Bɛta Nzapa la Wa Lingɔ aye kwɛ́. Ta du tɛ Nzapa ato ndani ma, ta nga nda du tɛ lo na kɔngɔ ma. (Nzembo 90:2) Li ngu ti nzɔ̃ pa zu mɛ ka ya Ngbangɔ alo ka tɛ lo. (1 Timɔte 1:11) Nzapa la hɛ̃́ e lɛ ngɛ̃́, e vɔrɔ bo lo kɔi.​—Di Suma 4:11.

Ta zo kɔi adɛ ndó hũ Nzapa wɛ ma, na lo mɛ ya lo du nyingɔ, alengbi ya lo na tɛrɛ mɛ a ɔ tɛrɛ ti mi tɛ aye kwɛ́ mɛ lɛ la ngɛ̃́ ge lɛ sese. (Yoanɛ 1:18; 4:24) A bɛ se so ko, elengbi ti hingangɔ se liye tɛ lo ka ya aye mɛ lo li. Lɛlo kɔi, a le kɛkɛ ndɛ̃́ ndɛ̃́ ndɛ̃́ nga na afɛlɛlɛ ndɛ̃́ ndɛ̃́ ndɛ̃́ ndo fa e lo songo tɛ lo nga na ndara tɛ lo. Lɛ gegi mɛ yende yende ndo fa e na nguru tɛ lo.​—Di Roma 1:20.

Elengbi ti mandangɔ alo ma wo ma na ndo se liye tɛ Nzapa na le ge ti dingɔ Ngbangɔ. Lɛlo kɔi, ni ndo pa hɛ̃́ e ye mɛ Nzapa ye nga na ye mɛ lo kɛ̃, se du tɛ lo na azi, se mɛ lo ndo ma ka bɛlo se e li ye ti siɔni bere ti nzɔ̃ni.​—Di Nzembo 103:7-10.

Yezo pandó ya: “To e mɛ ka yayu, azi atɔndɔ bɛ ili mɔ mɛ santo ma ke.” (Matie 6:9) Bɛ se Nzapa na atitrɛ ma wo ma ko, kanda lo na bɛta ili lo bo kɔi. Na yanga ndɛ̃́ ndɛ̃́ ndɛ̃́ ko, ta ndo ili ili Nzapa kwɛ́ kɔi ma. Na ngbandi ando ili ni fani sĩni ya “Yehova.” Ambɛni azi ndo ili ni “Yawe.”​—Di Nzembo 83:18.

A hãna ili Nzapa ka ya ambɛni Ngbangɔ azi, asu na panda ni atitrɛ Gbia bere Nzapa. Kanda ngoi mɛ ndó ando su Ngbangɔ ko, alengbi ndó ti tã́ngo ili Nzapa ka ya ni  fani 7 000. Yezo fandó azi na ili Nzapa ngoi mɛ ndó lo ndo ha la na tɛnɛ tɛ Nzapa.​—Di Yoanɛ 17:26.

Ba video Nzapa na ili?

Pɛnɔ̃ mɛ e ndo hũ afa ya ta Yehova ndo da bɛlo na e ma? Azi ma wo ma ndo pa ya Nzapa ndo tala bɛ e na lége ti pɛnɔ̃, kanda ta adu seni la ma.​—Di Zaki 1:13.

Nzapa kpã ndima tɛrɛ e na se mɛ ndó lo li e ya e nvɛ̃ni e sala ye mɛ e ye. Ta bɛ e ndo de na lo mɛ ya e nvɛ̃ni la eye vɔrɔngɔ Nzapa na se bɛ e ma? (Yosua 24:15) Kanda ambɛni azi ala ye lingɔ ye ti siɔni ka tɛrɛ afɔ̃ la, nda mɛ pɛnɔ̃ asĩ ge lɛ gegi la. Bɛ Yehova ndo sɔ ma ya ma ngoi mɛ lo ndo hũ fangɔ ngbanga ngige.​—Di Ebandeli 6:5, 6.

Yehova du Nzapa mɛ ndó da bɛlo na e. Lo ndo ye ya edu na dengɔ be na ya du tɛ e. Ta adɛ yɔ ma lo na onzingɔ pɛnɔ̃ nga na azi ko ndo si na pɛnɔ̃. Kanda na olo se Nzapa zi lége hɛ̃́ siɔ kpale na pɛ nyĩ ngoi ko, lo hinga ndani. E na hĩngangɔ ndani ka ya wangɔ 8 ti ya nyĩ buku olo mɛ.​—Di 2 Petro 2:9; 3:7, 13.

Yehova ili e ya e hi tɛrɛ e dã na ni na lége ti sambela. Lo ndo da bɛlo na kɔi kɔi ge popo tɛrɛ e. (Nzembo 65:2; 145:18) Lo ndo ye kangɔ lɛ lo ndo siɔ ye tɛ e. Lo hĩnga ya e ndo li kpengbani ti dengɔ na bɛ lo, abɛ se ngoi mɛ ndɛ̃́ e ndo yu ndo. Abɛ se ezanga lengbingɔ, elengbi ti dungɔ na nzɔ̃ mangbi na Nzapa.​—Di Nzembo 103:12-14; Zaki 4:8.

Oko la Yehova hɛ̃́ e dungɔ le ngɛ̃́ ko, elengbi ti yengɔ lo a ɔ azi mɛ ndɛ̃́ zu. (Marko 12:30) Mɔ fa ya mɔ ye Nzapa ngoi mɛ mɔ manda alo mɛ aba lo, mɔ li nga aye mɛ lo ndo yɔ, mɔ na hingɔ tɛrɛ mɔ dã na lo.​—Di 1 Timɔte 2:4; 1 Yoanɛ 5:3.