Mafelelong banna bao ba bego ba etetše Jobo ba ile ba homola. Mohlomongwe go be go no kwagala moya wa go fišanyana wo o tšwago leganateng la Arabia. Jobo o be a feletšwe ke mantšu ka ge a be a lapišitšwe ke poledišano e telele yeo a bilego le yona le batho bao ba bego ba mo etetše. Nagana ka Jobo a lebeletše batho ba bararo bao ba bego ba ipitša bagwera ba gagwe, e lego Elifase, Bilidada le Tsofara a tenegile e bile go bonagala a ba botšiša gore ba homoletše eng. Ba be ba sa kgone le go mo lebelela ka mahlong ka ge ba be ba lemoga gore mantšu a bona a lefela le a go kweša bohloko ga se a kgona go fetša Jobo matla. (Jobo 16:3) Go sa šetšwe mathata ka moka ao a wetšego Jobo, se segolo go yena e be e le go no dula a botega.

Jobo o ile a ikwa okare selo seo a šetšego ka sona ke go botegela Modimo feela. O be a lahlegetšwe ke mahumo, bana ba gagwe ka moka ba lesome, thekgo le go hlomphiwa ke bagwera le baagišani e bile a babja. Letlalo la gagwe le be le swifetše le tletše magogo e bile dišo tša gagwe di be di etšwa diboko. Mohemo wa gagwe o be o nkga gampe. (Jobo 7:5; 19:17; 30:30) Dilo tše mpe tšeo di bego di bolelwa ke banna ba ba bararo di ile tša kwatiša Jobo. O be a ikemišeditše go ba bontšha gore ga se yena modiradibe yoo ba bego ba nagana gore ke yena. Mantšu a mafelelo a Jobo a ile a ba tswalela melomo. Ka morago ga go botša Jobo mantšu a mabe, ba be ba sa hlwe ba tseba gore ba mmotše eng. Lega go le bjalo, Jobo o be a dutše a ekwa bohloko. O be a sa dutše a hloka thušo go mathata ao a bego a na le ona!

Re ka kgona go kwešiša gore ke ka baka la eng Jobo a be a sa kgone go kwešiša boemo bjoo a bego a le go bjona. O be a hloka tlhahlo le go phošollwa. O be a tloga a hloka motho yoo a bego a ka mo kwela bohloko le go mo homotša, e lego seo nkabego se dirile ke bagwera ba gagwe ba bararo. Na o kile wa ikwa eka ge o ka se hwetše tlhahlo goba khomotšo o be o ka se kgone go kgotlelela? Na o kile wa nyamišwa ke batho bao o bego o nagana gore ke bagwera ba gago? Go ithuta kamoo Jehofa a ilego a thuša mohlanka wa gagwe Jobo ka gona le ka moo Jobo a ilego a arabela ka gona, go tlo re thuša goba le kholofelo.

Re tlo kwa ka taba e nngwe yeo re bego re sa e letela. Kgauswi le moo Jobo a bego a le gona, go be go na le lesogana le lengwe leo le bitšwago Elihu. Ke kgajana le be le dutše moo gomme le theeditše banna bao ba bagolo ba bolela gomme le ile la kwatišwa kudu ke dilo ka moka tšeo ba bego ba di bolela.

Elihu o be a kwatišitšwe ke Jobo. O ile a nyamišwa ke go bona Jobo a leka go bontšha banna bao ba bararo ba ba bego ba mo gateletše gore “o lokile go feta Modimo.” Lega go le bjalo, Elihu o ile a kwela Jobo bohloko o be a tloga a bona gore Jobo o kwele bohloko, o a itshola e bile o hloka keletšo e botho le go homotšwa. Ke ka baka leo Elihu a ile go a felela pelo banna bao ba bararo bao ba bego ba leka go mo homotša. O ba kwele ba botša Jobo dilo tšeo di kwešago bohloko, ba senya tumelo ya gagwe, seriti le go botega ga gagwe! Sa go nyamiša le go feta ke gore ba ile ba feleletša ba bolela maaka ao a ilego a bontšha eka Modimo ke yo kgopo. Ka morago ga dilo ka moka tšeo Elihu a di kwelego, o ile a bona go hlokagala gore a bolele se sengwe!—Jobo 32:2-4, 18.

