PILAMOCHTSI Mateo kiijtoua: “Jesús kalajki ipan nopa ueyi israelitateopamitl uan kintojtokak nochi tlen tlanamakayayaj uan tlakouayayaj teopankalijtik. Uan kintepeuilik ininmesas tlen kipatlayayaj tomij tlen uala sejkoyok. Nojkia kintepeuilik ininsiyas tlen tenamakiltiyayaj palomas. Uan Jesús kiniljuik: ‘Ijkuilijtok [...]: “Nochi tlakamej kitokaxtisej nochaj: nopa kali kampa tlakamej momaijtouaj”. Pero inkichijtokej kampa mosentiliaj tlachtekinij’” (Mat. 21:12, 13).

Kampa ijkuilijtok tlen judíos kinpanok, nesi kenijkatsa katli tlanamakayayaj ipan teokali kintlachtekiliyayaj maseualmej pampa nopaya tlauel patiyo tlanamakayayaj. Amochtli Misná (Keritot 1:7) kiijtoua ipan achtoui siglo, omej palomas tlen ika temakayayaj tlakajkaualistli, kinnamakayayaj ika se denario tlen oro. Nopa kiijtosneki se akajya monekiyaya tekitis 25 tonali uan kiampa ueliskia kinkouas omej palomas. Maske nopa Tlanauatili kiijtouayaya teikneltsitsij ueliskia temakasej kej tlakajkaualistli se paloma o ‘se pichón’, ayokmo ueliyayaj kikouaj pampa tlauel patiyo kinnamakayayaj (Lev. 1:14; 5:7; 12:6-8). Nopa tlamachtijketl judío Simeón ben Gamaliel amo kipaktik tlen kichiuayayaj, yeka kiijtok ayokmo ma temakakaj miak tlakajkaualistli kej kiijtouayaya inintlanauatiljuaj. Uan pampa kiampa kichijki, tlanamakanij ayokmo patiyo kinnamakakej palomas.

Yeka Jesús kiijtok katli tlanamakayayaj ipan teokali eliyayaj “tlachtekinij”, pampa tlauel patiyo tlanamakayayaj uan kinekiyayaj kitlanisej miak tomij.