Ee, Modimo o thuša bao ba mo kgopelago dilo tšeo di dumelelanago le thato ya gagwe gomme ba dira bjalo ka pelo ka moka. Le ge o sa ka wa rapela le ka mohla, mehlala ya ka Beibeleng ya bao ba ilego ba rapela ba re: “Modimo nthuše,” e ka go kgothatša. Ka mohlala:

•   “Nthuše hle Jehofa Modimo wa ka; mphološe go ya ka botho bja gago.”—Psalme 109:26.

•   “Ke a hloka e bile ke modiidi: Modimo, nthuše hle.”—Psalme 69:6, Douay Version.

 Go molaleng gore mongwadi wa mantšu a o be a na le tumelo e tiilego go Modimo. Lega go le bjalo, Modimo o theetša bohle bao ba tlago go yena ka maikemišetšo a mabotse go swana le ba “dipelo tše di robegilego” goba “ba meoya e nyamilego o šoro.”—Psalme 34:18.

 Ga se wa swanela go tšhoga gore Modimo o kgole kudu le gore ga a tshwenyege ka mathata a gago. Beibele e re: “Jehofa o phagame, fela o bona yo a ikokobeditšego; eupša yo a iphagamišago o mo tsebela kgole.” (Psalme 138:6) Ge e le gabotse, Jesu o kile a botša barutiwa ba gagwe gore: “Yona meriri ye ya dihlogo tša lena e badilwe ka moka.” (Mateo 10:30) Modimo o šetša dilo tše dinyenyane kudu ka wena tšeo o sa di lemogego. Gona ruri o tla go kwa ge o mo rapela gore a go thuše ge o le mathateng!—1 Petro 5:7.