Uzye Amausoowelo Aakalanda pali Mesiya yakalangilila Umu cumi Ukuti Yesu wali Ali Mesiya?

LIZYINI

Vino Baibo yalandapo

Ee. Lino Yesu wali pano nsi, wafikilizye amausoowelo aingi pali Mesiya, uwali nu kuya “Katuula wa antu amu nsi.” (Danieli 9:25; 1 Yoane 4:14) Nupya na pa cisila ca mfwa yakwe, Yesu watwalilile ukufikilizya amausoowelo yaa.—Masamu 110:1; Milimo 2:34-36.

Uzye izwi lyakuti “Mesiya” likapiliula cani?

Izwi lya Ciyebulai ilyakuti Ma·shiʹach (Mesiya) ni likolaneko ilya Cigiliki ilyakuti Khri·stos (Klistu) yonsi yoili yakapiliula ukuti “Umupakwe.” Fwandi “Yesu Klistu” cikapiliula “Yesu Umupakwe,” nanti “Yesu Mesiya.”

Mu nsita ino Baibo yalembwanga, umuntu wayanga umupakwe ndi cakuti yamwitila amafuta pa mutwe pa cisila cakusontwa ukuya pa utunguluzi. (Aina Levi 8:12; 1 Samueli 16:13) Yesu wasonsilwe na Leza ukuya Mesiya, intunguluzi iya maka sana. (Milimo 2:36) Nomba nanti ciye vivyo, Yesu atapasilwe na mafuta, lelo Leza wamupasile nu mupasi wa muzilo.—Mateo 3:16.

Uzye antu aingi yangafikilizya amausoowelo akalanda pali Mesiya?

Awe. Wakwe viivi kwene vino cifwati ca muntu cikamanyisya sile muntu kwene wiyo wenga, avino nu kufikiliziwa kwa mausoowelo alembwa muli Baibo yakalozya sile kuli Mesiya nanti Klistu casila. Nomba Baibo ikatucelula ukuti “Antu aufi yalaloleka, yano alailanda ukuti yene ali Klistu kwene, nupya ali yakasema. Yalacita vilangililo vikulu ni vizungusyo kuti yaponzye na asololwe kwene ndi cingaya.”—Mateo 24:24.

Uzye Mesiya alaloleka ku nkoleelo?

Awe. Baibo yasoowile ukuti Mesiya wali nu kufuma mu mupanda wa Mwene Davidi. (Masamu 89:3, 4) Nomba, Ivyeo ivyalandanga pa vikolwe vya Yayuda kufika kuli Davidi vyaponzile, vifwile vyononike lino aina Loma yononyile Yelusalemu mu 70 C.E. a Kufuma lili kwene, antu cayatalile ukusininkizya ukuti Yesu wali uwa mu lupwa lwakwe Davidi. Ukupusanako, nanti cakuti ivyeo vya pa vikolwe vii vyalolike mu nsita yakwe Yesu, kutaali uwakananga ati Yesu asi wa mu lupwa lwakwe Davidi kumwi na alwani yakwe kwene.—Mateo 22:41-46.

Amausoowelo yanga aya muli Baibo akalanda pali Mesiya?

Citangupala ukumanya impendwa mu kulungatika iya mausoweelo apali Mesiya. Inzila ya kupendelamo mausoowelo ingapusana nanti sile umu malyasi amuli Baibo aakalanda pali Mesiya. Amazwi aya pali Ezaya 53:2-7 yalanda amausoowelo aingi akalanda pali Mesiya. Yamwi yangalola ivyeo vii kwati usoowelo sile onga, lyene yauze nayo yangalola ukuti cila cikomo usoowelo onga.

