Kif insir wieħed mix-Xhieda taʼ Ġeħova?
Il-passi li għandek tagħmel biex issir wieħed mix-Xhieda taʼ Ġeħova huma deskritti minn Ġesù u tistaʼ ssibhom f’Mattew 28:19, 20. Is-silta tenfasizza x’għandu bżonn jagħmel dak li jkun biex isir dixxiplu taʼ Kristu, u dan jinvolvi li jitkellem, jew jagħti xhieda, dwar Ġeħova.
L-1 pass: Sir af x’tgħallem il-Bibbja. Ġesù ordna lis-segwaċi tiegħu biex ‘jagħmlu dixxipli u jgħallmuhom.’ (Mattew 28:19, 20) Il-kelma tradotta “dixxiplu” letteralment tfisser “wieħed li jitgħallem.” Il-Bibbja, speċjalment it-tagħlim taʼ Ġesù Kristu, fiha l-informazzjoni meħtieġa biex ikollok ħajja ferħana u sodisfaċenti. (2 Timotju 3:16, 17) Aħna nieħdu pjaċir ngħinuk issir taf dak li tgħallem il-Bibbja permezz taʼ studju tal-Bibbja b’xejn.—Mattew 10:7, 8; 1 Tessalonikin 2:13.
It-2 pass: Ipprattika dak li titgħallem. Ġesù qal ukoll lil dawk li qed jitgħallmu li għandhom ‘josservaw dak kollu li ordnalhom.’ (Mattew 28:20) Dan ifisser li l-istudju tiegħek tal-Bibbja għandu jkun iktar milli sempliċiment tikseb għarfien ġdid—jaf ukoll ikollok tagħmel bidliet sinifikanti fil-mod kif taħseb u taġixxi. (Atti 10:42; Efesin 4:22-29; Ebrej 10:24, 25) Imbagħad, dawk li jobdu l-kmandi taʼ Ġesù jitqanqlu biex jieħdu deċiżjoni persunali ħalli jsegwuh billi jiddedikaw ħajjithom lil Alla Ġeħova.—Mattew 16:24.
It-3 pass: Tgħammed. (Mattew 28:19) Fil-Bibbja, il-magħmudija hi mqabbla maʼ dfin. (Qabbel Rumani 6:2-4.) Din isservi bħala simbolu taʼ mewt mill-ħajja taʼ qabel u bidu għall-ħajja ġdida. B’hekk, billi titgħammed tkun qed turi lil oħrajn li għamilt l-ewwel żewġ passi li ddeskriva Ġesù u li qed titlob lil Alla biex jagħtik kuxjenza nadifa.—Ebrej 9:14; 1 Pietru 3:21.
Kif se nkun naf jekk iniex lest biex nitgħammed?
Kellem lill-anzjani tal-kongregazzjoni. Huma se jitkellmu miegħek biex jagħmlu ċert li int qed tifhem dan x’jinvolvi, li qed tapplika dak li qed titgħallem, u li ddedikajt lilek innifsek lil Alla minn jeddek.—Atti 20:28; 1 Pietru 5:1-3.
Dawn il-passi japplikaw ukoll għal tfal li l-ġenituri tagħhom huma Xhieda?
Iva. Aħna nrabbu lil uliedna “fid-dixxiplina u l-gwida mentali taʼ Ġeħova,” bħalma tikkmandana l-Bibbja. (Efesin 6:4) Madankollu, hekk kif jikbru, huma jridu jieħdu d-deċiżjoni persunali biex jitgħallmu, jaċċettaw, u japplikaw dak li tgħallem il-Bibbja qabel ma jkunu jistgħu jikkwalifikaw għall-magħmudija. (Rumani 12:2) Fl-aħħar mill-aħħar, kull individwu għandu jagħżel hu stess it-twemmin tiegħu.—Rumani 14:12; Galatin 6:5.