ခင်ဗျား​ရဲ့ ဘာသာရေး​နောက်ခံ​အကြောင်း ပြောပြပါ။

ကျွန်တော့်​အဖေ​ရဲ့ ဇာတိ​က အိန္ဒိယနိုင်ငံ​ဖြစ်တယ်။ အမေက​တော့ ယူ​ဂ​န္ဓာ​နိုင်ငံမှာ​မွေး​တဲ့ အိန္ဒိယ​လူမျိုးပါ။ မိဘတွေဟာ အများ​အားဖြင့် ဟိန္ဒူ​ထုံးစံ​လိုက်တယ်။ ညီအစ်ကို​သုံး​ယောက်​အနက် ကျွန်တော်ဟာ ဒုတိယ​မြောက်​ပါ။ ကင်​ညာ​နိုင်ငံ၊ နိုင်​ရို​ဘီ​မြို့မှာ နေထိုင်​ကြ​တ​ယ်။ အနီးတစ်ဝိုက်​မှာ ဟိန္ဒူ​တွေ အ​နေ​များ​တ​ယ်။

သိပ္ပံပညာ​ကို ဘာကြောင့် စိတ်ဝင်စား​တာလဲ။

တိရစ္ဆာန်တွေ​ကို ကျွန်တော် စိတ်ဝင်စား​တ​ယ်။ တောရိုင်းတိရစ္ဆာန်​တွေကို ကြည့်ဖို့ သူငယ်​ချင်း​တွေနဲ့​အတူ အပျော်ခရီး​ထွက်​လေ့ရှိတယ်။ အစမှာ ကျွန်တော့်​ပန်းတိုင်​က တိရစ္ဆာန်​ခွဲစိတ်ကု ဆရာဝန်​ဖြစ်ဖို့​ပဲ။ ဒါပေမဲ့ နိုင်​ရို​ဘီ နည်းပညာ​ကောလိပ်​ကျောင်း ဆင်း​ပြီးတဲ့နောက် အင်္ဂလန်​နိုင်ငံ၊ လန်ဒန်​တ​က္က​လို​လ်​မှာ ရောဂါဗေဒ​ပညာ​ကို ဆည်းပူးလေ့လာ​ခဲ့တယ်။ နောက်ပိုင်း လူ့​ဦးနှောက်​ကို အထူးပြု​လေ့လာ​ခဲ့တယ်။

ဒီ​လေ့လာမှု​က ခင်ဗျား​ရဲ့ ဘာသာရေး​ယုံကြည်ချက်​အပေါ် သက်ရောက်မှု​ရှိ​သလား။

ရှိတာ​ပေါ့။ သိပ္ပံပညာ​ကို လေ့လာ​လေ ဟိန္ဒူ​ဒဏ္ဍာရီ​နဲ့ ထုံးစံတွေကို ယုံ​ဖို့ ခက်​လေပဲ။​ တိရစ္ဆာန်​ကိုးကွယ်ခြင်း၊ ရုပ်တုကိုးကွယ်​ခြင်းတို့​လို​ပေါ့။

ဆင့်ကဲ​သီအိုရီ​ကို ဘာကြောင့် လက်ခံခဲ့​တာလဲ။

လူ့​ဆင့်ကဲဖြစ်စ​ဉ်​ဟာ အာဖရိက,က​နေ စတင်​တယ်လို့ ယုံကြည်​တဲ့ လူတွေ​ကြားမှာ ကျွန်တော် ကြီးပြင်း​လာတယ်။ ကျောင်း​မှာလည်း အဲဒီလိုပဲ သင်ပေးတယ်။ ကျောင်းဆရာ​တွေနဲ့ တက္ကသိုလ်​ပါမောက္ခ​တွေ​က နာမည်ကြီး​တဲ့ သိပ္ပံပညာရှင်​အားလုံး ဆင့်ကဲဖြစ်စ​ဉ်​ကို ယုံ​ကြ​တယ်လို့ ကျောင်းသား​တွေကို သင်ပေးတယ်။

နောက်ပိုင်းမှာ အသက်​ရဲ့ မူလအစ​နဲ့​ပတ်သက်​လို့ ပြန်သုံးသပ်​တာ ဘာကြောင့်လဲ။

ဇီဝဗေဒ​နဲ့ ခန္ဓာဗေဒ​ကို လေ့လာ​နေတဲ့ နှစ်​တွေ​မှာပေါ့။ ကျောင်းနေဖက်​တစ်ယောက်က  ယေဟော​ဝါ​သက်သေတွေ​နဲ့ သူ ကျမ်းစာ​လေ့လာ​နေတယ်​လို့ ပြောပြတယ်။ ကျွန်တော်​လည်း စိတ်ဝင်စား​သွားတယ်။ ဒါနဲ့ နိုင်​ရို​ဘီ​မှာရှိတဲ့ ကျွန်တော်တို့ရဲ့ ကောလိပ်​ခန်းမ​မှာ သက်သေခံ​တွေ​ကျင်းပတဲ့ အစည်းအဝေး​ကို သွား​တက်တယ်။ အဲဒီနောက် သက်သေခံ​ သာသနာ​ပြု​နှစ်ယောက်​က ကျမ်းစာ​အကြောင်း ရှင်းပြ​တ​ယ်။ ဘဝနဲ့​ဆိုင်တဲ့ အရေးကြီး​မေးခွန်းတွေကို ဖြေ​ပေးနိုင်​တဲ့ မဟာ​ဒီဇိုင်နာ​ကို သူတို့​ယုံကြည်​တ​ယ်။ သူတို့ရဲ့​ယုံကြည်ချက်​ဟာ ဒဏ္ဍာရီ​မ​ဆန်​ဘူး။ ယုတ္တိ​ရှိတယ်။