Elihu o ile a re: “Nna ke yo monyenyane gomme lena le ba bagolo. Ke ka baka leo ke ilego ka itshwara gomme ka tšhaba go le botša seo ke se tsebago.” Eupša ga se a ka a hlwa a homola, o ile a tšwela pele ka gore:” Ga se feela bao ba atetšwego ke matšatši bao ba lego bohlale, le gona ga se ba bagolo feela bao ba kwešišago kamoo go ahlolwago ka gona.” (Jobo 32:6, 9) Ke moka Elihu o ile a bolela nako e telele go hlatsela gore mantšu ao e be e le therešo. O ile a bolela le Jobo ka tsela e fapanego le yeo Elifase, Bilidada le Tsofara ba boletšego le Jobo ka yona. Elihu o ile a tshepiša Jobo gore a ka se mo nyenyefatše e bile a ka se bolele le yena ka tsela yeo e tla mo dirago gore a ikwe a gateletšegile. O ile a swara Jobo ka seriti a ba a bontšha gore banna bale ba bararo ba ile ba se hlomphe Jobo. * Ka tlhompho, o ile a re: “Bjale wena Jobo, hle ekwa mantšu a ka.”—Jobo 33:1, 7; 34:7.

Elihu o ile a botša Jobo keletšo ya nnete a re: “Wena Jobo o re o sekile, ga o tshele molao; o hlwekile, gomme ga o na molato e bile o re Modimo o hwetša dinako tša go go ganetša.” Elihu o ile a utolla bothata bja kgonthe bjo bo lego pelong ya Jobo. O ile a mmotšiša gore: “Na se ke sona seo o bego o se lebelela e le toka? O itše: ‘Ke lokile go feta Modimo’?” Elihu ga se a ka a dumelela Jobo gore a tšwele pela a nagana ka tsela yeo a bego a nagana ka yona. Elihu o ile a re:“O be o se wa nepa go se.” (Jobo 33:8-12; 35:2) Jobo o be a kwatile kudu ka gobane o be a lahlegetšwe ke dilo tše dintši e bile batho bao ba bego ba swanetše go mo homotša ba ile ba mo swara gampe. Eupša Elihu o ile a lemoša Jobo ka gore: “O hlokomele gore pefelo e se go goketše gore o ope magoswi ka go gegea.”—Jobo 36:18.

Sa bohlokwa le go feta, Elihu o ile a bontšha gore Jehofa o dula a nepile. O ile a bolela mantšu a bonolo eupša a le bohlokwa a re: “Go dira tše kgopo a go be kgole le Modimo wa therešo, le go dira ka go hloka toka a go be kgole le Ramatlaohle! . . . E bile Ramatlaohle yena ga a kgopamiše kahlolo.” (Jobo 34:10, 12) Elihu o ile a bontšha Jobo gore Jehofa o na le kgaugelo. O ile a botša Jobo gore Jehofa ga se a ka a mo otla gaešita le ge a boletše dilo tše mpe tša go nyatša Modimo. (Jobo 35:13-15) Elihu ga se a ka a itira eka o kwešiša dilo ka moka ka Modimo. O ile a re: “Modimo o phagame kudu go feta kamoo re ka tsebago.”—Jobo 36:26.

Elihu o ile a eletša Jobo ka go lebanya, eupša o be a le botho. O ile a re ka letšatši le lengwe Jehofa o tlo fodiša Jobo. Modimo o be a ka re go mohlanka wa gagwe yo a botegago: “Anke nama ya gagwe e be e nanana go feta bofseng; A a boele mehleng ya matla a bofseng bja gagwe.” Selo se sengwe se botho seo Elihu a ilego a se dira ke gore go e na le gore a botše Jobo gore a dire eng, o ile a mmotšiša dipotšišo ke moka a mo dumelela gore a di arabe. Elihu o ile a re: “Bolela, gobane ke kgahlwa ke go loka ga gago.” (Jobo 33:25, 32) Eupša Jobo ga sa nka a araba. Mohlomongwe Jobo ga sa nka a nyaka go ikemelela ka mantšu a botho le a kgothatšago ao Elihu a bego a mmotša wona. Goba mohlomongwe o ile a lla ge a be a lemoga gore Elihu o na le taba le yena.

