Aowa. Beibele ga e re tšhelete ke Sathane. E bile ga e re tšhelete e dira gore go be le dilo tše mpe. Polelwana e tlwaelegilego yeo e rego “tšhelete ke modu wa mehuta ka moka wa dilo tše mpe” ga se ka mokgwa wo e tšwelelago ka gona ka Beibeleng. Ge e le gabotse Beibele e re: “Lerato la tšhelete ke modu wa mehuta ka moka ya dilo tše di gobatšago.” a—1 Timotheo 6:10.

•  Beibele e re’ng ka tšhelete?

•  Ke ka baka la’ng Beibele e re lemoša ka go rata tšhelete?

•  Keletšo yeo Beibele e re neago yona ka tšhelete e ka re hola bjang?

•  Ditemana tša Beibele tšeo di bolelago ka tšhelete

 Beibele e re ge e ba re diriša tšhelete gabotse e ka re hola le go re “šireletša.” (Mmoledi 7:12) Le gona ge e reta batho ba go se timane e bolela ka batho ba go fa batho ba bangwe tšhelete.—Diema 11:25.

 Le gona, Beibele e lemoša batho bao ba dulago ba naganne ka go dira tšhelete. E re: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona.” (Baheberu 13:5) Seo re ithutago sona mo ke gore re swanetše go diriša tšhelete gabotse go e na le go nyaka go huma. Ka gona re swanetše go ithuta go kgotsofala ge re na le dilo tšeo re tlogago re di hloka tše bjalo ka dijo, diaparo le madulo.—1 Timotheo 6:8.

 Batho bao ba nago le megabaru goba ba ratago tšhelete ba ka se hwetše bophelo bjo bo sa felego. (Baefeso 5:5) Go ba le megabaru goba go kitimiša tšhelete go swana le borapedi bja diswantšho goba bodumedi bja maaka. (Bakolose 3:5) Le gona, ge batho ba bantši ba kitimišana le tšhelete gantši ba ka feleletša ba dira dilo tšeo di ganetšanago le melao ya motheo ya Beibele. Diema 28:20 e re bao ba “akgofelago go hwetša mahumo [ba] tla ba le molato.” Ba ka ba ba lekega go dira dilo tše mpe go swana le go senya batho ba bangwe maina, botsotsi go bolaya, go diriša tšhelete ka tsela yeo e sego molaong le go utswa batho gore ba tle ba hwetše tšhelete.

 Le ge go rata tšhelete go ka se dire gore motho a dire dilo tše mpe, go ka dira gore a wele mathateng. Beibele e re: “Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago.”—1 Timotheo 6:9.

 Ge e ba re sa dire dilo tše mpe e le gore re hwetše tšhelete e bile re phela ka go dumelelana le melao ya Modimo, re tlo dula re itlhompha e bile Modimo o tlo re thekga le go re amogela. Modimo o tshepiša bao ba dirago sohle seo ba ka se kgonago go mo kgahliša gore: ‘Le ka mohla nka se ke ka le tlogela le ge e le go le lahla.’ (Baheberu 13:5, 6) Le gona o re kgonthišetša gore: “Motho yo a botegago ditirong tša gagwe o tla hwetša ditšhegofatšo tše dintši.”—Diema 28:20.