M̦ÕTTAN 2
Komiro En Tiljek im M̦ool ñan Doon
“Jab kõjepel ro em̦õj an Anij kobaik er.”—Mark 10:9, UBS
Jeova ekõn̦aan bwe jen “m̦ool” ak tiljek ilo men otemjej. (Jabõn Kõnnaan 3:3) Rippãlele ro rej aikuj m̦ool ñan doon. Ñe juon ejjab tiljek ak m̦ool ñan eo pãleen, enaaj pen an eo pãleen lõke e. Im ñe erro ejjab lõke doon, enaaj pen an l̦apl̦o̦k aerro yokwe doon.
Ilo raan kein, ej kab baj lõñl̦o̦k wõt rippãlele ro me rejjab m̦ool ñan doon. Ñe kokõn̦aan kõjparok pãd n̦e amiro eo pãleem̦, ewõr ruo men ko kwõj aikuj kate eok ñan kõm̦m̦ani.
1 KAORÕK PÃD N̦E AMIRO
EKKAR ÑAN BAIBÕL̦: Kwõn “kããlõt men ko rem̦m̦antata” ak raorõktata. (Pilippai 1:10, UBS) Juon iaan men ko raorõktata ilo mour n̦e am̦ ej pãd n̦e amiro eo pãleem̦. Kwõj aikuj lukkuun kaorõke pãd n̦e amiro.
Jeova ekõn̦aan bwe kwõn lukkuun yokwe im kaorõke eo pãleem̦ im bwe komiro en m̦õn̦õn̦õ ippãn doon. (Ekklisiastis 9:9) Anij ejjab kõn̦aan bwe kwõn kajettokjãn eo pãleem̦. Ekõn̦aan bwe komiro en pukot kilen bwe komiro en m̦õn̦õn̦õ ippãn doon. (1 Korint 10:24, UBS) Ej aikuj alikkar ilo kõm̦m̦an ko am̦ bwe el̦ap am̦ kaorõk im yokwe eo pãleem̦.
MEN KO KWÕMAROÑ KÕM̦M̦ANI:
-
En ikkutkut amiro eo pãleem̦ kõm̦m̦an iien ippãn doon, im ilo iien kein kwõn jab m̦ad kõn men ko jet
-
Jab l̦õmn̦ak kõn “kwe” make, ak kwõn l̦õmn̦ak kõn “komiro” jim̦or
2 KÕJPAROK BŨRUOM̦
EKKAR ÑAN BAIBÕL̦: “Jabdewõt eo ej kalimjek kõrã im mejkaiie em̦õj an l̦õñ ippãn ilo bũruon.” (Matu 5:28) El̦aññe juon rippãlele ej mejkaiie kõn ro jet im aolep iien ej l̦õmn̦ak kõn m̦anit ko rettoon, men in ej kaalikkar bwe ejjab tiljek im m̦ool ñan eo pãleen.
Jeova ej ba bwe kwõj aikuj “kõjparok bũruom̦.” (Jabõn Kõnnaan 4:23; Jeremaia 17:9, UBS) Bwe kwõn maroñ kõjparok bũruom̦, kwõj aikuj kõjparok mejam̦. (Matu 5:29, 30) Kwõn l̦oore joñak eo an Job ke ear kõm̦m̦ane juon kallim̦ur bwe eban mejkaiie kõn kõrã ro jet. (Job 31:1, UBS) Kwõn kate eok bwe kwõn jab alwõji pija nana ko ñan jidik. Im kwõn peek ilo bũruom̦ bwe kwõban mejkaiie kõn ro jet im ellolo jãn eo pãleem̦.
MEN KO KWÕMAROÑ KÕM̦M̦ANI:
-
Kwõn kaalikkar ñan ro jet bwe kwõj yokwe eo pãleem̦ im kwõnaaj m̦ool wõt ñane
-
L̦õmn̦ak kõn eñjake ko an eo pãleem̦. Ñe kwõj kile bwe am̦ epaake bar juon ej kõm̦m̦an bwe eo pãleem̦ en inepata im abn̦õn̦õ, kwõn m̦õkaj im bõjrak jãn am̦ epaake armej in