Re ka ithuta dithuto tše bohlokwa go banna ba ba babedi bao ba bego ba botega. Go Elihu re ithuta gore re swanetše go eletša batho ge ba aroga re ba homotše ge ba ekwa bohloko. Ge e ba o dira phošo e kgolo, mogwera wa nnete a ka se tšhabe go go botša e bile a ka se tšhabe go go botša ge e ba o le kgauswi le go wela kotsing. (Diema 27:6) Re swanetše go ba bagwera ba mohuta woo, re be botho e bile re kgothatše bao ba nyamilego gaešita le ge ba ka ba ba bolela dilo tše di fošagetšego. Eupša ge e le rena re hlokago keletšo, mohlala wa Jobo o re thuša gore re ikokobetše gomme re amogele keletšo. Ka moka ga rena re hloka go eletšwa le go phošollwa. Go amogela phošollo go ka phološa maphelo a rena.—Diema 4:13.

Elihu o ile a bolela ka phefo, maru, modumo wa magadima le magadima. O ile a bolela ka Jehofa gore: “Theetšang ka kelohloko go duma ga lentšu la gagwe.” Ka moragonyana, Elihu o ile a bolela ka “ledimo.” (Jobo 37:2, 9) Go ka direga gore ge Elihu a be a bolela le Jobo, go be go na le ledimo leo le tlago. Mafelelong, e ile ya ba ledimo le matla. Ke moka go ile gwa direga selo se sengwe seo se makatšago, Jehofa o ile a bolela!—Jobo 38:1.

Ge re bala puku ya Jobo, re thabela go bala dikgaolo tšeo di bolelago ka dipoledišano tša Jehofa le Jobo. Go be go le bjalo ka ge eka ledimo leo le rwala mantšu a Elifase, Bilidada le Tsofara ao a bego a se na mohola. Jehofa ga sa nka a bolela le banna bao nakong ya ge a be a bolela le Jobo. O ile a phošolla mohlanka wa gagwe Jobo go swana le ge tate a phošolla morwa wa gagwe.

Jehofa o be a kwešiša bohloko bjo Jobo a bego a bo kwa. O ile a mo kwela bohloko e lego seo a dulago a se dira ge bahlanka ba gagwe ba na le mathata. (Jesaya 63:9; Sakaria 2:8) Eupša o be a tseba gape gore Jobo o bolela ka go “hloka tsebo.” Ka go dira bjalo, Jobo o be a dira gore boemo bja gagwe go mpefale le go feta. Jehofa o ile a phošolla Jobo ka go mmotšiša dipotšišo tše dintši e le gore a nagane. O ile a re: “O be o le kae ge ke be ke thea lefase? Mpotše ge e ba o na le kwešišo.” Ge Modimo a be a bopa dilo, “dinaledi tša meso,” e lego barongwa ba Modimo, ka moka ba ile ba gobela ka go hlalala. (Jobo 38:2, 4, 7) Jobo o be a ka se kgone go araba ka gobane o be a sa tsebe.

Jehofa o ile a tšwela pela a bolela ka dilo tšeo a di bopilego. Re ka re Jehofa o be a hlalosetša Jobo ka dithuto tšeo gona bjale re di bitšago natural sciences, e lego thuto ya dinaledi, thuto ya diphedi, thuto ya lefase le thuto ya dilo tša tlhago. Jehofa o ile a bolela ka diphoofolo tšeo di bego di le gona nageng yeo Jobo a bego a dula go yona, e lego tau, legokobu, pudi ya thabeng, pitsi, poo ya naga, mpšhe, pere, pekwa, ntšhu, Behemothe (yeo go ka diregago gore ke kubu), le Lebiathane (yeo go ka diregago gore ke kwena). Nagana Jehofa Modimo yo a bopilego dilo ka moka legodimong le lefaseng a go hlalosetša ka dilo tšeo a di bopilego! *

