Delphine, eo me kar kõnono kake ilo katak eo m̦oktal̦o̦k ear kile bwe inepata ko rar kõm̦m̦an bwe en tarjen joñan an idaak arkool̦. Baibõl̦ eo ejjab n̦ae idaak arkool̦ ñe ewõr joñan ad bõke, ijoke ej ba: “Kwõn jab kobal̦o̦k ippãn armej ro el̦ap aer idaak wain.” (Jabõn Kõnnaan 23:20, UBS) Elõñ nañinmej ko rel̦l̦ap rej jarjar jãn an tarjen joñan an juon idaak arkool̦ im ej ko̦kkure jem̦jerã ko ikõtaan armej ro. Bareinwõt kajjojo iiõ elõñ milien armej ro rej dik wõt ak remej kõn an l̦ap aer kadek. Armej ro remaroñ kar el̦l̦ã jãn apañ kein el̦aññe rar l̦oore naanin tõl ko remãlõtlõt ilo Baibõl̦ eo.

Delhpine ear kõm̦m̦ane men in. Kiiõ ej ba: “Iar loe bwe arkool̦ ear jab n̦amejal̦an inepata ko aõ. Iar l̦oor naanin tõl eo jãn Pilippai 4:6, 7, me ej ba: “Kom̦win jab inepata kõn jabdewõt, ak . . . kõn jar im akwel̦ap . . . kajjitõk ko ami ren wal̦o̦k ñan Anij.” Aolep boñ ij jar im akwel̦ap ñan Jeova ñe ij eñjake aõ inepata. Ij kwal̦o̦k aolepen bũruõ ñane ñe ij illu, inepata, im ebbeer, im ij akwel̦ap ñane bwe en jipañ eõ ñan bõk l̦õmn̦ak ko rem̦m̦an. Im iar lukkuun kate eõ bwe in julo̦k l̦õmn̦ak im eñjake ko aõ renana. Men in ear jipañ eõ bwe in l̦õmn̦ak kõn men ko ewõr ippa ijello̦kun aõ l̦õmn̦ak kõn men ko ejjel̦o̦k ippa. Iar jek ilo bũruõ bwe in jab bar idaak arkool̦ kõnke aenõm̦m̦an eo iar loe el̦apl̦o̦k an kar aorõk im iar jab kõn̦aan bwe en jako.”

Mour ettoon ej juon iaan apañ ko el̦ap an rupe bũruon armej im kõm̦m̦an bwe en nana aer mour. Bõtab naanin tõl ko jãn Baibõl̦ remaroñ jipañ kõj bwe jen el̦l̦ã jãn apañ kein el̦aññe jenaaj jel̦ã ta ko rej tõll̦o̦k kõj ñan mour ettoon. Ñan waanjoñak, jet iaaer ej ñe jej kattoojoj im alwõji pija ko renana im rettoon. Juon likao etan Samuel ear ba: “Elukkuun kar pidodo ñan kattoojoj. Jet iien iar jab kwal̦o̦k aõ kõn̦aan ñan juon leddik ak iar kile bwe ear kõn̦aan ña im iar watõk kattoojoj ãinwõt kein kõm̦m̦an kõjak im limo bajjek.” Kõnke ekkã an kar armej ba bwe Samuel ear kattoojoj meñe jet iien ear jab pepe in kõm̦m̦ane, ear kiiõ wõnm̦aanl̦o̦k wõt im kattoojoj ilo an jel̦ã kake. Bõtab ear jino an abn̦õn̦õ im nana an mour kõn men in. Ear ba bwe kattoojoj “ej juon menin ko̦kkure im kõjorrããn ro jet kõnke ekar jino kõm̦m̦an bwe en ejaak jet l̦õmn̦ak ko relukkuun kũbbon̦.”

Samuel ear riiti jet mel̦el̦e ko kõn jo̦dikdik ro ilo website eo jw.org. Im ear kõl̦mãnl̦o̦kjen̦ kõn eoon eo ilo Jabõn Kõnnaan 20:11 (UBS), me ej ba: “Juon ajri ej kwal̦o̦k m̦wilin ilo men ko ej kõm̦m̦ani; jemaroñ in kile el̦aññe e juon ajri em̦ool im em̦m̦an.” Ewi wãween an kar eoon in jipañe? Samuel ear kile bwe kattoojoj ejjab juon men ejim̦we im em̦m̦an ñan kõm̦m̦ane. Im ear bar ba: “Iar bareinwõt kile bwe juon jo̦dikdik eo ej kattoojoj ej kaddek jet kadkad ko kadkadin me enaaj kõm̦m̦an bwe en jab em̦m̦an mour in pãlele eo an. Iar jino kõl̦mãnl̦o̦kjen̦ kõn wãween an nãj lio pãleõ ilju im jekl̦aj eñjake ñe enaaj loe aõ kattoojoj ippãn bar juon kõrã. Men in ear kõm̦m̦an bwe in kile bwe m̦anit in enana im emaroñ ko̦kkure eñjake ko an ro jet. Kõnke epidodo ñan kattoojoj, ejjab mel̦el̦ein bwe ej juon men ejim̦we.” Tokãlik Samuel ear oktak. Ke ear kajjioñ ñan jab kattoojoj, men in ear kõjparok e jãn an mour ettoon.

Antonio ear iioone juon apañ el̦apl̦o̦k an kauwõtata im enaaj kar tõll̦o̦k ñan mour ettoon. Ear em̦m̦an ippãn alwõje pija ko rej kõm̦m̦ani m̦anit ko rettoon im rekajjõjõ. Meñe e kar juon rũm̦are im ear lukkuun yokwe lio pãleen, ak eitok wõt bwe en alwõji pija kein rettoon. Ear ba bwe ilo an kar kõl̦mãnl̦o̦kjen̦ kõn eoon eo ilo 1 Piter 5:8 (UBS), men in ear lukkuun jipañe. Eoon in ej ba: “Kom̦win ekkõl im kõjparok kom̦ make, bwe Tepil̦, rũkõjdat eo ami, ej itoitak ãinwõt juon l̦aiõn eo erorror, im ej reito reitak im lale wõn eo emaroñ kañe.” Antonio ear bar ba: “Jej pãd im mour ilo jukjukun pãd in eobrak kõn ko pija ko rettoon, im pija kein remaroñ eddãp im pen ilo l̦õmn̦ak kein ad. Eoon in ear lukkuun jipañ eõ bwe in kõl̦mãnl̦o̦kjen̦ kõn wõn eo ej pãd ilikin menin kapo kein. Iar lukkuun aikuj kakeememej eõ make bwe pija kein rettoon im rekajjõjõ rej itok jãn Setan Tepil̦ eo. Kiiõ ijel̦ã bwe Jeova wõt emaroñ jipañ eõ bwe in ‘ekkõl im kõjparok’ bwe in maroñ tarin̦aeiki pija kein me rej jelõt l̦õmn̦ak ko aõ, bũruõ im mour in pãlele e aõ.” Antonio ear maroñ in anemkwõj jãn m̦anit in enana ãlikin an kar bõk jipañ. Men in ear bareinwõt jipañe bwe en jel̦ã kõjparok e make jãn apañ ko renanal̦o̦k.

Elukkuun alikkar bwe Baibõl̦ eo ej litok naanin tõl ko remaroñ jipañ kõj ñan kõjparok kõj jãn apañ ko rel̦l̦ap. Ak ta kõn apañ ko me em̦õj ad imminene kaki im epen ad julo̦ki? Jen lale ewi wãween an naanin Anij jipañ kõj ñan n̦amejal̦an men kein reppen.