EKKAR ñan bwebwenato eo ilo bokin Gospel eo an Matu, ej ba: “Jijej ej del̦o̦ñ ilowaan tampel̦ in Anij, im kadiwõjl̦o̦k er otemjej ro rej wiakake im wiaik ilowaan tampel̦, im ukõji tebõl̦ ko an ro rej wia kõn m̦ani, im kein jijet ko an ro rej wiakaki m̦ul̦e ko; Im eba ñan er, ‘Ar jeje, Naaj likũt etan m̦weo im̦õ im̦õn jar, a kom̦ij kõm̦m̦ane ro̦ñ an ro rukowadoñ.’”​—Matu 21:12, 13.

Kõmel̦el̦e ko etto an RiJu ro, rej kaalikkar bwe ruwiakake ro ilo tampel̦ eo rekõn kowadoñe armej ro ilo aer kar lukkuun kal̦apl̦o̦k on̦ãn men ko rej wiakaki ñan er. Ñan waanjoñak, ekkã an kar dik on̦ãn m̦ul̦e ko im ro rejeram̦õl rar maroñ wiaiki ñan aer katok kaki. Bõtab ekkar ñan juon bok an RiJu ro jem̦aan, ej kaalikkar bwe ilo iiõ eo 50 ãlikin Kũraij, ak iiõ ko tok repaake kar iiõ in, on̦ãn ruo m̦ul̦e ear l̦apl̦o̦k ñan tarrin juon jããn gold (golden denar). Emaroñ kar eñin joñan on̦ãn eo rar kõl̦l̦ãiki juon rijerbal me ear jerbal ium̦win 25 raan. Kõnke ruwiakake ro rar lukkuun kal̦apl̦o̦k on̦ãn m̦ul̦e ko, rijjeram̦õl ro rar jab maroñe on̦ãn in. (Lv. 1:14, UBS; 5:7, UBS; 12:6-8, UBS) Juon kar rũtõlin kabuñ an RiJu ro etan Simeon ben Gamaliel, ear lukkuun illu kõn jerbal in aer ejjab jim̦we im ear kãietl̦o̦k oran menninmour ko armej ro ren kar katok kaki. Ke ear kõm̦m̦ane men in, on̦ãn ruo m̦ul̦e ear m̦õkaj im dikl̦o̦k 100 alen jãn kar on̦ãn eo m̦okta.

Kõn men in, ekkar ñan mel̦el̦e kein ej kab m̦õj kwal̦o̦ki, ear jim̦we an kar Jijej n̦aetan ruwiakake ro ilo tampel̦ eo, “rukowadoñ,” kõnke rar arõk im nana aer kõm̦m̦an ñan armej ro.