E le gore ditšhošwane tše dingwe di kgone go fofa, go taboga le go kwa dilo tšeo di lego kgauswi le tšona, di swanetše go dula di hlwekile. Ka mohlala, ge dinakana tša mohuta o itšego wa ditšhošwane di na le ditšhila, seo se dira gore di se sa kgona go tseba tsela, go boledišana le go kwa menkgo. Alexander Hackmann, e lego setsebi sa diphoofolo o re: “O ka se tsoge wa hwetša ditšhošwane tše di na le ditšhila. Di ithutile kamoo di ka phelago lefelong leo le nago le ditšhila.”

 Ela hloko: Hackmann le badirišanigotee le yena ba hweditše gore ditšhošwane tšeo di bitšwago carpenter di diriša selo se itšego go hlwekiša dinakana tša tšona. Ba hweditše le gore ditšhošwane tše di tloša diphisana tša go fapafapana ka bogolo tša ditšhila lenakaneng la tšona ka go koba maotwana a tšona a ka pele go dira tše ekego le a bofa le manakana ke moka tša goga manakana ao gore di a hlwekiše. Diporatšhana tšeo di lego ka gare ga maotwana ao a go kobega di tloša diphisana tše dikgolo tša ditšhila. Ke moka ditšhila tše dinyenyane di tlošwa ke poratšhana yeo e nago le dikgoba tše dinyenyane tšeo di lekanago tlwa le meriri yeo e lego manakaneng a ditšhošwane tše. Ke moka ditšhila tše dinyenyane-nyenyane tšeo di lego ka manakaneng a ditšhošwane tše, tšona di tlošwa ke poratšhe ya menwana a manyenyane-nyenyane go feta yela e nngwe.

 Bogela ge tšhošwane yeo e bitšwago carpenter e hlwekiša dinakana tša yona

 Hackmann le sehlopha sa gagwe ba dumela gore dilo tšeo di dirišwago ke ditšhošwane tše go hlwekiša dinakana tša tšona di ka dirišwa diintasetering tše dingwe. Ka mohlala, mekgwa e swanago e ka thuša kudu go hlwekiša didirišwa tše dinyenyane kudu tša elektroniki ge di sa dirwa gore di thibele le ditšhila tše dinyenyane kudu tšeo di ka bakago tshenyo.

 O nagana eng? Na selo seo tšhošwane yeo e bitšwago carpenter e se dirišago go hlwekiša dinakana tša yona se bile gona ka go itiragalela? Goba na se hlamilwe?