KAMBʼAL 2
Maki a Dʼioso?
1. Kʼuʼkaʼa kaʼ ti tzʼaaʼ u yanil a Dʼioso?
Leʼek a jajil Dʼios leʼek u Bʼetaj tulakal a bʼaʼal. Maʼ yan u kajeebʼ y maʼ yan u jobʼeebʼ. (1 Timoteo 1:17) Etel walak u talel a kichʼpan pektzil a yan ich Bʼibʼle. (1 Timoteo 1:11) U men u tzʼaj ti kuxtal a Dʼioso, jadʼi leʼek a kaʼ ti tzʼaaʼ u yanil. Xoko Apocalipsis 4:11.
2. Bʼikiʼ a Dʼioso?
Maʼax mak u yilaʼ a Dʼios u men espiritu, u nukul ti bʼoobʼeʼ leʼek a mas kaʼnal u yanil tuwich a kuxtal a yan yokʼolkabʼ. (Juan 1:18; 4:24) Ti bʼoobʼeʼ, jedʼeʼek ti naʼtik u modʼo a Dʼios etel a bʼaʼal u bʼetaj. Por ejemploj, etel junjunpaay u wich cheʼ y topʼ walak u yeʼik ti yan u yakunaj y u tukul. Etel u noxiʼil a yokʼolkabʼ y a kaʼan walak u yeʼik toʼon ti yan u mukʼ. Xoko Romanos 1:20.
Jedʼeʼek ti mas kambʼaltik u modʼo a Dʼios tanil ti xokik ti Bʼibʼle. Por ejemploj, a Dʼioso walak u yadʼik toʼon kʼuʼ a kiʼ y maʼ kiʼ tuwich, bʼikiʼ ti walak u tratartik a kristiyaano, y bʼikiʼ ti walak u yilik a kadʼa bʼaʼal. Xoko 1 Juan 4:8; Santiago 4:6.
3. Yan wa u kʼabʼaʼ a Dʼioso?
A Jesus u yadʼaj: «Tat a queʼenech ti caʼan, ti cʼati cuchi caʼ tzʼocsabüc u yanil a cʼabaʼ.» (Mateo 6:9) Kaʼax yaabʼ u chʼibʼal a Dʼioso, yan junpʼelik u kʼabʼaʼ. Ichil a kadʼaj tʼan, jujunpaay u yadʼabʼäl. Ich Ingles «Jehovah» ti walak u yadʼabʼäl. Pero yan tuyaam walakooʼ u yadʼik ti «Yahweh.» Xoko Salmo 83:18.
Ichil u masil a Bʼibʼle u jokʼsajooʼ u kʼabʼaʼ a Dʼioso y jelbʼi etel a chʼibʼal Noochil wa xan Dʼios. Pero leʼek ti tzʼiibʼaan a Bʼibʼle, yan u kʼabʼaʼ a Dʼios u mukʼ 7,000 sut. A Jesus u kaʼansajooʼ a kristiyaano etel u jajil u pektzil a Dʼios y u kʼabʼaʼ. Xoko Juan 17:26.
Cha’ante a vid’eo’ Yan Wa U K’ab’a’ a D’ioso?
4. Walak wa u känäntikoʼon a Dʼioso?
Jabʼix a tattzil adʼaʼa, a Dʼioso tan u bʼetik a kiʼ ti toʼon
Etel tulakal a yajil a tana, u nukul wa abʼeʼe ti Dʼios Jehovah maʼ tan u känäntikoʼon? Yan mak walakooʼ u yadʼik ti leʼek walak u tzʼeek a yajil ti kaʼ u yaaltoʼon, pero maʼ jaj abʼeʼe. Xoko Santiago 1:13.
Chaʼkʼäʼ ti tulakal mak u men Dʼios ti kaʼ u bʼeteʼ u tukul a jujuntuul. Maʼ wa kiʼ ti wool ti chaʼkʼäʼoʼon ti kaʼ ti käxte ti tzʼaaʼ u yanil a Dʼioso? (Josue 24:15) Pero yaabʼ mak walak u käxtik u bʼetik a kʼas tiʼi a yanal, mentäkä mas u yaabʼtal a yajilal. Walak u yajkuntik u yool a Jehovah ti walak u yilik a maltratarbʼäl. Xoko 1 Pedro 5:7.
Jehovah leʼek a Dʼios a walak u känäntikoʼon. U kʼati kaʼ ti ilaʼ u kiʼil a kuxtal. Seebʼaʼan u jobʼsik tulakal a yajil y etel mak walakooʼ u bʼetik. Chumen yan kʼuʼkaʼa tan u chaʼik u yantal a yajil ti tzʼeek tiempo. Ichil a kambʼal 8, bʼel ti kaʼ ti kambʼalte kʼuʼkaʼa ti bʼoobʼeʼ. Xoko 2 Pedro 2:9; 3:7, 13.
5. Bʼikiʼ ti jedʼeʼek ti natzʼtal tutzeel a Dʼioso?
Jehovah tan u päyikoʼon kaʼ natzʼakoʼon tutzeel tanil ti tzikbʼal ich payajchiʼ tiʼi. U kʼatiʼ u yaantoʼon a jujuntuul. (Salmo 65:2; 145:18) Listoj ti saʼtesaj. Walak u yilik ti walak ti yaaltik ti wich ti bʼeteʼ a kiʼ tiʼi, kaʼax walak ti kʼaxäl yan ti kʼin, kaʼax a sipʼiloʼon, jedʼeʼek ti wilik u kiʼil a natzʼtal tutzeel a Dʼioso. Xoko 1 Juan 5:14.
Kaʼ ti mas yakunte a Jehovah tuwich u laakʼ mak, u men leʼek u tzʼajtoʼon a kuxtal. (Marcos 12:30) Leʼek ti tan a yeʼik a yakunaj tiʼi a Dʼioso, tanil a mas kambʼaltik u pektzil y a bʼetik a tan u kʼaatik, bʼel a kaʼa ti mas natzʼtal tutzeel. Xoko Efesios 1:17; 1 Juan 5:3.
