¿TLEN MITSPALEUIS TLA OIXPOLIUIK AKIN OTIKTLASOJTLAYA?

Tlen kijtoua Biblia kinpaleuia akinmej moyolkokouaj

MA MOKAKI IKA

AXKAN MIAKEJ KITEMOUAJ TLEN KINPALEUIS TLA MOYOLKOKOUAJ PORQUE OIXPOLIUIK AKIN OKITLASOJTLAYAJ. Tlen kijtouaj ixtlamatkej kiteititia Biblia techpaleuia ma tiyetokan tiixtlamatkej. Biblia amo san kijtoua tlen moneki tikchiuaskej, noijki tlen ompa kijtoua techyolseuia ijkuak ikaj ixpoliui.

Akinmej oixpolikej amo tlajyouijtokej

Eclesiastés 9:5 kijtoua akinmej yoixpolikej “ayakmo itlaj kimatij”. Amitlaj mokuayejyekouaj (Salmo 146:4). Ik non, Biblia kijtoua ijkuak ikaj ixpoliui yetoskia ken kochtok (Juan 11:11).
Tikneltokaj toTajtsin Dios porque techtlasojtla

Biblia kijtoua: “Jehová kinmita * akinmej yolmelauakej uan kinkaki ijkuak kitlatlaujtiaj ma kinpaleui” (Salmo 34:15). Ijkuak tiktlatlaujtiaj toTajtsin Dios uan tikiluiaj ken timomachiliaj, techpaleuia ma timokuayejyekokan ken moneki. Noijki techpaleuia iuan ma timouikakan uan ye techyolseuia.
Satepan kuali tiyetoskej

¡Ximokuayejyeko oksepa tikinmitas akinmej oixpolikej! Biblia miak uelta kijtoua kinyolitiskej uan ken tiyetoskej satepan nikan tlaltikpak. Noijki kijtoua toTajtsin Dios “kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli” (Apocalipsis 21:3, 4).

Miakej kineltokaj Jehová kinyolitis akinmej oixpolikej uan moyolchikauaj. Ma tikitakan tlen okipanok Ann. Ijkuak yokipiayaj 65 xiuitl omonamiktijkej, inamik oixpoliuik, ye okijto: “Yonikitak Biblia kijtoua akinmej oixpolikej amo tlajyouijtokej uan toTajtsin Dios kinmilnamiki, ik non, kinyolitis. Nechpaleuia ma nitlaxiko ijkuak nimokuayejyekoua oksepa nikitas nonamik”.

Tina tlen itech yotimotlapouijkej okijto: “Jehová nochipa nechyolchikaua desde ijkuak oixpoliuik Timo. Yonikitak ye nechpaleuia ijkuak sapanoua nitlajyouia. Biblia kijtoua kinyolitiskej akinmej oixpolikej uan non nechyolchikaua ma nikchiua tlen moneki hasta ijkuak oksepa nikitas Timo”.

Sapanoua miakej ijkon momachiliaj uan kineltokaj tlen kijtoua Biblia. Tla timokuayejyekoua amo panos tlen ompa kijtoua, ximomachti uan ijkon tikitas melauak panos tlen ompa kijtoua uan noijki tikitas tlen ompa kijtoua kinyolchikaua akinmej moyolkokouaj porque oixpoliuik akin okitlasojtlayaj.