“A Zeova Kaset rãmbã ra pa nong nebã bal ye. B ra nonga m baasã me. Daar a ye, a Elɛn sẽn da yas perzãntoaarã sɛɛgẽ wã kõo m baas a yiibã biskui-rãmba. Rẽ poore, m sã n wa pɩʋʋgd be fãa, m baasã tɛta maam n kẽngd b nengẽ.

“B maana woto n kaoos kiisi. Baasã ra nonga biskui-rãmbã b sẽn paamdã, tɩ ma-me sũur da noom ne m sẽn paamd n sõsd ne a Zeova Kaset rãmbã koɛɛg-koɛɛgã. La m da pa rat n sõsd ne-b wʋsg-wʋsg ye. M da yɩɩda yʋʋm 70, la m da pa mi a Zeova Kaset rãmbã sẽn tẽed bũmb ninsã me ye. M sũurã sẽn da sãam ne tũudum a taabã yĩnga, m da tagsdame tɩ m sẽn zãmsd Biiblã m yembr n são.

“Sasa-kãng me, m da yãta a Zeova Kaset rãmb a taab sẽn mi n yas ne perzãntoaar-dãmba, tẽngã zĩis a taaba. Bãmb me ra nonga neba. B sẽn da nong n tikd Biiblã n leokd m sogsgã kɩtame tɩ m maneg n kɩs-b sɩda.

“Daar a ye, a Elɛn soka maam yaa: ‘Fo tẽedame tɩ rũmsã yaa Wẽnnaam kũun bɩ?’ M leok-a lame yaa: ‘N-ye, m tẽeda rẽ ne m sũur fãa. Rẽ poore, a Elɛn wilga maam Ezayi 11:6-9. Wakat-kãng tɛka, m da rat n bãnga Biiblã sẽn yetã, la m da ket n pa rat n deeg b sɛbã ye.

“Rẽ poore, m da ket n kẽngda a Elɛn ne a sɩda a Brẽnt nengẽ tɩ d sõsd Biiblã zug hal tɩ noogd m sũuri. B yeela maam tɩ m sã n karem Matiye sebrã n tãag Tʋʋm sebrã, m bãngda kiris-ned hakɩɩk sẽn segd n yɩ to-to. M sɩd maana woto. Rẽ poor bilfu, m sakame t’a Brẽnt ne pag a Elɛn sɩng Biiblã zãmsg ne maam. Ra yaa yʋʋmd 2016 pʋɩ-sʋka.

“M da nonga m sẽn da paam n zãmsd Biiblã semen fãa wã, la m kẽnd tigissã. M sũur da nooma wʋsg ne bũmb nins fãa m sẽn da bãngd Biiblã zugã. Yʋʋmd poore, m deega lisg n lebg a Zeova Kaset soaba. M tara yʋʋm 79 masã, la m miime tɩ m bee sɩdã pʋgẽ. A Zeova sẽn sak tɩ m naag a nin-buiidã sẽn yaa wa zak a ye neb n be dũniyã gill zugã sɩd yaa bark tɛkẽ.”