“Kungabonakala kungathabisi ukufunda iBhayibheli nawunganandlela efaneleko yokulifunda,” kutjho umfowethu osesemutjha u-Will.

 Kghani ungakuthabela ukwazi indlela engakusiza ukghone ukuthabela ukufunda iBhayibheli? Isihlokwesi sizokusiza.

•  Yenza imiTlolo oyifundako iphile

•  Yenza irhubhululo!

•  Okutjhiwo ziintanga zakho

 Zifake endabeni oyifundako. Ungasebenzisa iindlela ezilandelako:

1.   Khetha ingcenye yeBhayibheli ongathanda ukuyifunda. Ungakhetha isenzakalo esithileko esiseBhayibhelini, indaba evela eVangelini namkha ungakhetha indaba ethileko esekufundweni kweBhayibheli okusadrama okufumaneka ku-jw.org.

2.   Funda indaba leyo. Ungayifunda uwedwa, uyifunde ngokuzwakalako nabangani bakho namkha namalunga womdenakho. Omunye angafunda ingcenye elandisako kuthi abanye bafunde iingcenye zabalingiswa.

3.   Ungalinga indlela yinye namkha ezingeziweko kwezilandelako:

   •   Gwala iinthombe ezifanekisa lokho ofunda ngakho. Namkha ugwale ukulandelana kwezenzakalo. Tlola amezwi ahlathulula lokho okwenzeka esithombeni ngasinye.

   •   Gwala imifanekiso yalokho ofunda ngakho. Ngokwesibonelo, njengombana ufunda ngomuntu othembekileko, tlola ubuntu ebekanabo, izinto ebekazenza neembusiso azifumeneko.

   •   Yenza lokho okufundako kube ngasuthi ziindaba ezikumabonakude. Bika iindaba ucabangela woke amahlangothi bewenze “nemikhulumiswano” nabantu ababandakanyekileko nabofakazi bokuzibonela.

   •   Nange omunye wabalingiswa endabeni ofunda ngayo athatha isiqunto esimbi, cabanga ngomphumela ohlukileko. Ngokwesibonelo, cabanga ngalokha uPitrosi aphika uJesu. (Markosi 14:66-72) UPitrosi bekangaqalana njani nokugandelelekokhu ngendlela engcono?

   •   Nawuzizwa ngasuthi unekghono, thatha igadango lukuzitlolela idrama uyisusela eBhayibhelini. Veza neemfundo ezifumaneka endabeni leyo.—Roma 15:4.

 Nawuhlolisisa kuhle yoke imininingwana, ungafumana izinto ezikarisako ngendaba oyifundako. Ngezinye iinkhathi igama linye namkha amabili asendabeni eseBhayibhelini angasivezela amaphuzu akarisako.

 Ngokwesibonelo, madanisa uMatewu 28:7 noMarkosi 16:7.

•    Kubayini uMarkosi athi uJesu kungasikade bekazokubonakala ebafundini bakhe “nakuPitrosi”?

•  Umtlhala: UMarkosi bekangekho nakwenzeka izenzakalwezi; kuyakhanya bona indaba le uyizwe kuPitrosi.

•  Iphuzu elikarisako: Kubayini uPitrosi bekaqiniseka bona uJesu bekafuna ukumbona godu? (Markosi 14:66-72) UJesu watjengisa njani ukuthi umngani weqiniso kuPitrosi? Ungamlingisa njani uJesu ube mngani weqiniso kwabanye?

 Nawenza imiTlolo oyifundako iphile begodu wenze irhubhululo, uzokuthabela khulu ukufunda iBhayibheli!