Il-Ġudizzji t’Alla—Juru li Alla Kien Kattiv?
SABIEX inwieġbu din il-mistoqsija, ejja nikkunsidraw fil-qosor żewġ eżempji taʼ ġudizzji t’Alla li nsibu fil-Bibbja—id-Dilluvju taʼ żmien Noè u l-qerda tal-Kangħanin.
ID-DILLUVJU TAʼ ŻMIEN NOÈ
DAK LI JGĦIDU XI NIES: “Alla kien kattiv meta ġab dilluvju li qered lill-bnedmin kollha minbarra Noè u familtu.”
DAK LI TGĦID IL-BIBBJA: Alla qal: “Jien mhux bil-mewt tal-ħażin nitgħaxxaq imma b’li xi ħadd ħażin idur lura minn triqtu u jibqaʼ jgħix.” (Eżekjel 33:11) Għalhekk, il-qerda tan-nies mill-agħar fi żmien Noè xejn ma tgħaxxaq biha Alla. Allura għala qeridhom?
Il-Bibbja twieġeb li meta Alla ġab ġudizzju bħal dan fuq nies mill-agħar fil-passat kien qed ‘iħalli mudell taʼ dak li għandu jiġri’ lill-bnedmin bla devozzjoni lejn Alla. (2 Pietru 2:5, 6) Alla liema mudell ħalla?
L-ewwel nett, Alla wera b’mod ċar li avolja ma jitgħaxxaqx bil-qerda tan-nies, hu jinnota n-nies kattivi li jikkaġunaw it-tbatija u jitlob kont minnhom għal dak li jagħmlu. Maż-żmien se jtemm l-inġustizzja u t-tbatija kollha.
It-tieni nett, il-mod kif aġixxa Alla fil-passat juri b’mod ċar li hu bi mħabba jwissi lin-nies qabel ma jġib il-ġudizzju fuqhom. Noè kien predikatur tal-ġustizzja, imma l-maġġoranza tan-nies injorawh. Il-Bibbja tgħid: “Ma tawx kas sakemm ġie d-dilluvju u kinishom ilkoll.”—Mattew 24:39.
Alla żamm maʼ dan il-mudell? Iva. Pereżempju, wissa lill-poplu tiegħu Iżrael li jekk iduru lejn il-ħażen, kif għamlu l-ġnus taʼ madwarhom, kien se jippermetti li xi għedewwa jinvadu pajjiżhom; jeqirdu l-belt kapitali tagħhom, Ġerusalemm; u jiħduhom fl-eżilju. L-Iżraelin xorta daru lejn il-ħażen—u anke kienu joffru t-tfal bħala sagrifiċċju. Aġixxa Ġeħova? Dażgur, imma dan għamlu biss wara li bagħat lill-profeti ħalli jwissu lill-poplu tiegħu, darba wara l-oħra, biex ibiddlu triqathom qabel ma jkun tard wisq. Saħansitra qal: “Il-Mulej Sovran Ġeħova ma jagħmel xejn jekk ma jkunx irrivela l-ħaġa kunfidenzjali tiegħu lill-qaddejja tiegħu l-profeti.”—Għamos 3:7.
KIF INT INVOLUT: Il-mudell li naraw fil-ġudizzji tal-passat t’Alla jnissel fina t-tama. B’fiduċja nistgħu Salm 37:9-11) X’jidhirlek int minn ġudizzju li jneħħi t-tbatija tal-umanità? Ikun att kattiv, jew ħanin?
nħarsu ’l quddiem għal meta Alla jġib ġudizzju fuq in-nies kattivi li jikkaġunaw it-tbatija. Il-Bibbja tgħid: “Dawk li jagħmlu l-ħażen se jitqaċċtu ’l barra . . . Imma l-ġwejdin se jirtu l-art, u bi sliem kotran jitgħaxxqu ferm.” (IL-QERDA TAL-KANGĦANIN
DAK LI JGĦIDU XI NIES: “Il-qerda tal-Kangħanin kienet delitt kattiv tal-gwerra li jistaʼ jitqabbel mal-ġenoċidji li jsiru fi żmienna.”
