YEJUIN REVISTA yotechititi ika onka miyek tlemach tlen kichiua matiknemilikan ika xok uelis titlaxikoskej. Kanaj tejua amantsin titlajyouijtika niman kanaj timotlajtoltia tla ok uelis tiyolpakis noso tla yakaj najmana mopampa. Kuajli xmatsto ika toTajtsin kita ijkuak tejua timajmana. Yejua sajnoye mitstlasojtla.

Akin okijkuilo Salmo 86 okiteititi kenon tlaneltokaya itech toTajtsin ijkuak okijkuilo: “Ijkuak nikpiya tlajyouilistli, motech ninoueyikatsajtsilia, pampa tejua tinechnankilia” (Salmo 86:7). San ika, kanaj tejua timotlajtoltia: “¿Kenon nechnankilia toTajtsin ‘ijkuak nikpiya tlajyouilistli’?”.

Maski toTajtsin kanaj xnimantsin kinpopolos motlaueluan, yejua kuajli mitsijlia ika mitsyolseuis niman ijkon xtlaxiko. Ipan iTlajtol, Biblia, yejua techijlia: “Maka itlaj xkonmatstiakan, yej nochipa xchiuakan oración. Xtlajtlanilikan Dios tlen mechp[o]loua niman xmakakan tlaxtlauijli. Niman Dios mechmakas yolseuilistli más ueyi yejuan xakaj uelis kajsikamatis. Niman in yolseuilistli kejeuas nemoyojlo niman nemotlamachilis” (Filipenses 4:6, 7). Xkita kenon seki textos tlen uajlauej ipan Biblia kiteititiaj ika toTajtsin najmana topampa.

Nion tototsitsintin “xkimelkaua Dios. [...] Nemejuamej más nenueyi kijtosnekij xken miyekej tototsitsinmej” (Lucas 12:6, 7).

XNEMILI YEJUIN: Maski nesiskia ika tototsitsintin xueyi kijtosnekij, toTajtsin kinpatiojkaita. ToTajtsin xkilkaua nion se tototsintli maski melak pitentsin; nochimej kimita ika ueyi kijtosnekij. Niman tejuamej, akin titlaltikpakchanejkej, toTajtsin más techpatiojkaita xijkon ken tototsitsintin. Yejua otexchijchiuj ijkon ken yejua niman tiuelij tikchiuaj seki tlen yejua kichiua (Génesis 1:26, 27).

“NoTEKO, tejua yotinechixtlaloj, niman kuajli tinechixmati [...]. Ueli tikmati on tlen niknemilia. [...] Xnechixtlalo niman xkita noyojlo” (Salmo 139:1, 2, 23).

XNEMILI YEJUIN: ToTajtsin kuajli mitsixmatstika. Yejua kimatstika tlenon tiknemilia niman tlenon mitsajmana. Maski sekimej xkasikamatij kenon titlajyouiya, toTajtsin najmana mopampa niman kineki mitspaleuis. Kuakon, kuajli xmatsto ika ok uelis tiyolpakis.

“NoTEKO, xkaki noueyikatsajtsilis; ¡xchiua para motech ma ajsi noueyikatsajtsilis! [...] ¡Xkaki tlinon nimitsijlia! ¡Nimantsin xnechnankili ijkuak nimitsnotsa! Ijkuakon, kakis inueyikatsajtsilis on yejuan xkipiyaj akinon impan tlachas” (Salmo 102:1, 2, 17).

XNEMILI YEJUIN: ToTajtsin kentla yeuejkaui kualijkuilojtiuj nochi imixayo tlaltikpakchanejkej (Salmo 56:8). Ompa noijki ijkuiliujtika tejua mixayo. ToTajtsin kilnamiki nochi ajmantli tlen yotikixnamik niman nochi mixayo pampa mitstlasojtla.

“Xmoyolchikauakan, pampa nejua ninemoDios. Nejua nemechmaka poder niman nemechpaleuiya. [...] Nejua nemoTEKO Dios [...] nemechilia: ‘Maka xmomojtikan. Nejua nemechpaleuiya’” (Isaías 41:10, 13).

XNEMILI YEJUIN: ToTajtsin kinektika mitspaleuis. Tla melak timoyolajmana, yejua mitsyolchikauas.

“Dios sanoyej okintlajsojtlak on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa” (Juan 3:16).

XNEMILI YEJUIN: ToTajtsin melak mitstlasojtla hasta okitemakak isenteKonetsin, Jesús. Ipampa tlen okichiuj Jesús, tejua uelis tikpiyas se nemilistli tlen xkeman tlamis niman nochipa tiyolpakis. *