Jar

4 Ta ko Jej Aikwij Jar Kaki?

KAR ba kin jar in bwe ej jar eo me enañin aolep dri Kristian ro ibelakin lal rej elijinmen ñe rej jar. Meñe men in emol ak jaab, ak ealikar bwe elõñ armij ebwid air melele kin jar eo an Jisõs, me ekkã air naetan Jar eo an Iroij. Elõñ million armij ro rej elijinmen jar in aolep ran, im bwelen rej kõmmane men in elõñ alen ilo juõn wõt ran. Bõtab, ejjab kar kõnan eo an Jisõs in. Ewi wãwen ad jelã?

Mokta jen an kar Jisõs kwalok kin jar in, ear ba: “Ñe komij jar, komin jab elij bata.” (Matu 6:7) Inem, Jisõs ear jab wõnmanlok im kwalok jar eo an bwe armij ro ren kiili im eliji nan ko ie. Ak, ear katakin kij kin ta ko jemaroñ jar kaki, im ear letok ñan kij juõn lajrak in men ko raurõk jej aikwij lemnak kaki ñe jej jar. Jen lukkun etale ta eo ear ba. Jar eo an ej bed ilo Matu 6:9-13.

 Katak in me ej kalikar ilo tukadu kin point ko relap kin jar eo an Jisõs ej kwalok kin jet wõt ian aolep men ko rekkar im jemaroñ jar kaki. Kememej ta eo 1 Jon 5:14 ej jiroñ kij kin Anij: “Elañe jej kajitõk iben kin jabrewõt men eo ekar ñõn ankil An, Ej roñjake kij.” Inem kwon jab inebata im bõk lemnak eo bwe abañ ko am rejjab aurõk ñan am jar kaki ñan Anij.—1 Piter 5:7.

Ak eaurõk ke ñãt eo im jikin eo jej jar ie?

“Jememuij i lõñ, En kwojarjar Etõm.”

Ilo wãwen in, Jisõs ear kakememej dri kalor ro an bwe rej aikwij jar wõt ñan Jeova. Bõtab, kwojelã ke etke etan Anij elap an aurõk im aikwij kokwojarjare?

Jen ien ko an armij ro moktata, kar katton ãt eo ekwojarjar etan Anij. Dri kijdrat eo an Anij, Setan, ear ba bwe Jeova ej juõn dri riab im juõn Iroij ekibbon, eo im ejjab tellokin an iroij ion menin kõmmanman ko An. (Jenesis 3:1-6) Elõñ rar kwalok air errã ibben Setan ilo air katakin armij ro bwe Anij ej juõn eo ejelok an yokwe, elej ak ba bwe Anij ejjab dri Kõmmanman eo. Ro jet rar kwalok air drike etan Jeova ilo air jolok ãt eo etan jen ukok in Baibel ko air im rar kemo an armij ro kajerbale etan.

Baibel eo ej kwalok bwe Anij enaj kajimwe aolep men kein rebwid. (Ezekiel 39:7, UBS) Ilo an kõmmane men in, enaj kabwe aolep aikwij ko am im kajimwe aolep abañ ko kwoj iioni. Ewi wãwen? Nan kein itulal ilo jar eo an Jisõs ej letok uak eo.

“En itok Am ailiñ.”

Rainin, elap an dri kaki ro an kabuñ ko bwok kin ta in Ailiñ eo an Anij. Bõtab, einwõt an kar dri roñjake ro an Jisõs jelã, dri kanan ro an Anij rar kanan jen ien ko etto bwe Messaia eo, dri Lomor eo Anij ear kãlet e, enaj iroij ilo juõn Ailiñ me enaj kõmman oktak ko ñan lal in. (Aiseia 9:6, 7; Daniel 2:44, UBS) Enaj kokwojarjar etan Anij ilo an kajjerwawaik riab ko an Setan, inem tokelik kokkure Setan im aolep jerbal ko an. Ailiñ eo an Anij enaj kajemlok tõrinae, nañinmij, ñitta, im bareinwõt mij. (Sam 46:9; 72:12-16; Aiseia 25:8; 33:24) Ñe kwoj jar bwe Ailiñ eo an Anij en itok, ilo mol kwoj jar bwe aolep kalimur kein ren jejjet kitieir.