Amausoowelo yamwi aapali Mesiya yano Yesu wafikilizye

Usoowelo	Ukazanwa pa	Ukufikiliziwa
Umwana wakwe Abulaamu	Utandiko 22:17, 18	Mateo 1:1
Amu mupanda wakwe Isaki umwana wakwe Abulaamu	Utandiko 17:19	Mateo 1:2
Ukuvyalwa kwa luko lwa ina Izlaeli ulwa Yayuda	Utandiko 49:10	Mateo 1:1, 3
Kufuma mu mutande wa Mwene Davidi	Ezaya 9:7	Mateo 1:1
Ukuvyalwa kwakwe nacisungu	Ezaya 7:14	Mateo 1:18, 22, 23
Ukuvyalilwa mu Betelemu	Mika 5:2	Mateo 2:1, 5, 6
Ukwamwa izina lyakuti Imanueli b	Ezaya 7:14	Mateo 1:21-23
Intandikilo isuma	Ezaya 53:2	Luka 2:7
Ana anono yakomwa pa cisila ca kuvyalwa kwakwe	Yelemiya 31:15	Mateo 2:16-18
Ukwamwa kufuma ku Eguputo	Oseya 11:1	Mateo 2:13-15
Ukwamwa umwina Nazaleti c	Ezaya 11:1	Mateo 2:23
Ukukolelelwa ni nkombe	Malaki 3:1	Mateo 11:7-10
Ukupakwa ukuya Mesiya mu 29 C.E. d	Danieli 9:25	Mateo 3:13-17
Ukuvwanga kwakwe Leza ukufuma ukwi yulu ukumanyisya ukuti Yesu u mwanakwe	Masamu 2:7	Milimo 13:33, 34
Ukuya mucincile pa ng’anda yakwe Leza	Masamu 69:9	Yoane 2:13-17
Ukukosoola ilandwe lisuma	Ezaya 61:1	Luka 4:16-21
Ukusimikila pa lwalala mu Galili wali usininkizyo ukulu	Ezaya 9:1, 2	Mateo 4:13-16
Ukucita vizyungusyo wakwe vino Mose wacitanga	Malango 18:15	Milimo 2:22
Wakwe vino cali kuli Mose, Yesu nawe kwene walandanga amelenganyo yakwe Leza	Malango 18:18, 19	Yoane 12:49
Ukupozya alwale aingi	Ezaya 53:4	Mateo 8:16, 17
Atalondanga sile ukuisekesya umwineco	Ezaya 42:2	Mateo 12:17, 19
Uvwilanga uluse yano yaculanga	Ezaya 42:3	Mateo 12:9-20; Mako 6:34
Wasookolwile umulinganya wakwe Leza	Ezaya 42:1, 4	Mateo 12:17-20
Wapandanga antu amano asuma sana	Ezaya 9:6, 7	Yoane 6:68
Wacindike izina lyakwe Yeova	Masamu 22:22	Yoane 17:6
Waomvyanga vilangililo	Masamu 78:2	Mateo 13:34, 35
Intunguluzi	Danieli 9:25	Mateo 23:10
Aingi yatamutaile	Ezaya 53:1	Yoane 12:37, 38
Iwe lya kupumikako	Ezaya 8:14, 15	Mateo 21:42-44
Antunze ya mukanyile	Masamu 118:22, 23	Milimo 4:10, 11
Yamupasile ukwaula umulandu	Masamu 69:4	Yoane 15:24, 25
Ukuzevya pa kwingila mu Yelusalemu pali punda	Zakaliya 9:9	Mateo 21:4-9
Ance yamulumbanyizye	Masamu 8:2	Mateo 21:15, 16
Wizile mwi zina lyakwe Yeova	Masamu 118:26	Yoane 12:12, 13
Yamufutwike ku muntu umutailwe uwayanga pamwi nawe	Masamu 41:9	Yoane 13:18
Yamufutwike pa mpiya ma siluva 30 e	Zakaliya 11:12, 13	Mateo 26:14-16; 27:3-10
Ivyuza vyamupuusile	Zakaliya 13:7	Mateo 26:31, 56
Ya kapepa ya ufi yamukatukile	Masamu 35:11	Mateo 26:59-61
Atasukanga lino alwani yamupeelanga imilandu	Ezaya 53:7	Mateo 27:12-14
Yamuswizile amati	Ezaya 50:6	Mateo 26:67; 27:27, 30
Ukupoolwa ku mutwe	Mika 5:1	Mako 15:19
Ukunyambwa	Ezaya 50:6	Yoane 19:1
Atalandwile lino yamumanga	Ezaya 50:6	Yoane 18:22, 23
Amu uteeko yapangine ukuti yamukatukile	Masamu 2:2	Luka 23:10-12
Yamupampamile makasa na maulu pa cimuti	Masamu 22:16	Mateo 27:35; Yoane 20:25
Antu yankine ivya kuzwala vyakwe	Masamu 22:18	Yoane 19:23, 24
Wapendilwe pamwi na yakaifya	Ezaya 53:12	Mateo 27:38
Yaamutukanga	Masamu 22:7, 8	Mateo 27:39-43
Waculile ya kaifya	Ezaya 53:5, 6	1 Petulo 2:23-25
Walolike kwati Leza watamutazyela	Masamu 22:1	Mako 15:34
Yamumwesizye waini musasamile nupya umusulwe	Masamu 69:21	Mateo 27:34
Uvwile sana lusala lino wali sile mupipi nu kufwa	Masamu 22:15	Yoane 19:28, 29
Wapeezile umupasi wakwe kuli Leza	Masamu 31:5	Luka 23:46
Wapeezile umi wakwe	Ezaya 53:12	Mako 15:37
Waipeezile impolelwa pakuti afumyepo uluyembu	Ezaya 53:12	Mateo 20:28
Amafupa yakwe yatavunyilwe	Masamu 34:20	Yoane 19:31-33, 36
Yamupopiile	Zakaliya 12:10	Yoane 19:33-35, 37
Wazikiilwe pamwi na akama	Ezaya 53:9	Mateo 27:57-60
Watutulwilwe ukufuma ku yafwe	Masamu 16:10	Milimo 2:29-31
Yapyanikapo muze pali sikamfutu	Masamu 109:8	Milimo 1:15-20
Wikala kwi kasa lilunji lyakwe Leza	Masamu 110:1	Milimo 2:34-36

