Sats tsî sats ǃgame hâ khoe-i ra ûiba ǀguiba tsoatsoa, khamin ge ǃkharagagu ǃgomsina nî hâ. Nēs ge nî ī saro ǂâiǀgaugu, tsâǀgaub tsî ûib mûǂuib a ǃkharagagu amaga. Ī ǁkhā as ge ǃgomsin ge ǃaugaba xu tamas ka io ǃâubasenhe tama go hâ-i xūna xus tsîna a hā ǁkhā.

Amaba ūǃoa tama is ge ǃâitsâb khami ra ī, xawe Elobmîs ge ra ǀawemā i da sida ǃgomsina sîsenǂam. (Mateub 5:23, 24) Sats ge ǃgâi ǀgaub ai sa ǃgomsina ǀamsa a hōba ǁkhā Elobmîs tsoatsoadets ga sîsenū o.

ELOBMÎS TA MÎS: “Mâ xū-i hoa-i ge ǁî-i di ǁaeba ūhâ . . . ǁaeb ǃhoas dib.” (Aoǁnâ-aob 3:1, 7) ǁAeba ūǂui re saro ǃgomsiga ǃhoaǂuis ǃaroma. ǂHauǃnâse sats ǃgame hâ khoe-e ǂan kai re sats mati ra tsâsa tsî ra ǂâisa ǃhoa ro ra xūn xa. Hoaǁae “amaba ǃhoa” re sats ǃgame hâ khoe-i ǀkha. (Efeseǁîn 4:25) Kaise gu ga ǀgaisa tsâsiga hâ xawe, ǁkhaesen re ǂkhaba sa. ǃNomsa ǃereams ge nî hui ǂkhababa ǁkhaesa ǃhoa ro ra hîna.—ǂKhoamîdi 15:4; 26:20.

ǁNâugu tama ro ga i xawe, ǀnamǀnamsase hâ re, i tā ǀuru ǀnami tsî ǃgôasiba sats ǃgame hâ khoe-e ǁgausa. (Koloseǁîn 4:6) ǁKhā ro as kōse dītsâ re ǃhaese ǃgomsina sîsenǂamsa, tsî tā ǃhoa ū gu ǀû re.—Efeseǁîn 4:26.

SATS A DĪ ǁKHĀ I:

• ǁAeba ǁamaǂui re ǃgomsina ǃhoaǃgâs ǃaroma

• Sa ǃnās ga io ǃgâs disa, ǁkhaesen re ǃhoaǂgâsa, sats tsîn ge sa ǃēsa nî hō ǃhoas disa

ELOBMÎS TA MÎS: “ǃGâsa ǀnamgusa as ǂgaob ǀkha ī. ǃGôagus ǀkha aiǃgûbagu re.” (Romeǁîn 12:10) Matits ta ǃgâ ǀgaus ge kaise a ǂhâǂhâsa. Dītsâ re sats ǃgame hâ khoe-i ra mî mîsa ǁnâuǃāsa “ǀkhomxa . . . tsî ǃgamǃgamsenxa” se. (1 Petrub 3:8; Jakobub 1:19) Tā ǃgâ ra khami dīsen re. ǁKhā i ga o, dīts ta xū-e ǁnāxū tsî ǃhoa ra khoe-e ǃgaoǃgâ re tamas ka io ǂgan re i ro ega ǃhoa. Sats ǃgame hâ khoe-i sats ǀkha ǀguiba ra sîsenǁae ǃkhaisa ǂan re tsî i sa mâǃoa ao tama sa, ǁnā ǀgaus aits ge “ǃhaese ǁaixa” tite.—Aoǁnâ-aob 7:9.

SATS A DĪ ǁKHĀ I:

• ǁKhowa-amsa ǂâis ǀkha ǃgâ re, ǁnâuts ta xūn ga ǃgâise ǀō tama i xawe

• ǃGâ re mîdi ǃgâ-ai hâ ǂâibasensa, Sa ǃgame ao-i tanisens tsî ǃhoa ǀgauba ǃgaoǃgâ re

ELOBMÎS TA MÎS: “Mâ ǃgom sîsenni hoab ǃnâs ge ǃnāǂamsiba hâ, xawe amǁgaugu ǀguigu di mîs hâpa.” (ǂKhoamîdi 14:23) ǃGâi ǀapesa ūhâs ge ǂâu tama. Sîsen ǃkharu re ǀapen hîa ro go hoaro mîǁguin ai . Nēs ge ǂgaogao ǃgarise sîsens tsî ǁguiǂgāsens tsîna ǂhâba hâ, xawe ǁnās ge ǃgâi hōǂuiba nî ūhâ. (ǂKhoamîdi 10:4) ǀGuiba ro ga sîsenǁae o, o ro ge “ǃgâi” hōdawa-amsa nî hō saro di ǃgari sîsena xu.—Aoǁnâ-aob 4:9.

SATS A DĪ ǁKHĀ I:

• Mâ i hoa-e mîǁgui re tae-e i nî sîsenǂamsa ǃgomsiga ǀamǀams ǃaroma

• ǁAeba xu ǁaeb ǀkha kē re mati ro ra aiǃgû sa