Ke ka baka la eng se se be se le bohlokwa? Ka gobane Jobo o be a swanetše gore a be le boikokobetšo. Jobo o be a belaela ka gore Jehofa ga a mo sware gabotse. Ka go dira seo, o be a senya tswalano ya gagwe le Tatagwe. Se se ile sa dira gore boemo bja gagwe bo mpefale le go feta. Ka gona Jehofa o ile a mmotšiša gantši gore o be a le kae ge a be a bopa dilo tša legodimong le lefaseng. A ba a mmotšiša le gore a ka kgona go fepa goba go laola diphoofolo tšeo Modimo a di bopilego. Ge e ba Jobo a be a ka se kgone go laola dilo tšeo Jehofa a di bopilego na o be a ka botša Jehofa gore a di re eng? Aowa. Jehofa o tseba gabotse seo a swanetšego go se dira le gore o swanetše go se dira bjang go feta kamoo Jobo a bego a ka tseba goba go kwešiša ka gona.

Dilo ka moka tšeo Jehofa a ilego a di botša Jobo, o be a mmontšha gore o mo rata kudu. Go be go le bjalo ka ge eka Jehofa o boledišana le Jobo o re: ‘Morwa wa ka ge e ba ke bopile dilo e bile ke kgona go di hlokomela, na o nagana gore nka palelwa ke go hlokomela wena? O nagana gore nka no go lebelela goba ka go lahla, ka go tšeela bana, polokego goba mahumo? Na ga se nna nka go fago dilo ka moka tšeo di go lahlegetšego le go go fodiša?’

Go dipotšišo tšeo Jehofa a di botšišitšego Jobo e le gore a naganišiše, Jobo o ile a no a raba gabedi feela. Ga se a ka a ngangišana le Jehofa goba a ipeela mabaka. O ile a thoma go bona gore o be a sa tsebe Jehofa gabotse, ke moka a itsholela mantšu ao a a boletšego. (Jobo 40:4, 5; 42:1-6) Jobo o re beetše mohlala o mobotse kudu ka go ba le tumelo. Ka morago ga ditlaišego ka moka tšeo a bilego go tšona, o ile a dula a na le kgotlelelo le tumelo e tiilego go Jehofa. O ile a amogela phošollo ya Jehofa ke moka a fetola tsela yeo a bego a nagana ka yona. Re ka ipotšiša gore na nka kgona go amogela go phošollwa le go eletšwa? Ka moka re hloka go eletšwa. Ge e ba re amogela phošollo, re ekiša mohlala wa Jobo.

Jehofa o ile a homotša Jobo bohlokong bjo a be go a le go bjona. Jehofa o botša Elifase yoo e lego yo mogolo go ba bagwera ba Jobo ba maaka o re: “Bogale bja ka bo tukela wena le bagwera ba gago ba babedi, ka gobane lena ga se la bolela therešo ka nna go etša ge mohlanka wa ka Jobo a dirile.” (Jobo 42:7) Nagana ka mantšu ao. Na Jehofa o be a e ra gore dilo ka moka tšeo di boletšwego ke banna ba ba bararo ke maaka goba mantšu ao a boletšwego ke Jobo ke nnete? Aowa. * Lega go le bjalo go na le phapano e kgolo magareng ga Jobo le bathomeletši ba gagwe. Jobo o be a kwele bohloko, a nyamile, le go fela matla ka baka la ditatofatšo tša maaka. Ka baka leo re a kwišiša gore Jobo o be a boledišwa ke go kwa bohloko. Eupša Elifase le bagwera ba gagwe ba babedi ba be ba se boemong bjo thata bja go swana le bja Jobo. Ba boletše dilo tše mpe ka gobane ba be ba ikgantšha e bile tumelo ya bona go Modimo e be e fokola. Ba ile ba hlasela Jobo e bile ba nyatša Jehofa ba re o sehlogo e bile ke yoo kgopo.

