Centros para el Control y la Prevención de Enfermedades, itech altepetl Estados Unidos okijtojkej ijkuak okintlajtlanijkej telpochmej uan ichpochmej tlen kipiaj kanaj 15 noso 19 xiuitl kox yokichijkej sexo oral, miakej okijtojkej kema. Sharlene akin okijkuilo amochtli Oral Sex Is the New Goodnight Kiss Kiss (Sexo oral: el nuevo beso de buenas noches) okijto: “Miakej telpochmej uan ichpochmej kijtouaj amo tlajtlakoli ijkuak ikaj kichiua sexo oral”. Noijki okijto: “Yejuan mokuayejyekouaj non amo kijtosneki sexo”.

•  ¿Tlen timokuayejyekoua?

•  ¿Tlen uelis mitspanos?

•  ¿Kox tlajtlakoli?

 Xikijto kema noso amo.

1.   ¿Tla se ichpochtli kichiua sexo oral uelis kipias ikone?

   1.   Kema

   2.   Amo

2.   ¿Uelis mokokos akin kichiua sexo oral?

   1.   Kema

   2.   Amo

3.   ¿Sexo oral noijki ken ijkuak san sekan motekaj?

   1.   Kema

   2.   Amo

 Xikita kox kuali otitlanankili.

1.   ¿Tla se ichpochtli kichiua sexo oral uelis kipias ikone?

    Tlanankilistli: Amo. Ik non, miakej mokuayejyekouaj akinmej kichiuaj sexo oral amo tlajtlakolchiuaj.

2.   ¿Uelis mokokos akin kichiua sexo oral?

    Tlanankilistli: Kema. Akinmej kichiuaj sexo oral uelis mokokoskej ika hepatitis A noso B, verrugas genitales, gonorrea, herpes, sida noso sífilis.

3.   ¿Sexo oral noijki ken ijkuak san sekan motekaj?

    Tlanankilistli: Kema. Kijtosneki sexo ijkuak san sekan motekaj iuan momajmachiliaj, noijki ijkuak kichiuaj sexo oral, sexo anal uan ijkuak momajmachiliaj.

 Matikitakan tlen kijtoua Biblia.

 Biblia kijtoua: “ToTajtsin Dios amo kineki [...] xiauilnemikan” (1 Tesalonicenses 4:3, La Palabra de Dios para Todos).

 Tlajtoli ʹamo xiauilnemikanʹ kijtosneki ijkuak motekaj san sekan akinmej ayamo monamiktiaj uan ijkuak kichiuaj sexo oral, sexo anal uan kimajmachiliaj ikaj itlakayo. Akin auilnemi tlajyouis uan ayakmo mouikas iuan toTajtsin Dios (1 Pedro 3:12).

 Biblia kijtoua: “Akin auilnemi kijtlakoua icuerpo” (1 Corintios 6:18, La Palabra de Dios para Todos).

 Akin kichiua sexo oral tlajyouia uan ayakmo mouika iuan toTajtsin Dios. Noijki ayakmo kuali momachilia. Amochtli Cómo hablar de sexo con los adolescentes para que te escuchen, kijtoua: “Akinmej kichiuaj sexo oral, satepan amo kuali momachiliaj porque kinchiuiliaj tlen amo kuali uan ayakmo yolchikauakej. Amo kuali momachiliaj akinmej ikaj iuan motekaj noso kichiuaj okseki tlamantli tlen amo kuali, porque nochi tlen kichiuaj kijtosneki sexo”.

 Biblia kijtoua: “Ne Jehová nimoDios, ne akin nimitsmachtia para kuali xiyeto” (Isaías 48:17).

 ¿Mitspaleuis tlen kijtoua toTajtsin Dios itech sexo? ¿Noso tikmachilia amo mitskaua xikchiua tlen tikneki? Ximokuayejyeko tika itech se carretera tlen kipia miak señales. ¿Tikijtoskia nin señales amo mitskauaj xikchiua tlen tikneki noso mitsmaluiaj? ¿Tlen uelis panos tla amo tikintlakamatiskia señales?

 Noijki ijkon, tla amo tikintlakamati itlanauatiluan toTajtsin Dios titlajyouis (Gálatas 6:7). Amochtli Sex Smart (Sexo inteligente), kijtoua: “Ijkuak amo tikchiua tlen tikneltoka uan tikchiua tlen amo kuali, tikteititia ayakmo timopatioita”. Pero tla tiktlakamati itlanauatiluan toTajtsin Dios tikteititis tikchiua tlen kuali uan noijki kuali timomachilis (1 Pedro 3:16).