Ñe ruo armej relukkuun epaake doon, erro ej kõnnaan im bwebwenato ippãn doon. Im jekdo̦o̦n ñe erro ettol̦o̦k jãn doon ak erro ej kõnnaan wõt ippãn doon ikijjeen talboon, piitio, e-mail, ak lõta. Kõn men in, bwe jen maroñ epaake Anij, ej aikuj ikkutkut ad kõnnaan ippãn. Ewi wãween?

Jemaroñ kõnnaan ippãn Jeova ilo ad jar ñane. Bõtab wãween ad kõnnaan ippãn Anij ilo jar eoktak jãn wãween ad kõnnaan ippãn ro m̦õttad me dettad wõt er. Jej aikuj kile bwe ñe jej jar, jej jar ñan Rũkõm̦anm̦an eo ad, eo me Eutiejtata ilañ im ilal̦. Mel̦el̦ein men in bwe ñe jej jar ñane, jej aikuj lukkuun kwal̦o̦k kautiej. Bwe Anij en m̦õn̦õn̦õ kõn jar ko ad, ewõr men ko jej aikuj kõm̦m̦ani. Erkein ej jilu iaaer.

M̦oktata, ñe jej jar, jej aikuj jar ñan Jeova Anij wõt. Jejjab jar ñan Jijej, ro me rej n̦aetaer “saint,” ak ekjab ko. (Exodus 20:4, 5) Baibõl̦ ej ba: “Ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij.” (Pilippai 4:6) Kein karuo, ñe jej jar, jej aikuj jar ilo etan Jijej Kũraij, Nejin Anij. Jijej make ear ba: “Ña ial̦, im m̦ool, im mour. Ejjel̦o̦k armej ej itok ñan Jema, el̦aññe jab kõn Eõ.” (Jon 14:6) Kein kajilu, jar ko ad rej aikuj jejjet ekkar ñan ankilaan Anij. Baibõl̦ ej ba: “El̦aññe jej kajjitõk Ippãn kõn jabdewõt men eo ekkar ñan ankilaan, Ej roñjake kõj.” * (Lale kõmel̦el̦e eo itulal̦.)​—1 Jon 5:14.

Ruo armej reban epaake wõt doon el̦aññe juon wõt iaaerro ej kõnnaan aolep iien. Ruo armej me repaake doon rej jim̦or bwebwenato ippãn doon. Ejja ãindein jem̦jerã eo ad ippãn Anij. Jej aikuj bar kõtl̦o̦k bwe Anij en kõnnaantok ñan kõj im jej aikuj roñjake. Kwõjel̦ã ke ewi wãween an Anij kõnnaantok ñan kõj?

Jeova Anij ej “kõnnaantok” ñan kõj ikijjeen Naan ko an ilo Baibõl̦. (2 Timote 3:16, 17) Jejaam̦ ba men in? Eokwe, jen l̦õmn̦ak kõn waanjoñak in. Jen ba bwe juon eo me kwõlukkuun epaake ear jilkinwaj juon lõta ñan kwe. Ãlikin am̦ riiti, kwõlukkuun m̦õn̦õn̦õ im kwõj ba ñan ro jet bwe ej kab m̦õj am̦ bar roñ ennaan jãn eo m̦õttam̦. Meñe eo m̦õttam̦ ear jab pãd iturum̦ im kõnnaan ippam̦, ak kwaar maroñ roñ ennaan jãne ilo lõta eo ear je. Ear ãinwõt ñe ear kõnnaan waj ñan kwe. Ejja ãindein wõt ñe kwõj riit Baibõl̦. Kwõl̦ak riit Baibõl̦, ej ãinwõt ñe kwõj kõtl̦o̦k bwe Jeova en kõnnaan waj ñan kwe. Eñin unin, Gina, eo me kar kwal̦o̦k kake ilo katak eo jinointata, ear ba: “Ñe ikõn̦aan bwe Anij en watõk eõ bwe ij jeran, ij aikuj riiti ‘lõta’ eo an ñan kõj, Baibõl̦.” Im ear wõnm̦aanl̦o̦k im ba, “Il̦ak riit Baibõl̦ kajjojo raan, men in ekõm̦m̦an bwe in epaakel̦o̦k Anij.” Kwõj ke kõtl̦o̦k bwe Jeova en kõnnaan waj ñan kwe ilo am̦ riiti Naan ko an ilo Baibõl̦ kajjojo raan? Am̦ riit Baibõl̦ enaaj jipañ eok bwe kwõn epaakel̦o̦k Anij.