ആരുടെ കരവിരുത്?
വെളിച്ചം ആഗിരണം ചെയ്യുന്ന ചിത്രശലഭത്തിന്റെ ചിറക്
സൗരോർജം ശേഖരിച്ചുവെക്കുന്ന ഉപകരണങ്ങളുടെ പ്രകാശസംഭരണശേഷി വർധിപ്പിക്കാൻ ശാസ്ത്രജ്ഞർ അതീവതത്പരരാണ്. ജൈവ ഇന്ധനങ്ങളായ പെട്രോൾ, ഡീസൽ, കൽക്കരി തുടങ്ങിയവയിലുള്ള മനുഷ്യവർഗത്തിന്റെ ആശ്രയം കുറയ്ക്കുക എന്നതാണ് അവരുടെ ലക്ഷ്യം. “ഈ പ്രശ്നത്തിനുള്ള പ്രതിവിധി ഇപ്പോൾ ഒരുപക്ഷേ . . . നമ്മുടെ കൺമുന്നിൽ പാറിപ്പറക്കുന്നുണ്ടാകാം” എന്ന് ഒരു ശാസ്ത്രജ്ഞൻ പറയുകയുണ്ടായി.
സവിശേഷത: തണുപ്പുകാലങ്ങളിൽ ചൂട് നിലനിറുത്താനായി ചിത്രശലഭങ്ങൾ ചിറകു വിടർത്തി വെയിൽകായാറുണ്ട്. സ്വാളൊടൈൽ വർഗത്തിലെ ചില ഇനം ചിത്രശലഭങ്ങളുടെ ചിറകുകൾക്ക് സൂര്യപ്രകാശം പിടിച്ചുവെച്ച് ആഗിരണം ചെയ്യാനുള്ള ശ്രദ്ധേയമായ പ്രാപ്തിയുണ്ട്. ഈ പ്രാപ്തി ഒളിഞ്ഞിരിക്കുന്നത് അതിന്റെ കടുത്ത നിറത്തിൽ മാത്രമല്ല മറിച്ച് ചിറകുകളെ ആവരണം ചെയ്തിരിക്കുന്ന സൂക്ഷ്മമായ ശല്ക്കങ്ങളുടെ ഘടനയിലും കൂടിയാണ്. അവ ഒന്നിനുമേൽ ഒന്നായാണ് ക്രമീകരിച്ചിരിക്കുന്നത്. ശല്ക്കങ്ങളിലാകട്ടെ തേനീച്ചക്കൂടുകളിലെ അറകൾപോലെയുള്ള സുഷിരങ്ങളുടെ പല നിരകളുണ്ട്. ഈ സുഷിരങ്ങളെ തമ്മിൽ വേർതിരിക്കുന്ന തലതിരിച്ച V-ആകൃതിയിലുള്ള വരമ്പുകൾ അവയിലേക്കു വെളിച്ചം കടത്തിവിടുന്നു. ചിത്രശലഭത്തിന്റെ ചിറകുകളുടെ വിദഗ്ധമായ ഈ രൂപകല്പന, കടന്നുവരുന്ന സൂര്യപ്രകാശത്തെ പിടിച്ചുവെക്കാൻ സഹായിക്കുന്നു. അതിന്റെ ഫലമായി ചിറകുകൾ കടുംകറുപ്പാകുകയും അങ്ങനെ അത്ഭുതകരമായ വിധത്തിൽ ചിത്രശലഭത്തിനു ചൂടേകുകയും ചെയ്യുന്നു.
“പ്രകൃതിയിൽ കാണുന്ന ഏറ്റവും മൃദുലമായ ഘടനകളിൽ ഒന്നായിരിക്കാം ചിത്രശലഭത്തിന്റെ ചിറകുകൾ. എന്നിരുന്നാലും, ഒരു നൂതന സാങ്കേതികവിദ്യ കണ്ടുപിടിക്കാൻ ഇതു ഗവേഷകർക്ക് ശക്തമായ പ്രചോദനം നൽകിയിരിക്കുന്നു. ജലവും സൂര്യപ്രകാശവും ഉപയോഗിച്ച് ഹൈഡ്രജൻ വാതകം (ഭാവിയിലെ പരിസ്ഥിതിസൗഹൃദ ഇന്ധനം) ഇപ്പോഴത്തേതിലും ഇരട്ടിയോളം ഉത്പാദിപ്പിക്കാൻ ഈ സാങ്കേതികവിദ്യയിലൂടെ കഴിഞ്ഞേക്കും” എന്ന് ഒരു വാർത്താ വെബ്സൈറ്റ് പറയുന്നു. കൂടാതെ, വെളിച്ചത്തിന്റെ സാന്നിധ്യം തിരിച്ചറിയാനാകുന്ന ഉപകരണങ്ങൾ, സൗരോർജ സെല്ലുകൾ എന്നിവ നിർമിക്കാനും ഈ വിദ്യ പ്രയോജനപ്പെടുത്താനാകും.
നിങ്ങൾക്ക് എന്തു തോന്നുന്നു? വെളിച്ചം ആഗിരണം ചെയ്യാൻ പര്യാപ്തമായ ചിത്രശലഭത്തിന്റെ ചിറക് രൂപപ്പെട്ടത് പരിണാമപ്രക്രിയയിലൂടെയാണോ? അതോ ആരെങ്കിലും അത് രൂപകൽപ്പന ചെയ്തതാണോ? ▪ (g14-E 08)