a Ibuku limwi (McClintock and Strong’s Cyclopedia) likalanda ukuti: “Pangaya ukutwisika ndi cakuti twalanda ukuti ivyalembwa vya luko lwa Yayuda ni ndupwa zyao vyononyilwe lino Yelusalemu ononyilwe, asi apa cisila foo.”

b Izina lya Ciyebulai ilyakuti Imanueli, ilikapiliula ukuti ‘Leza Ali Naswe’ likalondolola mulimo wakwe Yesu nga Mesiya. Ukwiza kwakwe ukwa pano nsi ni milimo ino waomvile ikalangilila ukuti Leza akaazwa antu yakwe aakamupepa.—Luka 2:27-32; 7:12-16.

c Izwi lyakuti “Nazaleti” lifwile lyafuma kwi izwi lya Ciyebulai ilyakuti neʹtser ilikapiliula ‘misisi.’

d Pakuti muzane ivyeo na vyuze ivikalanda pali vino vyacitikanga ukufika mu 29 C.E. umwaka uno Mesiya walolike, lolini icipande cakuti “Vino usoowelo wakwe Danieli walanda pa kwiza kwakwe Mesiya.”

e Usoowelo uu waya mwi buku lyakwe Zakaliya, nomba kalemba wakwe Baibo Mateo walanzile ukuti “cafikiliziwe cino Leza wavwanzile kupitila muli kasema Yelemiya.” (Mateo 27:9) Cikaloleka ukuti ibuku lyakwe Yelemiya insita zimwi ilikaambilapo ukulumbulwa mu ciputulwa ca Malembelo akaamwa ukuti “Yakasema.” (Luka 24:44) Mateo afwile walumbwile “Yelemiya” ukulozya ku mabuku yonsi ausoowelo ukwikako ni buku lyakwe Zakaliya.

Limwi Mungatemwa Ukulolako na Vii

ZYUKINI!

Umwanaci Umuyuda Walondolola Umulandu Uno Wapitulukiile Umu Upefi Wakwe

Uusininkizyo ci uno ya Racquel Hall yazanyile uwakuti Yesu wali ali Mesiya wino yalondesyanga ukumanya?

MASUKO KU MAUZYO AMULI BAIBO