Mmušo wa Modimo o tla tšeela mebušo ka moka ya batho legato gomme wa buša lefase ka moka. (Daniele 2:44; Kutollo 16:14) Ge seo se diragetše, Mmušo wa Modimo o tla . . .

•   Fediša batho ba kgopo bao boithati bja bona bo re kwešago bohloko ka moka. “Ge e le ba kgopo ba tla fedišwa lefaseng.”—Diema 2:22.

•   Fediša dintwa ka moka. “[Modimo] o fediša dintwa go fihla pheletšong ya lefase.”—Psalme 46:9.

•   Tliša katlego le tšhireletšego lefaseng. “Yo mongwe le yo mongwe o tla dula ka khutšo ka tlase ga morara wa gagwe le ka tlase ga mogo wa gagwe, e bile go ka se be le yo a ba tšhošago.”—Mika 4:4, Good News Translation.

•   Fetoša lefase paradeise. “Maganata a tla thaba; dinaga tšeo di se nago meetse di tla hlalala gomme tša khukhuša matšoba.”—Jesaya 35:1, Contemporary English Version.[3]

•   Nea batho ka moka mošomo wo o nago le morero le wo ba tlago go o thabela. “Bahlaolwa ba [Modimo] ba tla thabela modiro wa diatla tša bona ka botlalo. Ba ka se itapišetše lefeela.”—Jesaya 65:21-23.

•   Fediša bolwetši. “Ga go na modudi yo a tla rego: ‘Ke a babja.’”—Jesaya 33:24.

•   Dira gore re se sa tšofala. “Gona anke nama ya gagwe e be e nanana go feta bofseng; a a boele mehleng ya matla a bofseng bja gagwe.”—Jobo 33:25.

•   Tsoša bahu. ‘Bohle bao ba lego mabitleng ba tla kwa lentšu la Jesu gomme ba tšwa.’—Johane 5:28, 29.