Ko te Atua pono te Kaihanga o ngā mea katoa. Kāhore tōna tīmatanga, kāhore rawa tōna mutunga. (Ngā Waiata 90:2) Ko ia te Puna o te rongo pai e kitea ana i roto i te Paipera. (1 Tīmoti 1:11) Nō te mea nāna tātou i hanga, me karakia tātou ki te Atua anake.​—Pānuitia Whakakitenga 4:11.

Kāhore rawa te Atua i kitea e tētahi tangata, he Wairua hoki ia, arā, kei runga noa atu ia i ngā mea kikokiko e noho nei ki te whenua. (Hoani 1:18; 4:24) Ahakoa rā, ka mōhio tonu tātou ki te āhua o te Atua i ngā mea nāna nei i hanga. Inā tonu, te maha o ngā hua rākau me ngā putiputi ka kōrero nei mō tōna aroha me tōna whakaaaro nui. Me te rahi o te ao tūroa ka kōrero nei mō tōna kaha.​—Pānuitia Rōma 1:20.

Ka āhei anō tātou te ako ki te āhua o te Atua mā te pānui i te Paipera. Hei tauira, kei te kōrero te Paipera mō ngā mea e pai ai te Atua me ngā mea e kino ai ia, he pēhea tōna āhua ki te tangata, he pēhea hoki tōna ngākau i ngā āhuatanga rerekē.​—Pānuitia Ngā Waiata 103:7-10.

I mea a Ihu: “E tō mātou Matua i te rangi, kia tapu tōu ingoa.” (Matiu 6:9) Ahakoa he maha ngā kupu karanga mō te Atua, kotahi anake tōna ingoa. He rerekē tōna whakahua ki tēnā reo, ki tēnā reo. Ki te reo Ingarihi ko “Jehovah” te tikanga whakahua. Heoi, ka whakahuatia e ētahi atu ko “Yahweh.”​—Pānuitia Ngā Waiata 83:18.

Kua tangohia te ingoa o te Atua i roto i ngā Paipera nunui, ā, kua whakakapia ki ngā kupu karanga o Ariki,  o Atua rānei. Engari i te wā i tuhituhia ai te Paipera, i roto anō te ingoa o te Atua e 7,000 ngā wā. I whakapuakina e Ihu taua ingoa i a ia e whakaako ana i ngā tāngata ki te Atua.​—Pānuitia Hoani 17:26.

Kei te whakaaro ētahi nā te nui o te mamae kāhore pea a Ihowa e aroha ki a tātou. E kī ana ētahi atu kei te whakamamae ia i a tātou, hei whakamātautau i a tātou, engari kāore e tika tērā.​—Pānuitia Hēmi 1:13.

Kua homai e te Atua ki te tangata te ngākau whiriwhiri. E koa ana tātou ki te whiriwhiri kia mahi ki te Atua, kia kaua rānei. (Hōhua 24:15) Heoi, e whiriwhiri ana te maha kia tūkino i ­ētahi atu, nā wai, tino kino ana te mamae. Ka pōuri tonu a Ihowa ki te kite i ēnei mahi kino.—Pānuitia Kēnehi 6:5, 6.

Ko Ihowa te Atua e aroha ana ki a tātou. E pai ana ia kia hari tātou i te ora. Poto ake nei ka whakamutua e ia te mamae me te hunga whakamamae. Mō nāianei ia, he take pai tōna e haere tonu nei te mamae mō te wā poto. Hei te Akoranga 8, ka ako tātou he aha taua take.—Pānuitia 2 Pita 2:9; 3:7, 13.

E maioha ana a Ihowa kia whakatata atu tātou mā te inoi ki a ia. Kei te whakaaro ia ki tēnā, ki tēnā o tātou. (Ngā Waiata 65:2; 145:18) E pai ana ia ki te muru hara. Kei te kite ia i ā tātou whakauaua e āhuareka mai ai ia, ahakoa hinga ai tātou i ētahi wā. Nā reira ahakoa he kī tonu tātou i te hara, ka taea rawa e tātou kia tino tata ki te Atua.​—Pānuitia Ngā Waiata 103:12-14; Hēmi 4:8.

Nō te mea nā Ihowa tātou i hanga, me matua aroha tātou ki a ia i mua i te aroha ki tētahi atu. (Māka 12:30) Ina ­whakapuaki koe i tōu aroha ki te Atua, mā te ako ki a ia me te mahi i tāna i tono ai, ka tino whakatata atu koe ki a ia.​—Pānuitia 1 Tīmoti 2:4; 1 Hoani 5:3.