DAK LI TGĦID IL-BIBBJA: ‘It-triqat kollha t’Alla huma ġustizzja. Hu Alla taʼ fedeltà, li miegħu m’hemm ebda inġustizzja.’ (Dewteronomju 32:4) Ma tistax tqabbel att taʼ ġudizzju t’Alla maʼ gwerra umana. Għala? Għax kuntrarju għall-bnedmin, Alla kapaċi jaqra l-qlub—jiġifieri, jaf bniedem x’inhu verament minn ġewwa.
Pereżempju, meta Alla ġġudika l-bliet taʼ Sodoma u Gomorra u ddeċieda li jagħmilhom rovina, ir-raġel leali Abraham ried ikun ċert li d-deċiżjoni t’Alla kienet ġusta. Ma kienx jgħaddilu minn moħħu li l-Alla ġust tiegħu kien se ‘jeqred lin-nies sewwa maʼ dawk li huma mill-agħar.’ Bil-paċenzja, Alla serraħlu moħħu li anke jekk kien hemm għaxar bnedmin sewwa f’Sodoma, Hu ma kienx se jagħmel ħerba mill-belt minħabba fihom. (Ġenesi 18:20-33) Jidher ċar li Alla għarbel il-qlub taʼ dawk in-nies u ra kemm kienu mill-agħar.—1 Kronaki 28:9.
Bl-istess mod, Alla ra li l-Kangħanin kienu mill-agħar u kellu raġun jordna li jiġu meqrudin. Il-Kangħanin kienu magħrufin sew għal kemm kienu kattivi—fost affarijiet oħrajn kienu jaħarqu lit-tfal ħajjin fis-sagrifiċċji bin-nar. * (2 Slaten 16:3) Il-Kangħanin kienu jafu li Ġeħova kien ikkmanda lill-Iżraelin biex jieħdu l-art kollha taħt idejhom. Dawk li għażlu li jibqgħu fil-pajjiż u jiggwerraw kontrihom ma kinux biss qed jopponu apposta lill-Iżraelin imma wkoll lil Ġeħova, li kien wera ċar u tond li kien mal-poplu tiegħu.
Iktar minn hekk, Alla kien lest li jħenn għal dawk il-Kangħanin li ħallew warajhom l-atti mill-agħar tagħhom u aċċettaw il-livelli morali għoljin taʼ Ġeħova. Pereżempju, il-prostituta Kangħanija, Raħab, ġiet salvata flimkien mal-familja tagħha. Ukoll, meta l-abitanti tal-belt Kangħanija, Gibegħon, talbu li jintwerew ħniena, huma u wliedhom tħallew jgħixu.—Ġożwè 6:25; 9:3, 24-26.
KIF INT INVOLUT: Nistgħu nitgħallmu lezzjoni vitali mill-ġudizzju fuq il-Kangħanin. Aħna resqin b’ħeffa liema bħalha lejn “jum il-ġudizzju u l-qerda taʼ nies bla devozzjoni lejn Alla” li hu mbassar fil-Bibbja. (2 Pietru 3:7) Jekk inħobbu lil Ġeħova se nibbenefikaw meta jelimina t-tbatija umana billi jneħħi minn fuq l-art lil dawk li jiċħdu l-ħakma ġusta tiegħu.
Il-Kangħanin kienu magħrufin sew għal kemm kienu kattivi, u opponew apposta lil Alla u lill-poplu tiegħu
Bi mħabba, Ġeħova jfakkarna li l-għażliet li jagħmlu l-ġenituri jeffettwaw lil uliedhom. Il-Kelma t’Alla tgħid: “Trid tagħżel il-ħajja sabiex tibqaʼ ħaj, int u nislek, billi tħobb lil Ġeħova Alla tiegħek, billi tismaʼ minn leħnu, u billi tintrabat miegħu.” (Dewteronomju 30:19, 20) Hu dan kliem t’Alla kattiv jew kliem t’Alla li jħobb lin-nies u jridhom jagħmlu l-għażla t-tajba?
^ par. 15 L-arkeoloġi sabu fdalijiet li juru li l-qima Kangħanija kienet tinkludi l-issagrifikar tat-trabi.