Ko e Atua mooli ko e Tufuga he tau mena oti kana. Nakai fai kamataaga a ia mo e to nakai fai fakahikuaga. (Salamo 90:2) Ko Ia e Punaaga he tala mitaki ne moua i loto he Tohi Tapu. (1 Timoteo 1:11) He foaki he Atua e moui ki a tautolu, kua lata a tautolu ke tapuaki ki a ia tokotaha.​—Totou Fakakiteaga 4:11.

Nakai fai tagata ne kitia e Atua ha ko ia ko e Agaaga, kakano ai kua mahomo hake a ia ke he ha moui he tau mena momoui ne nonofo he lalolagi. (Ioane 1:18; 4:24) Ati maeke a tautolu ke maama e aga he Atua mai he tau mena ne tufuga e ia. Tuga anei, ko e kehekehe he tau fua lakau mo e tau fiti kua fakakite mai ki a tautolu e fakaalofa mo e pulotu haana. Ko e laulahi he lagi mo e lalolagi katoa kua tala mai ki a tautolu e malolō haana.​—Totou Roma 1:20.

Maeke a tautolu ke fakaako fakalahi foki ke he aga he Atua he totou e Tohi Tapu. Ma e fakatai, kua tala mai ki a tautolu e mena ne fiafia ki ai e Atua mo e mena ne nakai fiafia ki ai a ia, puhala ne taute e ia e tau tagata, mo e puhala ne fehagai a ia ke he tau tuaga kehekehe.​—Totou Salamo 103:7-10.

Pehē a Iesu: “Ha mautolu a Matua na e, ha ha he lagi, kia tapu hau a higoa.” (Mataio 6:9) Pete ne loga e tau matahigoa he Atua, na taha ni e higoa haana. Ke he tau vagahau takitaha, ne kehekehe e fakaleoaga. He faka-Niue kua fakaleo ai “Iehova.” Ka e fakaleo ai he falu tagata “Yahweh.”​—Totou Salamo 83:18.

Ko e higoa he Atua kua utakehe he tau Tohi Tapu loga ti hukui aki e tau matahigoa Iki po ke Atua. Ka ko e mogo ne  tohia e Tohi Tapu, kua tohi ai e higoa he Atua kavi ke he laga 7,000. Ne fakailoa e Iesu e higoa he Atua he fakaako e ia e tau tagata hagaao ke he Atua.​—Totou Ioane 17:26.

Kakano kia ko e matematekelea ne holofa fano kua nakai leveki e Iehova ko e Atua a tautolu? Falu tagata ne talahau kua taute e ia a tautolu ke matematekelea ke kamatamata a tautolu, ka e nakai mooli e mena nei.​—Totou Iakopo 1:13.

Ne foaki he Atua ke he tagata e lilifu he atāina ke fifili. Nakai kia loto fakaaue a tautolu ke he atāina ha tautolu ke fifili ke fekafekau ke he Atua? (Iosua 24:15) Ka e tokologa ne fifili ke taute e tau mena kelea ke he falu, ti kua lahi mahaki e matematekelea. Kua momoko a Iehova ke kitia e tau nakai fakafili tonu pihia.​—Totou Kenese 6:5, 6.

Ko Iehova e Atua kua leveki a tautolu. Kua manako a ia ki a tautolu ke fiafia e moui. Nakai leva to utakehe e ia e matematekelea mo lautolu ne fakatupu ai. Ka ko e mogonei, kua ha ha ia ia e kakano mitaki ke fakaatā e matematekelea ke fai magaaho. He Fakaakoaga 8, to fakaako e tautolu e kakano ia.​—Totou 2 Peteru 2:9; 3:7, 13.

Kua uiina e Iehova a tautolu ke fakatata ki a ia he vagahau ki a ia he liogi. Ti fiafia a ia ki a tautolu takitokotaha. (Salamo 65:2; 145:18) Kua makai a ia ke fakamagalo. Ne mailoga e ia e tau laliaga ha tautolu ke fakafiafia a ia, pete he kaumahala a tautolu falu magaaho. Ha ko e nakai mitaki katoatoa ha tautolu, maeke mooli a tautolu ke moua e fakafetuiaga tata mo e Atua.​—Totou Salamo 103:12-14; Iakopo 4:8.

Ha kua foaki e Iehova e moui ki a tautolu, kua lata a tautolu ke mua atu e fakaalofa ki a ia ke he fakaalofa ha tautolu ke he taha tagata foki. (Mareko 12:30) He fakakite e koe e fakaalofa haau ke he Atua he fakaako fakalahi hagaao ki a ia mo e taute e tau mena ne ole mai e ia, to fakatata lahi mahaki a koe ki a ia.​—Totou 1 Timoteo 2:4; 1 Ioane 5:3.