2 Għajnuna biex issolvi l-problemi
Xi problemi tal-ħajja għandhom it-tendenza li jibqgħu magħna, kultant anki għal snin sħaħ. Dawn għandhom mnejn iqabbdu l-għeruq qabel ma nkunu konxji sew tagħhom. Tagħtina għerf il-Bibbja biex insolvu problemi bħal dawn li jġibu frustrazzjoni? Ikkunsidra xi eżempji.
LI TINKWIETA ŻŻEJJED
Rosie tgħid, “Kont nibqaʼ ninkwieta dwar affarijiet li fl-immaġinazzjoni tiegħi kienu qed jiggravaw iktar milli fir-realtà kienu.” X’versi mill-Bibbja kienu t’għajnuna? Wieħed minnhom hu dak taʼ Mattew 6:34: “Għalhekk, qatt tkunu ansjużi dwar l-għada, għax l-għada se jkollu l-ansjetajiet tiegħu. Hu biżżejjed għal kull ġurnata l-ħażen tagħha.” Il-ġurnata tal-lum, Rosie tgħid li dan il-kliem taʼ Ġesù għenha tieqaf tinkwieta dwar x’jistaʼ jiġri l-għada. Hi żżid tgħid, “Kelli biżżejjed problemi, ma kienx hemm għalfejn li ninkwieta dwar is-sitwazzjonijiet li ma kinux ġraw u li wisq probabbli ma kinux se jiġru.”
Anki Yasmine ħasset li kienet qed taħkimha l-ansjetà. “Kont nagħmel xi ġranet nibki matul il-ġimgħa, u f’xi ljieli ma kontx inkun nistaʼ norqod. Kont inħoss li l-ħsibijiet negattivi kienu qed joqtluni bil-mod il-mod.” Liema skrittura kienet t’għajnuna? Hi tirreferi għal dik tal-1 Pietru 5:7: ‘Itfgħu l-ansjetà kollha tagħkom fuq Alla, għax hu jimpurtah minnkom.’ Yasmine tgħid: “Hekk kif għadda ż-żmien, bqajt nitlob lil Ġeħova, u hu wiġibli t-talb tiegħi. Ħassejt bħallikieku tneħħietli għoqla minn fuq l-istonku. Kultant, il-ħsibijiet negattivi tiegħi jerġgħu jiġu, imma issa naf x’għandi nagħmel.”
TĦALLI GĦALL-AĦĦAR
Żagħżugħa li jisimha Isabella tgħid: “Naħseb li wieħed jittratieni hi xi ħaġa li tintiret għax missieri hekk jagħmel ukoll. Kont inwarrab affarijiet importanti sabiex ma nagħmel xejn speċjali—kemm nirrilassa jew noqgħod nara t-televixin. Huwa vizzju ikrah għax iżid mal-istress, u dak li jkun jispiċċa jagħmel xogħol taʼ kafkaf.” Prinċipju li għenha hu fit-2 Timotju 2:15, li jgħid: “Agħmel l-almu tiegħek biex tidher quddiem Alla bħala bniedem approvat, ħaddiem li m’għandux minn xiex jistħi.” Isabella tgħid, “Ma ridtx li Ġeħova jistħi minħabba x-xogħol li nagħmel għas-sempliċi fatt li qgħadt inħalli għall-aħħar.” Hi tjiebet f’dan.
B’mod simili, Kelsey tgħid: “Kien ikolli proġett u kont inħallih għall-aħħar minuta. Kont nispiċċa nibki, ma norqodx, u noqgħod ninkwieta. Ma kienx qed jagħmilli ġid.” Kelsey sabet l-għajnuna fi Proverbji 13:16: “Kulmin hu prudenti se jaġixxi bl-għarfien, imma min hu stupidu se jxerred il-bluha maʼ kullimkien.” Hi tispjega x’tgħallmet billi immeditat fuq dan: “Ikun jaqbillek li tkun prattika u li tippjana minn qabel. Issa għandi djarju li nżomm fuq id-desk biex norganizza x-xogħol tiegħi, u dan jgħinni norganizza ruħi, u mhux noqgħod nitnikker.”
LI TĦOSSOK WAĦDEK
“Żewġi telaqni u ħallieni b’erbat itfal żgħar,” tirrakkonta Kirsten. Liema prinċipju Skritturali għenha? Proverbji 17:17 jgħid: “Ħabib veru jħobb il-ħin kollu; huwa ħu mwieled għal meta jkun hemm in-niket.” Kirsten fittxet l-għajnuna minn dawk li bħalha wkoll jaqdu lil Ġeħova. X’sabet? “Ħbiebi ħadu ħsiebi b’ħafna modi! Xi wħud ħallewli xi xirja u fjuri fuq l-għatba tal-bieb. Xi wħud minnhom tliet darbiet għenu lili u t-tfal biex inġorru minn dar għal oħra. Xi ħadd ieħor għenni nsib xogħol. Il-ħbieb tiegħi dejjem sibthom hemm għalija.”
Delphine, li ssemmiet qabel, bl-istess mod sabitha diffiċli biex tkampa mas-solitudni. Wara dak kollu li tilfet, hi tiftakar: “Kont inħoss li ħaddieħor baqaʼ għaddej bil-ħajja, imma jien bqajt waħdi u mdejqa.” Skrittura li għenitha kienet dik taʼ Salm 68:6: “Lil dawk mitluqin għalihom waħedhom, Alla tahom dar fejn jgħammru.” Hi tispjega: “Kont naf li l-vers ma jfissirx biss dar f’sens letterali issa. Anzi rrealizzajt li Alla joffrilna dar spiritwali, post taʼ sigurtà vera li fih ħbieb taʼ veru u nies li tistaʼ torbot qalbek magħhom li jħobbu lil Ġeħova. Imma kont naf li ma stajtx inkun eqreb t’oħrajn jekk l-ewwel ma nkunx eqreb taʼ Ġeħova. Allura sibt t’għajnuna Salm 37:4 li jgħid: ‘Tgħaxxaq b’Ġeħova bil-kbir, u hu jagħtik dak li tixtieq qalbek.’”
Hi tikkonkludi: “Irrealizzajt li kelli bżonn nintrabat iktar b’mod sod maʼ Ġeħova. Hu l-aqwa Ħabib. Imbagħad għamilt lista t’affarijiet li nieħu pjaċir nagħmel m’oħrajn. B’hekk, stajt nagħmel ħbieb maʼ nies li wkoll kienu jħobbu lil Ġeħova. Tgħallimt nara t-tajjeb f’oħrajn u tgħallimt ma nagħtix kas id-difetti tagħhom.”
Ovvjament, ħbieb li jaqdu lil Alla għadhom imperfetti. Ix-Xhieda taʼ Ġeħova jħabbtu wiċċhom mal-problemi bħal kulħadd. Imma taħriġ mill-Bibbja jimmotiva n-nies biex jgħinu lil oħrajn kull meta jkun possibbli. Ikun għaqli li tagħmel ħbieb bħal dawn. Però, jistgħu l-prinċipji tal-Bibbja jgħinu wkoll fil-problemi li ma jistgħux jissolvew illum, bħall-mard kroniku u n-niket?
Li tapplika l-pariri tal-Bibbja jistaʼ jgħinek issib ħbieb li jappoġġjawk