Ga go pelaelo ge Jehofa a ile a nyaka gore banna bao ba dire sehlabelo se segolo. O ile a re ba dire sehlabelo ka dipoo tše šupa le dikgapa tše šupa—dipoo le dikgapa di be di tura. Ka morago Jehofa o ile a laela Baisiraele gore ge moperisita a ka dira sebe e lego sebe seo se ka tlišetsago setšhaba molato gona a tlišetše Jehofa poo yeo e phetšego gabotse e le sebego sa sebe bakeng sa sebe seo a se dirilego. (Lefitiko 4:3) Poo e be e tura go feta diphoofolo ka moka mehleng yeo ya Baisiraele. Jehofa o ile a botša banna bao ba bararo gore o tlo ba lebalela feela ge Jobo a ka ba rapelela. * (Jobo 42:8) Jobo o swanetše goba a ile a kgothatšwa ke go bona Jehofa a mo emelela!

Jehofa o be a kgodišegile gore Jobo o be a tlo lebalela banna bao ba bararo bao ba ilego ba mo kweša bohloko kudu. Jobo o ile a dira seo se thabišago Jehofa. (Jobo 42:9) Mediro ya Jobo e ile ya bontšha gore o botegela Jehofa go feta ge a be a ka bolela ka mantšu. Jehofa o ile a šegofatša Jobo kudu gobane a be a ekwa.

Jehofa o be a ‘rata Jobo kudu e bile o ile a mo gaugela’. (Jakobo 5:11) O ile a bontšha bjang seo? O ile a fodiša Jobo. Nagana gore Jobo o ile a ikwa bjang nama ya gagwe e le e “nanana go feta bofseng” go etša ge Elihu a ile a bolela! Bagwera ba gagwe le ba leloko ba ile ba thoma go mo thekga, ba mo kgothatša e bile ba mo nea le dimpho. Jehofa o ile a boetša Jobo mahumo a gagwe gomme a oketša gabedi. Bjale o ile a dira eng ka bana ba Jobo bao ba bego ba hlokofetše? Jehofa o ile a homotša Jobo le mosadi wa gagwe ka gore ba be le bana ba bangwe gape ba lesome! Le gona Jehofa o ile a okeletša Jobo megwaga ya bophelo. Jobo o ile a phela mengwaga e mengwe gape e 140, gomme a bona ditlogolo tša gagwe go fihla ka moloko wa bone. Beibele e re: “Jobo a feleletša a hwile. O be a tšofetše gomme a khoše matšatši a bophelo.” (Jobo 42:10-17) E bile ge Jehofa a tla be a tsoša bahu Paradeiseng, Jobo le mosadi wa gagwe ba tlo bona bana ba bona bao sathane a ilego a ba bolaya.—Johane 5:28, 29.

Ke ka baka la eng Jehofa a ile a šegofatša Jobo? Beibele e re: “Le kwele ka kgotlelelo ya Jobo.” (Jakobo 5:11) Jobo o kgotleletše mathata a mantši go feta kamoo re ka naganago ka gona. Lentšu “kgotlelelo” le bontšha gore Jobo ga se a no kgotlelela diteko tšeo feela. Eupša o ile a kgotlelela ka go bontšha lerato le tumelo e tiilego go Jehofa. Go e na le gore a dule a kwatile o ile a ikemišetša go lebalela le bao ba bego ba mo kwešitše bohloko ka boomo. Le gona o be a dula a ipotša gore dilo di tlo loka ebile o ile dula a botegela Modimo.—Jobo 27:5.

Ka moka ga rena re swanetše go kgotlelela. Re ka kgodišega gore Sathane o tlo dula a leka go re nyamiša go swana le ge a ile a leka go nyamiša Jobo. Eupša ge e ba re sa latole tumelo, re dula re ikokobeditše, re lebalela ba bangwe, e bile re ikemišeditše go dula re botegela Modimo, re ka kgodišega gore Modimo o tlo re putsa. (Baheberu 10:36) Ge eba re ka botega go swana le Jobo re tlo nyamiša Sathane ra thabiša Tatago rena yoo a re ratago e lego Jehofa!