Ne fakamau he Tohi Tapu e falu tuaga kelea lahi he ekefakakelea e lautolu ne malolō a lautolu ne lolelole. Manatu e tautolu e mena ne tupu ki a Napota. * Ko Ahapo, ko e patuiki ha Isaraela he senetenari ke hogofulu aki F.V.N., ne fakaatā e ia e hoana haana ko Iesepela ke tamate a Napota mo e tau tama taane haana ke moua he patuiki e uluvine he tagata ia. (1 Tau Patuiki 21:1-16; 2 Tau Patuiki 9:26) Ko e ha ne fakaatā he Atua e fakaaoga fakahehē kelea pihia he malolō?

O mai la ke kitekite ke he taha kakano aoga lahi: Kua nakai maeke e Atua ke pikopiko. (Tito 1:2) Lauia fēfē e mena ia ke he tau ekefakakelea muitui? He kamataaga, ne hataki he Atua e tau tagata ne totoko ki a ia to hoko e matematekelea lahi​—ko e mate. Mooli ai e kupu he Atua, ne lauia e tau tagata he mate tali mai he totokoaga he kaina ko Etena. Ko e tagata fakamua ne mate ai ha ko e mahani favale​—magaaho ne kelipopo e Kaino e matakainaga haana ko Apelu.​—Kenese 2:16, 17; 4:8.

Hagaao ke he fakamauaga tuai he tagata tali mai he mogoia, ne pehē e Kupu he Atua: “Kua pule ai e taha tagata ke he taha, ke kelea ai e ia ni.” (Fakamatalaaga 8:9) Kua mooli nakai e tau kupu ia? Ne hataki e Iehova e motu ko Isaraela, ko e tau tagata haana, to pule favale e tau patuiki ha lautolu, ti tagi atu ai e tau tagata ke he Atua. (1 Samuela 8:11-18) Ne fakamamafa lahi foki he Patuiki ko Solomona e tau tagata haana. (1 Tau Patuiki 11:43; 12:3, 4) Ko e tau patuiki kelea, tuga a Ahapo, ne muitui e favale. Manamanatu: Kaeke kua taofi he Atua e tau pule oti ia, kua pikopiko kia a ia he tau kupu haana?

Manatu foki, ne totoku e Satani kua fekafekau hokoia ni e tau tagata ke he Atua ha ko e tau kakano lotokai. (Iopu 1:9, 10; 2:4) Kaeke ke puipui he Atua e tau fekafekau oti haana mai he tau pule oti, to nakai kia lalago he mena nei e tau talahauaga ha Satani? Ti ka puipui he Atua e tau tagata mai he tau favaleaga oti kana, kua nakai kia fakalago a ia ma e pikopiko lahi mahaki? He puipuiaga pihia, to liga manatu e tokologa kua maeke e tau tagata ke kautū e pule ha lautolu ka nakai fai Atua. Ka kua kehe mamao e talahauaga he Atua​—kua nakai maeke e tagata ke pule ki a ia ni. (Ieremia 10:23) Manako a tautolu ke hoko mai e Kautu he Atua; ko e magaaho ia ni ka fakaotioti e nakai fakafili tonu.

Kakano kia e mena ia kua nakai fai tauteaga e Atua ke he favale? Nakai. Manamanatu la ke he ua e mena ne taute e ia: Fakamua, ne fakakite e ia e tau ekefakakelea. Ma e fakatai, ne fakakite he Kupu haana e tau mena oti he lagatau ha Iesepela ki a Napota. Ne fakakite foki he Tohi Tapu ko e tau gahua kelea pihia kua omoomoi he pule malolō ne manako ke ufiufi a ia ni. (Ioane 14:30; 2 Korinito 11:14) Ne fakakite he Tohi Tapu a ia ko Satani ko e Tiapolo. He fakakite e mahani kelea muitui mo e favale fakalataha mo e punaaga mooli he tau mena ia, kua lagomatai he Atua a tautolu ke atāina mai he tau mahani kelea muitui. Kua puipui mooli e ia e vahā tukulagi anoiha ha tautolu.

Ke uaaki, ne foaki he Atua e amaamanakiaga mauokafua to fakaoti e favale. He puhala ne fakatapakupaku, fakafili, mo e fakahala e ia a Ahapo mo Iesepela​—mo e tokologa foki ne tuga a laua​—kua mauokafua a tautolu ke he tau maveheaga haana to hoko e magaaho ka fakahala e tau tagata oti ne taute mena kelea. (Salamo 52:1-5) Foaki mai foki he Atua e amaamanakiaga mauokafua to nakai leva ti utakehe e ia e tau lauiaaga he mahani kelea ma lautolu ne fakaalofa ki a ia. * To kitia he tagata tua fakamooli ko Napota e magaaho ka nonofo tukulagi a ia mo e tau fanau taane haana he lalolagi parataiso ka atāina mai he nakai fakafili tonu.​—Salamo 37:34.