ဆေး​ပညာက ဖန်ဆင်းခြင်း​ကို ယုံကြည်ဖို့ အခက်တွေ့​စေသလား။

အခက်​မ​တွေ့​စေ​ပါဘူး။ ခန္ဓာဗေဒ​ကို လေ့လာတဲ့အခါ သက်ရှိ​တွေဟာ ဘယ်လောက်​တောင် ပုံစံ​ကျ​န​ပြီး ဆန်းပြား​ရှုပ်ထွေး​သလဲ​ဆိုတာ သိလာ​တ​ယ်။ ဒီလောက်​တောင် ဆန်းပြား​ရှုပ်ထွေး​တဲ့​အရာ​ဟာ သူ့အလိုလို ဖြစ်လာတယ်​ဆိုတာ ကျွန်တော့်​အတွက်​တော့ အဓိပ္ပာယ်​မရှိဘူး။

ဥပမာ​တစ်ခုလောက် ပြောပြပါ​လား။

၁၉၇​၀ ပြည့်လွန်နှစ် အစောပိုင်း​ကတည်း​က​ လူ့​ဦးနှောက်​အကြောင်း ကျွန်တော် လေ့လာ​ခဲ့တယ်။ လူ့​ဦးနှောက်​ဟာ တကယ့်ကို အံ့သြစရာ​ပါပဲ။ အတွေး​နဲ့ မှတ်ဉာဏ်​တွေ သိုလှောင်​ရာ၊ ကိုယ်ခန္ဓာ​ရဲ့ လုပ်ဆောင်မှု​အများစုကို အဓိက​ထိန်းချုပ်​တဲ့​နေရာ ဖြစ်တယ်။​ ဦးနှောက်​ဟာ အာရုံ​အများစု​ရဲ့ ဗဟိုချက်​လည်း​ဖြစ်တယ်။ ကိုယ်ခန္ဓာ​အတွင်း၊ အပြင်​က ပို့​လာတဲ့ အချက်အလက်​တွေကို အဓိပ္ပာယ်​ဖော်​ပေးတယ်။

ဒီလောက်အထိ ဦးနှောက် စွမ်းဆောင်​နိုင်​တာဟာ ရှုပ်ထွေး​ပြီး အနုစိတ်​နိုင်​လှတဲ့ ဓာတု​လုပ်ဆောင်မှု​နဲ့ ဦးနှောက်​ရဲ့ အဓိက​ဆဲလ်​တွေ​ဖြစ်တဲ့ အာရုံခံ​ဆဲလ်​တွေကြောင့် ဖြစ်တယ်။ လူ့​ဦးနှောက်​မှာ အာရုံခံ​ဆဲလ် သန်း​ထောင်နဲ့ချီ ရှိတယ်။ အဲဒီ​ဆဲလ်တွေဟာ အာရုံကြောမျှင်​တွေ​ကတစ်ဆင့် အချင်းချင်း ဆက်သွယ်​ကြ​တယ်။ အာရုံခံ​ဆဲလ်​တစ်ခု​ဟာ ထောင်နဲ့ချီတဲ့​ အခက်​တွေ​ ဖြာထွက်​ပြီး တခြား​အာရုံခံ​ဆဲလ်​တွေနဲ့ ဆက်သွယ်​နိုင်တယ်။ ဒါကြောင့် ဦးနှောက်​ထဲမှာ ဆက်သွယ်မှု အရေအတွက် အတိုင်း​ထက်​အလွန် များ​တ​ယ်။ ဒီလောက်​များပြား​လှတဲ့ အာရုံခံ​ဆဲလ်​တွေနဲ့ အာရုံကြောမျှင်​တွေဟာ ပရမ်းပတာ​ဖြစ်​မနေ​ဘဲ စနစ်တကျ​ရှိနေတယ်။ အံ့မခန်းဖွယ် စွမ်းဆောင်မှု​ပါပဲ။

