Ixtlamatkej kijtouaj ika chichimej uelij kimatij kenon nemij okseki chichimej, kech xiuitl kipiyaj niman okseki tlemach. Seki chichimej hasta kinmajmachtiaj niman ijkon mauelikan makitakan tla onka se bomba. Tejuamej titlachiaj ika toixtololojuan niman ijkon tikmatij tlenon onka toyeualiyan, san ika, chichimej kikuij inyekajtsol. Kuakon, uelis tikijtoskej ika chichimej kentla “tlachiaskiaj” ika inyekajtsol.

Xkonnemili yejuin: Se chichi más kuajli tlajnekui xijkon ken tejuamej. Instituto Nacional de Normalización y Tecnología de Estados Unidos kijtoua ika chichimej nimantsin ueli kijnekuij noso kimatij itlaj. Uelis tikijtoskej ika yejuamej uelij kimatij tla atl tlen onka ipan se ueyi tanque kipiya achijtsin azúcar.

¿Tleka melak kuajli tlajnekuij chichimej?

• Iyekajtsol se chichi nochipa patstik, ika yejon, ueli más kuajli tlajnekui.

• Iyekajtsol se chichi kipiyaj kampa nijyotia niman noijki kampa tlajnekui. Ijkuak se chichi nijyotilana, ajakatl tlen kijyotilana kalaki kampa ika tlajnekui.

• Se chichi ueli kuajli kijnekui itlaj tlen onka 130 centímetros cuadrados ika uejka noso más. San ika, se tlaltikpakchane san ueli kuajli kijnekui itlaj tlen onka 5 centímetros cuadrados ika uejkatsin.

• Chichimej kinpiyaj 50 veces más células tlen ika tlajnekuij xijkon ken tejuamej.

Ika yejon, se chichi miyek ueli kijnekui. San xkonnemili yejuin, ixtlamatkej kijtouaj ika tla tejuamej ueli tikijnekuij se sopa, chichimej ueli kijnekuij tlenon ika okichijchiujkej yejon sopa.

Sekimej ixtlamatkej akin tekitij ipan instituto Pine Street, akin kuajli nomachtiaj itech kokolistli cáncer, kijtouaj ika icerebro niman iyekajtsol se chichi san sekan tekitij niman ijkon melak ueli kuajli tlajnekui. Ixtlamatkej kiyejyekouaj kichijchiuaskej itlaj kentla se “yekajtsojli” tlen uelis kiteititis tla onokej bombas niman okseki tlemach noso makita tla yakaj kipiya cáncer.

¿Tejua tlenon tiknemilia? ¿Tiknemilia ika ken tlajnekui se chichi san ijkon onesiko noso yakaj okichijchiuj?