Kajjojo iiõ, kõmij bũriin im leto letak ñan armej elõñ milien Baibõl̦ im bok ko rej pedped wõt ioon Baibõl̦. Ilo pel̦aakin lal̦ in, kõmij make kalõk im loloorjaki jerbal ko ilo opij ko ammim ekoba jikin bũriin bok ko ammim. Elõñl̦o̦k jãn jibukwi to̦ujin eklejia ko ammim rej kweilo̦kl̦o̦k ilo im̦õn kabuñ ko am me rerreo im rem̦m̦an. Kõmij n̦aetan m̦õkein, Im̦õn Kweilo̦k. Wõn eo ej loloorjake on̦ãn aolep men kein?

Jããn in jipañ ko ammim ñan rejetake jerbal ko kõmij kõm̦m̦ani rej itok jãn an armej ro m̦õn̦õn̦õ in jabawõt. (2 Korint 9:7) Ilo katak eo kein karuo ilo kar Naan in Keeañ eo an 1879 eo, ej ba: “‘Ilo bok in Zion’s Watch Tower’ [eñin kar etan Naan in Keeañ in kar m̦okta] kõmij tõmak bwe JEOVA eo ej rejetak im jipañ kõm. Kõn men in, kwõban lo ilo bok in ej kajjitõk jããn jãn armej.” Ñan rainin, ejjañin de oktak l̦õmn̦ak eo ammim kõn men in.

Jabawõt kein jãn armej rej kajju jilkinl̦o̦k ñan juon iaan ra ko ammim ak rej likũti ilo bo̦o̦kin jabawõt ko ilo Im̦õn Kweilo̦k ko. Bõtab, kõmij jab ebbõk juon m̦õttan joñoul, tõltõl jabawõt, ak kõm̦m̦an on̦ãn bok ko am. Bareinwõt, doulul in ammim ejjab kõl̦l̦ãik on̦ãn ammim kwal̦o̦k naan, am kwal̦o̦k katak ilo iien kweilo̦k ko, ak kalõk im̦õn kweilo̦k ko ammim. Unin kõnke Jijej ear ba: “Em̦õj lewaj kõn ejjel̦o̦k on̦ãn, innem kom̦win lel̦o̦k im jab bõk on̦ãn.” (Matu 10:8, UBS) Ebar ejjel̦o̦k on̦ãn aolep ro rej jerbal ilo opij ko ammim im ilo ra eo ammim el̦ap ilo New York ekoba Kumi eo Ej Lale Aolep Eklejia ko an Ri Kõnnaan ro an Jeova.

Kõmij bar kõjerbali jããn in jipañ kein ilo iien ko ej wal̦o̦k jorrããn ko rel̦l̦ap. Kũrjin ro jinoin rar bar m̦õn̦õn̦õ in jipañ ro rar pãd ilo aikuj. (Rom 15:26, UBS) Ãinwõt rein, kõmij bar jipañ ro rej pãd ilo jorrããn im aikuj. Kõmij kalõk m̦õko im̦weer rar jorrããn, kalõk im̦õn kweilo̦k ko im jipañl̦o̦k er kijjeen taktõ, kijeer, kab ballier.