Ko Irma ne nofo i Sihamani ne kua teitei 90 e tau he moui. He lagaua e veli kelea mo e loga e iihi haana, kua nakai maeke a ia mogonei ke fakamatala tuga fakamua. Kua fakatutala a Irma mogonei ke he tua haana he tohitohi ke he magafaoa mo e tau kapitiga. Ko e tau tohi atihake mo e fakamafana ha Irma ne kua fiafia e tau tagata ke moua, mo e tau hea tumau ki a ia ko e liu mogo fe ke moua e taha tohi foki. Moua foki e ia e tau tohi fakaaue mo e ole ke liu tohi foki. Pehē a Irma, “Fiafia a au he taute e mena nei mo e fakatumau ke fakamatala.”

Tohi foki a Irma ke he falu tagata momotua. Pehē a ia: “Taha e fifine motua ne hea he telefoni ki a ia mo e pehē kua fakamafana he tohi haaku a ia he magaaho ne mate e taane haana. Tuku e ia e tohi i loto he Tohi Tapu mo e totou tumau he tau mogo afiafi. Taha fifine foki ne mate foou e taane, ne pehē mua atu e lagomatai he tohi haaku kia ia ke he lauga he pātele. Loga e hūhū haana mo e manako ke moua e tali mo e fia hau ke feleveia mo au.

Ko e taha kapitiga ha Irma ne nakai ko e Fakamoli ne hiki mamao mo ia ne ole ki a Irma ke tohitohi ki a ia. “Toka oti he fifine e tau tohi haaku,” he talahau e Irma. “He mate a ia, ne hea mai e tama fifine haana. Pehē a ia kua totou oti e ia e tau tohi haaku ne fakafano ke he haana matua fifine mo e ole a ia kia au ke tohi ki a ia foki hagaao ke he Tohi Tapu.”

Fiafia lahi a Irma he gahua he fekafekauaga. Pehē a ia: “Ole au ki a Iehova ke fakatumau mo e fakamalolō au ke fekafekau ki a ia. Kua nakai maeke au ke fano ke fakamatala, ka e taute e au a mena kua fahia ki ai.”