Iipango Omulongo oompango ndhoka Kalunga a li a pe oshigwana shaIsraeli shonale. Iipango Omulongo oya tolokwa okuza komautumbulilo gOshihebeli ʽasereth haddeva·rim. Uutumbulilo mbuka owa holoka lwiikando itatu momanyolo (gOshitorah) momambo gatano gopetameko gOmbiimbeli. Eksodus 34:28; Deuteronomium 4:13; 10:4.

Kalunga okwa li a nyola Iipango Omulongo kiipelende iyali nokwe yi pe omuhunganeki Moses kOndundu Sinai. (Eksodus 24:12-18) Iipango Omulongo oya tumbulwa Eksodus 20:1-17 nomu Deuteronomium 5:6-21.

•  Omusholondondo kombinga yomapulo gIipango Omulongo

•  Omolwashike ya yoolokathana?

•  Elalakano lyayo olyashike?

•  Mbela Aakriste oye na okuvulika kuyo?

•  Mbela oya simana nokunena?

•  Omakotampango gIipango Omulongo ngoka taga adhika metestamendi epe

1. Ino kala wu na ookalunga yalwe — Eksodus 20:3.

2. Ino ihongela oshiyelekela. — Eksodus 20:4-6.

3. Edhina lyandje ino li tumbulila iinima yowala. — Eksodus 20:7.

4. Dhimbulukwa esiku lyEsabati. — Eksodus 20:8-11

5. Simaneka ho nanyoko. — Eksodus 20:12.

6. Ino dhipaga. — Eksodus 20:13.

7. Ino hondela. — Eksodus 20:14.

8. Ino yaka. — Eksodus 20:15.

9. Ino lundila. — Eksodus 20:16.

10. Ino haluka. — Eksodus 20:17.

Ombiimbeli inayi gandja onomola yoshipango kehe. Onkee ano omataloko oga yoolokathana ngele tashi ya kiipango yimwe. Iipango mbyoka ya popiwa pombanda osho ya tseyika yi li ngaaka melandulathano. Ihe momatoloko galwe iipango mbika oya yooloka. Omayooloko ngoka oga kwatela mo oshipango shotango, oshitiyali noshahugunina. *

Iipango Omulongo oya li oshitopolwa shOmpango yaMoses. Ompango ndjoka oya li ya kwatela mo iipango ya konda 600 noya li euvathanotsokumwe nenge ehangano ndyoka lya li pokati kaKalunga noshigwana shaIsraeli shonale. (Eksodus 34:27) Kalunga okwa li a uvanekela oshigwana shaIsraeli kutya ote ke shi yambeka ngele osha vulika kOmpango yaMoses. (Deuteronomium 28:1-14) Ihe elalakano lya simana lyompango olya li okulongekidhila Aaisraeli Mesiasa nenge Kristus omuuvanekwa. — Aagalati 3:24.

Hasho nando. Ompango nIipango Omulongo mbyoka Kalunga okwa li e yi nunina oshigwana shaIsraeli shonale sho shene. (Deuteronomium 5:2, 3; Episalomi 147:19, 20) Aakriste kaye li kohi yompango yaMoses nokuli nAakriste Aajuda oya li ya ‘mangululwa kompango’ ndjoka. (Aaroma 7:6) * Ompango yaMoses oya li ya pingenwa po “kompango yaKristus” ndjoka ya kwatela mo iinima ayihe mbyoka Jesus a lombwela aalanduli ye ya ninge. — Aagalati 6:2; Mateus 28:19, 20.

Osho lela. Molwaashoka Iipango Omulongo otayi ulike nkene Kalunga ha dhiladhila, otatu vulu okumona mo uuwanawa ngele otwe yi konakona. (2 Timoteus 3:16, 17) Iipango Omulongo oya kankamena komakotampango ge shi okwiinekelwa ngoka kaage na siku ga ngushuluke. (Episalomi 111:7, 8) Uushili owo kutya omakotampango ngaka ogendji oge li omalongo gopetameko ngoka ge li mEtestamendi epe. — Tala omusholondondo kohi yoshipalanyolo “ Omakotampango kombinga yIipango Omulongo mbyoka yi li mEtestamendi epe.”

Jesus okwa li a longo kutya Ompango ayihe yaMoses oya kwatela mo Iipango Omulongo mbyoka ya kwatela mo iipango iyali mbyoka ya simanenena. Okwa ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’ Ompango ayihe nomahunganeko agehe oya kwatelelwa miipango mbika iyali.” (Mateus 22:34-40) Ihe nonando Aakriste inaya tegelelwa ya vulike kOmpango yaMoses, otaya lombwelwa ya kale ye hole Kalunga nosho wo aantu ooyakwawo. — Johannes 13:34; 1 Johannes 4:20, 21.