UKUCHASISWA KWAMAVESI ASEBHAYIBHILINI
UJohane 16:33—“Mina Ngiwunqobile Umhlaba”
“Ngilitshele konke lokhu ukuze libe lokuthula ngenxa yami. Emhlabeni lizahlupheka kodwa wobani lesibindi! Mina ngiwunqobile umhlaba.”—UJohane 16:33, INguqulo Yomhlaba Omutsha.
“Ngikhulume lokhu kini ukuba libe lokuthula. Emhlabeni lizakuba losizi, kodwa manini isibindi, mina ngiwunqobile umhlaba.”—UJohane 16:33, The Holy Bible in Ndebele.
Okutshiwo nguJohane 16:33
Ngokutsho amazwi akuJohane 16:33, uJesu wayeqinisekisa abalandeli bakhe ukuthi labo bangenelisa ukuthokozisa uNkulunkulu lanxa besebunzimeni kumbe bephikiswa.
“Ngilitshele konke lokhu ukuze libe lokuthula ngenxa yami.” a Amazwi alandela lawa atshengisa ukuthi umuntu angaba lakho ukuthula lanxa elenhlupho ngoba uyabe ehlalisekile enhliziyweni lasengqondweni. Ukuthula lokhu singakuthola “ngenxa” kaJesu owasithembisa ukuthi uzasinika umoya ongcwele. Umoya ongcwele ‘ungumsizi’ olamandla yikho wawuzancedisa abafundi bakaJesu ukuthi balwisane laloba yibuphi ubunzima obabuzabehlela.—UJohane 14:16, 26, 27.
“Emhlabeni lizahlupheka kodwa wobani lesibindi!” UJesu wabacacisela abafundi bakhe ukuthi babezahlangana lobunzima obugoqela ukuphathwa kubi lokuhlukuluzwa. (UMathewu 24:9; 2 KuThimothi 3:12) Kodwa kwakumele babe “lesibindi” kumbe “bangesabi.”—UJohane 16:33, New International Version.
“Mina ngiwunqobile umhlaba.” Evesini le ibala elithi “umhlaba” litsho abantu abenza izinto ezingalunganga abehlukaniswe loNkulunkulu. b U-1 Johane 5:19 uthi: “Umhlaba wonke ungaphansi kwamandla kaSathane.” Yikho abantu ‘bomhlaba’ becabanga njalo besenza izinto ezingahambisani lentando kaNkulunkulu.—1 UJohane 2:15-17.
USathane labantu bomhlaba lo bazama ukuyenga uJesu ukuthi angenzi intando kaNkulunkulu. Phela uNkulunkulu wayefuna uJesu afundise abantu iqiniso njalo anikele ngokuphila kwakhe okungelasono ukuze ahlawulele abantu. (UMathewu 20:28; ULukha 4:13; UJohane 18:37) UJesu kazange avumele ukuthi umhlaba lo utshintshe indlela ayecabanga ngayo kumbe umenze ayekele ukulalela uNkulunkulu. Waqhubeka ethembekile kwaze kwaba sekufeni. Yikho uJesu wayengatsho sibili ukuthi uwunqobile umhlaba lokuthi “umbusi womhlaba” lo uSathane, “kalamandla phezu” kwakhe.—UJohane 14:30.
UJesu watshengisa ukuthi lathi singenelisa ukuhlala sithembekile kuNkulunkulu lanxa uSathane kanye labantu bomhlaba lo bengazama ukuphambanisa ubungane bethu loNkulunkulu. Kwakungani uJesu uthi: “Nxa mina ngiwunqobile umhlaba, lani lingawunqoba.”
Amanye amavesi asinceda sizwisise uJohane 16:33
UJesu watsho amazwi akuJohane 16:33 ezavuka ebulawa. Njengoba wayekwazi ukuthi usezakufa, wahle wasebenzisa lelothuba ukuthi acebise abaphostoli bakhe abathembekileyo. Wabatshela lokuthi babengasoze besambona, ukuthi babezahlukuluzwa lokuthi abanye babo babezabulawa. (UJohane 15:20; 16:2, 10) Kumele ukuthi ukuzwa lokho kwabethusa abaphostoli yikho uJesu waphetha ngamazwi akuJohane 16:33 ukuze abakhuthaze.
Amazwi kaJesu kanye lalokho ayekwenza kungabakhuthaza abalandeli bakhe lamuhla. Wonke amaKhristu angenelisa ukuhlala ethembekile kuNkulunkulu kungelani lenhlupho ahlangana lazo.
a Umutsho wesiGrikhi ohunyutshwe ngokuthi “ngenxa yami” ungahunyutshwa langokuthi “libe kimi.” Utsho ukuthi abafundi bakaJesu babengaba lokuthula nxa bengahlala bemanyene laye.
b Ibala elithi “umhlaba” lisetshenziswe ngendlela efananayo kuJohane 15:19 laku-2 Phetro 2:5.
Nanku Okunye
IMIBUZO YEBHAYIBHILI IYAPHENDULWA
Kungani UJesu Wafa?
Abantu abanengi bayakwazi ukuthi uJesu wafa ukuze sithole ukuphila okuphakade. Kodwa ukufa kwakhe kusinceda njani?
IMIBUZO YEBHAYIBHILI IYAPHENDULWA
Kungani Umhlatshelo KaJesu Ubizwa Ngokuthi “Yinhlawulo Yabanengi”?
Inhlawulo isikhulula njani esonweni?
OKUFUNDISWA LIBHAYIBHILI
Amathuluzi Okutaditsha IBhayibhili
Khetha amathuluzi okutaditsha iBhayibhili azakwenza ukuthi uzwisise iBhayibhili futhi ukholise ukulibala.