“Ren kõmõnmõn ankil Am einwõt i lõñ, bareinwõt ion lõl.”

Nan kein an Jisõs rej kalikar bwe enaj mol an jejjet kitien ankilan Anij ion lal einwõt kar ilañ, ijo Anij ej bed ie. Ejelok en ear maroñ kabwijrak an jejjet kitien ankilan Anij ilañ, ijo Nejin Anij ear tõrinaek Setan im enjel ro rar rejetak e, im kar jolaltak ir ñan lal. (Reveles̃õn 12:9-12) Einwõt kajitõk ko ruo moktalok, kajitõk in kein kajilu ilo jar eo an Jisõs ej jibañ kij ñan ad lemnak wõt kin men eo eaurõktata, eo ej ankilan Anij im jab ankilad. Ien otemjej ej ankilan Anij ñan bõktok men ko remmõntata ñan aolep menin kõmmanman ko. Eñin unin, eman eo ewãppen Jisõs, ear ba ñan Jemen: “A en jab ankil Aõ a Am wõt.”—Luk 22:42.

“Kwon letok ñõn kim kijim ranin.”

Jisõs ear kwalok bwe jemaroñ bareinwõt jar kin aikwij ko ad. Ejjab nana ñan ad kajitõk ibben Anij kin men ko jej aikwiji ilo mour ko ad ran otemjej. Ilo mol, ad kõmmane men in ej kakememej kij bwe Jeova eo “Ej lelok ñõn otemjej mour, im menono, im men otemjelok.” (Jerbal 17:25) Baibel eo ej kwalok bwe Jeova ej juõn jemen eyokwe, eo ej mõnõnõ in lelok ñan ajiri ro nejin men ko rej aikwiji. Bõtab, einwõt juõn jemen emmõn, ejamin uake kajitõk ko me rejjab ñan tokjen eo air.

“Jolok amuij muri ibõm.”

Kwoj ke lukkun muri ñan Anij? Kwoj ke aikwiji an jeorlok bwid ko am? Elõñ armij ro rainin rejjab melele kin ta in jerawiwi im kin ewi joñan an nana. Bõtab, Baibel eo ej katakin kij bwe jerawiwi ej unjen men ko renana jej iioni, kinke ej un eo elap unin an armij ro mij. Kin ad kar lotak im jolit jerawiwi, elõñ alen kij aolep jej kõmmani men ko rebwid, im kejatrikrik eo ad kin ilju im jeklaj ej bedbed ion an Anij jeorlok bwid ko ad. (Dri Rom 3:23; 5:12; 6:23) Elap ad mõnõnõ ñan jelã bwe Baibel eo ej ba: “Kwe Iroij kwoj emõn, im kõnan jeõrlok” bwid ko.—Sam 86:5.

“Lomoren kim jen eo enana.”

Kwoj ke kile joñan an lap am aikwij bwe Anij en kejbãrok yuk? Elõñ rejjab tõmak bwe “eo enana,” Setan, ej juõn eo emol an bed. Bõtab Jisõs ear katakin bwe Setan ej juõn eo emour im ear naetan “iroij in lõl in.” (Jon 12:31; 16:11) Emwij an Setan kõmman bwe lal in, me ej bed iomin kajur eo an, en oktak im nana. Ej bareinwõt kõnan kokkure wãwen mour eo am im bõprae yuk jen am ejaake juõn kõtan ebak ibben Jeova. (1 Piter 5:8) Bõtab, elaplok an Jeova kajur jen Setan im ej mõnõnõ in kejbãrok ro rej yokwe E.