Yaa vẽeneg t’a Mikayɛll b sẽn boond tũudum kẽer pʋgẽ t’a “Misɛll Sõngã” yaa yʋʋr b sẽn pʋd a Zeezi nand t’a wa tẽngã zugu, la a sẽn leb saasẽ wã poore. a A Mikayɛll wẽe no-koeemd ne a Sʋɩtãan a Moyiiz kũumã poore. A leb n sõnga malɛk t’a taas no-rɛɛs a Dãniyɛll Wẽnnaam koɛɛga. (Dãniyɛll 10:13, 21; Ziid 9) A Mikayɛll tʋmdame tɩ zemsd ne a yʋʋrã sẽn dat n yeel tɩ “Ãnda n yaa wa Wẽnnaamã,” n teend Wẽnnaam naamã la a zabd ne Wẽnnaam bɛɛbã.—Dãniyɛll 12:1; Vẽnegre 12:7.

 D ges bũmb nins sẽn kɩt tɩ d tõe n yeel tɩ yaa a Zeezi la malɛgsã naab a Mikayɛllã.

•   A Mikayɛll yaa “malɛgsã naaba.” (Ziid 9) Yaa Biiblã vɛrse-rãmb a yiib pʋgẽ bal la gom-biis nins sẽn yaa “malɛgsã naab” sẽn dat n yeel tɩ “malɛgsã taoor soabã” be-yã. Vɛrse-rãmb a yiibã fãa pʋgẽ, b gomda naab a yembr yelle, tɩ wilgdẽ tɩ malɛk a yembr n yaa malɛgsã naaba. Vɛrse-kãens sʋkã, a yembr n gom Zu-soab a Zeezi sẽn vʋʋgã yell n yeel t’a “na n yii saasẽ n sigd la a kõt noy ne malɛgs naab koɛɛga.” (1 Tesalonik rãmbã 4:16) A Zeezi tara “malɛgs naab koɛɛga,” bala yẽ n yaa malɛgsã naab a Mikayɛlle.

•   A Mikayɛll lʋɩta malɛgs sẽn yaa tãb-biis taoore. “A Mikayɛll ne a malɛgsã zaba ne wag-bedrã,” rat n yeel t’a Sʋɩtãana. (Vẽnegre 12:7) A Mikayɛll tara naam wʋsg malɛgsã sʋka, bala b yeelame t’a yaa “na-kãseng a ye,” la “na-kãsenga.” (Dãniyɛll 10:13, 21; 12:1) B sẽn boond a Mikayɛll ne naam-yʋ-kãensa wã wilgdame tɩ yẽ n yaa “malɛgsã taoor soab ning sẽn tar naam n yɩɩdã,” wa Biibl-mit a David Aune sẽn yeelã.

   Biiblã pʋgẽ, a Mikayɛll sẽn yãk a toogo, b pʋda nin-yɛng yʋʋr n wilg t’a tara naam malɛgs sẽn yaa tãb-biis sʋka. B yeelame tɩ ‘Zu-soab a Zeezi na n puka saasẽ ne a malɛgsã sẽn tar pãngã,’ t’a “na n puka bug-witim pʋgẽ n sɩbg neb nins sẽn pa mi Wẽnnaamã.” (2 Tesalonik rãmbã 1:7, 8; Matiye 16:27) A Zeezi “kẽnga saasẽ, la Wẽnnaam kɩtame tɩ malɛgsã ne pãn-soaadbã la pãens rãmbã sakd-a.” (1 Pɩyɛɛr 3:21, 22) Zemsame tɩ d tags tɩ Wẽnnaam kɩtame t’a Zeezi ne a Mikayɛll yaa malɛg-sõamyã wã taoor dãmba, n wagsd taab sɩda? Ayo. Dẽnd zemsame tɩ d tags tɩ Zeezi wã ne Mikayɛllã fãa yaa yʋy b sẽn pʋd nin-yɛnga.

•   A Mikayɛll ‘na n yika’ “toog wakat” sẽn pa na n tall to sasa. (Dãniyɛll 12:1) Dãniyɛll sebrã pʋgẽ, b sã n gomd “yikr” yelle, wae n bilgda rĩm sẽn na n yik n maan bũmb takɩ yelle. (Dãniyɛll 11:2-4, 21) A Zeezi Kirist b sẽn boond tɩ “Wẽnnaam Gomdã” na n yik n maana bũmb takɩ, a sẽn yaa “Rĩm-dãmb Rĩmã” yĩnga. A na n sãama Wẽnnaam bɛɛbã fãa, la a kogl Wẽnnaam nin-buiidã. (Vẽnegre 19:11-16) A na n maana rẽ “to-kãsengã” sasa, to-kãseng ‘buud sẽn zɩ n zĩnd hal dũniyã sɩngrã’ sasa.—Matiye 24:21, 42.