Omumati gwedhina Will okwa ti: “Okulesha Ombiimbeli otaku vulu ku monike kwa fa oshinima tashi sitha uuza, ngele ku shi omukalo gwomondjila moka wu na oku yi lesha.”

Mbela ino hala okutseya shoka to vulu okuninga, opo wu kale wu hole okulesha Ombiimbeli? Oshitopolwa shika otashi ke ku kwathela.

•  Mwenyopaleka Omanyolo ngoka to lesha

•  Konakona iinima muule!

•  Shoka oomakula haya ti

Sho to lesha omanyolo, kala wa fa opo wu li poshiningwanima shoka. Oto vulu oku shi ninga momikalo ndhika:

1. Hogolola ehokololo lyontumba mOmbiimbeli ndyoka wa hala okukonakona. Oto vulu okuhogolola oshiningwanima shontumba nenge oovelise dhontumba membo limwe lyEvaangeli. Oto vulu wo okupulakena kehokololo lyontumba, okuza mOmalesho gOmbiimbeli molupe lwiinyandwa ngoka ge li kepandja lyetu lyokointaneta, jw.org.

2. Lesha ehokololo ndyoka. Oto vulu oku li lesha ongoye awike nenge wu li leshe muule nookuume koye nenge noyaandjeni. Gumwe ota vulu okulesha oohapu dhomuhokololi, omanga yalwe taya lesha oohapu dhayalwe mboka ya popiwa mehokololo ndyoka.

3. Longitha gamwe gomomaetopo ngaka:

   • Thaneka omathano tagu ulike shoka sha popiwa mehokololo. Oto vulu oku ga thaneka melandulathano, ngaashi iiningwanima mbyoka wa lesha, ya ningwa. Pomathano nyola po oohapu dhaashoka tashi ningwa.

   • Thaneka iimpungu. Pashiholelwa, sho to lesha kombinga yagumwe ngoka a longela Jehova nuudhiginini, thaneka oshimpungu e to nyola mo omaukwatya ge niilonga ye. Nyola mo wo omayambeko ngoka a mona.

   • Ehokololo ndyoka li lesha wa fa to lesha oonkundana. Oto vulu okupopya iinima yi ili noyi ili. Kala wa fa to pulapula mboka taya dhana onkandangala mehokololo ndyoka to lesha nosho wo mboka ya li poshiningwanima shoka.

   • Ngele gumwe gwomwaamboka to lesha kombinga ye okwa li a ningi epuko, ipula nkene andola iinima ye ke enda, ando okwa li inee li ninga. Pashiholelwa, dhiladhila kombinga yaPetrus, sho a li i idhimbike Jesus. (Markus 14:66-72) Oshike Petrus a li ta vulu okuninga, opo kaa sindwe kuumbanda wokutila aantu?

   • Oto vulu wo okunyola shoka wa lesha molupe lwoshinyandwa. Nyola wo iinima mbyoka omuntu ta vulu okwiilonga mo. — Aaroma 15:4.

Ngele owa konakona muule uuyelele mboka wa lesha, oto ki ilonga mo iinima oyindji yi na oshilonga mbyoka wa li kuu shi. Oshitya owala shimwe nenge iitya yontumba ya popiwa mehokololo lyOmbiimbeli, otayi vulu okukala yi na eityo lya simana lela.

Pashiholelwa, yelekanitha Mateus 28:7 naMarkus 16:7.

•  Omolwashike sho Markus a nyola kutya Jesus ote ki ihololela aalongwa ye, a gwedha ko a ti “naPetrus,” ihe Mateus ine shi gwedha ko?

• Shoka tashi vulu oku ku kwathela: Markus ka li po sho iiningwanima mbyoka ya ningwa. Uuyelele mboka a nyola otashi vulika a li e wu lombwelwa kuPetrus.

• Shoka to vulu okwiilonga: Omolwashike Petrus a li a hekelekwa, sho u uvu kutya Jesus okwa hala oku mu mona? (Markus 14:66-72) Jesus okwa li u ulike ngiini kutya oku li shili kuume kaPetrus? Ongiini to vulu okuholela Jesus mokukala kuume kashili?

Ngele owa kala ho mwenyopaleke Oohapu ndhoka to lesha, nokukonakona muule shoka wa lesha, oto ka kala wu hole okulesha Ombiimbeli.