6) Nupya Paulo walembiile Timoti mazwi ali yamwi kwene lino wamunenanga pali vino alinzile ukuomba umulimo uno wapeezilwe, watiile: “Ndi cakuti umwi akulondesya ukuya umwangalizi ala akulonda umulimo usuma. Umwangalizi alinzile ukuya uwa kaele, alinzile ukukwata umuci wenga, . . . aakasambilizya ningo.”—1 Timoti 3:1, 2.

U mulandu ci uno umulimo wa kutungulula umu cilongano wapeelelwa sile uku yonsi? Paulo watiile: “Nsikuzumilizya umwanaci ukusambilizya nanti ukutungulula umonsi, lelo afwile aikala mya. Pano Adamu u watandikilepo ukuumbwa, alino Eva nawe aumbwa pa cisila.” (1 Timoti 2:12, 13) Fwandi, vino Leza waumvile antu vikalangilila umulandu uno aonsi sile alinzile ukulasambilizya nu kutungulula umu cilongano.

Aomvi yakwe Yeova yakakolanya intunguluzi yao, Yesu Klistu. Umusambi uwi zina lyakuti Luka walemvile pa mulimo uno Yesu waombanga ukuti: “Waile umu misumba nu mu mizi ala akusimikila nu kumanyisya antu api lyasi lisuma ilya Wene wakwe Leza.” Nupya pa cisila, lino Yesu watumile alondezi yakwe ukuya umu kuomba umulimo uli umwi kwene uwa kusimikila, Luka walanzile ati: “Yapisile umu mizi, ala yakusimikila ilyasi lisuma.”—Luka 8:1; 9:2-6.

Ndakai, aomvi yakwe Yeova, kuli kuti aonsi na anaci, yaya acincile ukufikilizya vino Yesu wasoowile ukuti: “Lyasi lisuma lii ilya Wene lilasimikilwa umu nsi yonsi ukuya unte ku yantu amu nko zyonsi, lyene alino impela iliza.”—Mateo 24:14.