ကျေးဇူးပြုပြီး ဆက်ပြော​ပြပါ​ဦး။

ကလေး​တစ်ယောက်​ရဲ့ ဦးနှောက်​ဖွံ့ဖြိုးမှု​ဟာ မိခင်​ဝမ်း​အတွင်း ကြီးထွား​နေချိန်၊ မွေးဖွား​ပြီး​ချိန်​အတွင်း အင်မတန် စနစ်ကျ​စွာ ဖြစ်တည်​လာတယ်။ အာရုံခံ​ဆဲလ်တွေဟာ စင်တီ​မီ​တာ အနည်းငယ် အကွာအဝေး​မှာရှိတဲ့ သက်ဆိုင်​ရာ အာရုံခံ​ဆဲလ်​တွေဆီ အမျှင်​တွေ ပို့လွှတ်​ပေးတယ်။ အမျှင်​တစ်ခု​ဟာ သတ်သတ်​မှတ်မှတ် ဆဲလ်​တစ်ခု​ဆီ ဦးတည်​သွားတာ​လောက် မဟုတ်ဘဲ အဲဒီ​ဆဲလ်​အတွင်းမှာ​ရှိတဲ့ သက်ဆိုင်​ရာ အပိုင်း​ဆီ ဦးတည်​သွားတာ​ဖြစ်တယ်။

အာရုံခံ​ဆဲလ်​တစ်ခုက​နေ အမျှင်​သစ်​တစ်ခု ထွက်လာ​ပြီ​ဆိုရင် သက်ဆိုင်​ရာ​နေရာ ရောက်တဲ့​အထိ အဲဒီ​အမျှင်​ကို “ရပ်၊” “သွား၊” “ကွေ့” စတဲ့ ဓာတုဗေဒ လမ်းညွှန်​အမှတ်အသား​တွေ​က လမ်းညွှန်​ပေးတယ်။ ရှင်းလင်း​တဲ့ ညွှန်ကြားချက် မရှိရင် ကြီးထွား​နေတဲ့ အမျှင်​တွေ မကြာခင်​မှာပဲ လမ်းပျောက်​သွားပါလိမ့်မယ်။ ဖြစ်စ​ဉ်​တစ်ခုလုံး​ကို မျိုးရိုးဗီဇ (ဒီအန်အေ) မှာ ရေးသားထားတဲ့ ညွှန်ကြားချက်​တွေနဲ့ ထူးခြား​ပြောင်မြောက်​စွာ စီစဉ်​ဖွဲ့စည်း ထား​တ​ယ်။

မှတ်ဉာဏ်​တွေ၊ စိတ်​ခံစားချက်တွေ၊ အတွေး​တွေ ဖြစ်ပေါ်​စေ​ပုံ အပါအဝင် ဦးနှောက်​ရဲ့ ဖွဲ့စည်း​လုပ်ဆောင်ပုံ​ကို ကျွန်တော်​တို့ အပြည့်အဝ နားလည်ဖို့ အလှမ်းဝေး​လွန်း​တ​ယ်။ ဦးနှောက် ဘယ်လောက် ကောင်းကောင်း အလုပ်​လုပ်တယ်၊ ဘယ်လို လှလှ​ပ​ပ ဖြစ်တည်​လာတယ်​ဆိုတာ ခဏ​ထား​ဦး။ ကျွန်တော့်​အတွက်​တော့ ဦးနှောက်​ အလုပ်​လုပ်တယ်​ဆိုတဲ့ အချက် တစ်ချက်​တည်း​က​ပဲ ကိုယ့်ထက် အဆပေါင်းများစွာ သာလွန်​တဲ့ ဉာဏ်ကြီးရှင်​ကို ထောက်ပြ​နေတယ်။

ဘာကြောင့် ယေဟော​ဝါ​သက်သေ ဖြစ်လာ​သလဲ။

သက်သေခံ​တွေ​က ကျမ်းစာ​ဟာ​ ဘုရားသခင့် နှုတ်ထွက်စကား​ဖြစ်မှန်း အထောက်အထား​နဲ့​ပြ​တ​ယ်။ ဥပမာ၊ ကျမ်းစာ​ဟာ သိပ္ပံ​စာအုပ် မဟုတ်​ပေ​မဲ့ သိပ္ပံ​အကြောင်း တိတိကျကျ၊ မှန်မှန်ကန်ကန် ဖော်ပြ​ထားတယ်။ ကျမ်းစာမှာ တိကျမှန်ကန်​တဲ့ ကြိုဟောချက်​တွေလည်း ပါတယ်။ ကျမ်းစာ​သွန်သင်ချက်​အတိုင်း လိုက်လျှောက်​သူတွေ​ရဲ့ ဘဝဟာ တိုးတက်ကောင်းမွန်​လာတယ်။ ကျွန်တော့်​ဖြစ်ရပ်​က သက်သေ​ပဲ။ ကျွန်တော် ယေဟော​ဝါ​သက်သေ​ဖြစ်လာတဲ့ ၁၉၇​၃ ခုနှစ်​ကစပြီး ကျမ်းစာ​ဟာ ကျွန်တော့်​လမ်းပြ ဖြစ်လာတယ်။ ရလဒ်အနေနဲ့ ကျွန်တော့်​ဘဝ တကယ့်ကို ကျေနပ်စရာ​ကောင်းပြီး အဓိပ္ပာယ်ပြည့်ဝ​လာတယ်။